[1] Mɔ Tii Ala ka aa henandeya lase Salan ma iwo a n'a fɔla teme.
[2] Salan ka kɔnɔ ta ka denkɛ sɔlɔn Ibulahima yɛ aa kɔlɔya waate lɔ, Ala ya waate tɔɔmasenin nɔ.
[3] Salan na dɛnkɛ min sɔlɔnna a yɛ, Ibulahima ka wo tɔɔla ko Isiyaka (wo kɔlɔ le ko «Jɛlɛko»).
[4] Ibulahima do ka a denkɛ Isiyaka makɛnɛkɛ a sɔlɔn tele sein ma, iwo Ala na jamalila teme.
[5] Isiyaka sɔlɔn na bɛnna Ibulahima si danma san kɛmɛ (100) le ma.
[6] Salan do vɛɛ: «Ala vɛ ǹa jɛlɛko kɛ ǹ yɛ. Mɔɔ o mɔɔ vɛ ko min mɛnna, wo tii fana jɛlɛtɔ ǹ fɛ.»
[7] Salan ka kuma kɔtunun, a vɛɛ: «Jene tɛɛ se i wakalila k'a fɔ Ibulahima yɛ ko ǹe Salan kɛtɔ sin dila den ma? Kɛɛ m̀ɛ denkɛ sɔlɔn a yɛ aa kɔlɔya waate min nɔ.»
[8] Den ka buɲa. Ai ka Isiyaka da bɔ sin na lon min na, Ibulahima ka tolon ba kɛ a yɛ.
[9] Ai ka to tolon na, Salan ka Sumayila ye jɛlɛla, Misilanka moso Hajala na min sɔlɔnna Ibulahima yɛ.
[10] Wo ye Salan bolo, a vɛɛ Ibulahima yɛ: «I yi jɔnmoso wo ni a denkɛ gbɛn, kamasɔlɔn jɔnmoso wo denkɛ ni ǹe ta denkɛ Isiyaka man kan ka dɛn i kɛɛ la!»
[11] Kuma wo ka Ibulahima niilafin, kamasɔlɔn Sumayila fana tɛɛ a den ne le.
[12] Kɛɛ Ala k'a fɔ Ibulahima yɛ, a vɛɛ: «I k'i niilafin i den ni iya jɔnmoso ya ko lɔ. Salan vɛ ko ko fɔla i yɛ, i yi wo kɛ, kamasɔlɔn ǹa lahedi tala i yɛ ka bɛn i bɔzɔnnu ya ko ma, wolu bɔtɔ Isiyaka le lɔ.
[13] Kɛɛ ǹ kɛtɔ siboloma dɔ bɔla iya jɔnmoso den fana lɔ, kamasɔlɔn ale gbu yi i den ne le.»
[14] Wo dusagbɛlon, Ibulahima k'i wuli sɔɔmadanina ka dɔnnifen dɔ ta, ani jikɛbɔlɔ, ka wolu di Hajala ma. A do k'ai dɛn Hajala kawa la, ka a den don a bolo, ka ban ka a labila. Wo kɛ, Hajala ka bɔ je ka to timintiminna Bɛliseba fuwa lɔ.
[15] Ji bannin jikɛbɔlɔ lɔ, Hajala ka a den to kɔlɔmajuni dɔ duulen kɔlɔ.
[16] A k'i mataa a den na ka se biɲɛ lafiliya kelen jate lɔ k'i sii je, kamasɔlɔn a tɛɛ a fɔla a miliya lɔ, a vɛɛ: «Ǹ t'a fɛ ǹ ɲa yi to je, ǹ den yi sa.» A ka to siinin je, a v'a kan labɔla kasi le.
[17] Ala do ka a den kasikan mɛn. Wo kɛ, Ala ya mɛlɛka ka to sannɔ ka Hajala kili, a vɛɛ: «Hajala, mindɛ kɛnin? I kà siyan, kamasɔlɔn i na i den tola tɛɛminja, Ala vɛ a kasikan mɛn je.
[18] I wuli, i yi t'i den lawuli, i y'a sɛmɛdon, kamasɔlɔn ǹ kɛtɔ siboloma fangama dɔ bɔla a lɔ.»
[19] Wo fɔ, Ala ka Hajala ɲa maka, a do ka kɔlɔn dɔ ye, ji yi min nɔ. Hajala ka taa jikɛbɔlɔ lafa ji le, ka ban ka a den lamin.
[20] Ala ka to den fɛ. A ka buɲa, ka t'i sii fuwa lɔ ka kɛ donzo fali le, min bolo telennin tɛɛ biɲɛ lafiliko lɔ.
[21] A ka to siinin Palan fuwa lɔ, a ba do ka Misilanka moso dɔ fulu a yɛ.
[22] Wo yi kɛla waate min nɔ, Abimɛlɛki ni aa kɛlɛkuluba Pikoli k'a fɔ Ibulahima yɛ, ai vɛɛ a yɛ: «Ala i fɛ i kɛkolu bɛ lɔ.
[23] Wo lɔ saa, i i kalin vɛ Ala la, k'a fɔ ko i tɛnala ǹe ni ǹ dennu ani m̀ mamanilu janvala. Ko i kɛtɔ kanundeya jiyala ǹe ni ǹa duukɔnɔmɔɔlu la, i siinin lonaya la duu min nɔ, iwo ǹe gbu na kanundeya jiyala i la teme.»
[24] Ibulahima vɛɛ: «Ale le wo le, ǹ kɛtɔ ǹ kalinna.»
[25] Kɛɛ Ibulahima ka Abimɛlɛki ya bɔidennu matelemasɔɔli di, kamasɔlɔn ai tɛɛ vɛ aa kɔlɔn dɔ mina a la fanga la.
[26] Abimɛlɛki ka Ibulahima javi, a vɛɛ: «M̀ ma ko wo kɛba lɔn, kamasɔlɔn i tɛɛ ma ko wo fɔ ba ǹ yɛ. Ǹ tɛɛ tɛ a kalama, fɔ bi.»
[27] Wo kɛ, Ibulahima ka saa ni bani ni nisi dɔlu ta k'ai di Abimɛlɛki ma. Ai mɔɔ fila do ka salatikan lasii i ɲɔɔ tɛ.
[28] Ibulahima ka saamosoni wolowulan gbɛlɛ ta aa saa kulu lɔ, k'ai bila jɛ.
[29] Abimɛlɛki ka Ibulahima maɲininga, a vɛɛ: «I na saamosoni wolowulan minu bilala mindɛ lɔ jɛ?»
[30] Ibulahima do vɛɛ: «I diɲa, i yi saamosoni wolowulan minu mina ǹ na. Wo kɛtɔ mɔ masele le le k'a fɔ ko ǹe le na kɔlɔn min senna.»
[31] Wo le k'a kɛ, woja tɔɔ ka la ko Bɛliseba (wo kɔlɔ le ko «Kalinni kɔlɔn»), kamasɔlɔn ai mɔɔ fila k'i kalin i ɲɔɔ yɛ je le.
[32] Ai wɔlinin salatikan lasiila i ɲɔɔ tɛ Bɛliseba, Abimɛlɛki ni aa kɛlɛkuluba Pikoli k'i kɔsei ai fɛso Filisitikalu ya duu lɔ.
[33] Ibulahima do ka tamalisiju sɛnɛ Bɛliseba, ka ban ka mɔ Tii Ala kili a tɔɔ la, ale min kɛnin Habadan Masa le.
[34] Ibulahima ka to Filisitikalu ya duu lɔ lonaya la waate jan kɔlɔ.