[1] Salan si danmajiya ka kɛ san kɛmɛ san muan ni wolowulan (127) ne le.
[2] A ka sa Kiliyati-Aliba so kɔnɔ (ai y'a fɔla tɛɛminja ma bi ko Hɛbulon), Kanaan duu lɔ. Ibulahima k'i sii Salan su kunna, ka a saankasi kɛ.
[3] Wo kɛ, Ibulahima ka bɔ Salan fuleni dafɛ, ka taa kuma Hɛtikalu fɛ.
[4] A vɛɛ ai yɛ: «Ài malona le ǹ ne jannɔ. Ǹ'a fɛ ài yi duu di m̀ ma, a yi kɛ ǹ ta le, ǹ'i m̀ moso kabulu je.»
[5] Hɛtikalu ka Ibulahima javi, ai vɛɛ:
[6] «Maa kuntii, i tolomalɔ mɔ la. Fanma bɛlɛbɛlɛ le i le mɔ tɛma. Maa kabuluso min v'i diyala, i i moso sudoon woja. Ǹu suu suu tɛnala i dansiila i moso sudoonko maa kabulusolu la.»
[7] Wo fɔnin Hɛtika duulennu bolo, Ibulahima k'i wuli k'i majii ai kɔlɔ.
[8] A do vɛɛ ai yɛ: «Ni ài vɛ diɲa m̀ moso sudoonko ma jan, wo ma, ǹ'a fɛ ài yi Zohali denkɛ Efelon madiya ǹ yɛ,
[9] min y'a kɛ, a yi Makipela kawawoo di m̀ ma. Kawawoo wo yi Efelon ta le le, aa sɛnɛ kumuda la. A yi diɲa, a yi wo fele m̀ ma a sɔɔn bɛlɛbɛlɛ la, ka àilu kɛ wo sele le, fɔsa woja yi kɛ ǹe ta kabuluso le teme.»
[10] Efelon jɛlɛkanu tɛɛ siinin a badenma Hɛtikalu tɛma so donda la. A do ka Ibulahima javi jama bɛ ɲana,
[11] a vɛɛ: «Ǹ kuntii, i tolomalɔ ǹ na, ǹ'i ǹa sɛnɛduu felela i ma yi ne, ani kawawoo min y'a lɔ, ka m̀ badenmalu kɛ wo sele le. Taa i moso sudoon.»
[12] Wo fɔ, Ibulahima k'i majii duukɔnɔmɔɔlu kɔlɔ.
[13] A do vɛɛ Efelon yɛ duukɔnɔmɔɔlu bɛ ɲana: «I tolomalɔ ǹ na. Ǹ kɛtɔ sɛnɛduu wo sɔɔn dila i ma yi ne. I y'a mina, kosa ǹ'i m̀ moso sudoon je.»
[14] Efelon do vɛɛ Ibulahima yɛ:
[15] «Ǹ kuntii, i tolomalɔ ǹ na. Duu wo sɔɔn tɛ timin wɔligbɛ gbanan kɛmɛ naani (400) la. Wo yi mindɛ gbu ɲia ǹe ni ile wotɛ? Taa i moso sudoon.»
[16] Ibulahima ka diɲa duu sɔɔn wo ma, Efelon na min fɔla. A ka wɔligbɛ wo jate suma Hɛtikalu bɛ ɲakɔlɔ, ka a di Efelon ma, wɔligbɛ gbanan kɛmɛ naani (400) ka bɛn julalu ya sumalikɛɲa ma.
[17] A ka kɛ wo ɲa le, Ibulahima ka Efelon ya sɛnɛduu san a ma, duu min tɛɛ Makipela, Mamele magbɛn nɔ. Duu wo ni a kawawoo ani a danna kɔlɔmalu,
[18] wo bɛ ka kɛ Ibulahima ta le. Hɛtika minu bɛ siinin tɛɛ Efelon ya so donda la, wolu ka kɛ a sele le.
[19] Wo timinnin kɔ, Ibulahima ka taa a moso Salan sudoon kawawoo wo lɔ Makipela, Mamele magbɛn nɔ (ai y'a fɔla tɛɛminja ma bi ko Hɛbulon), Kanaan duu lɔ.
[20] Hɛtikalu ka sɛnɛduu wo ni a kawawoo latimin Ibulahima fɛ ka kɛ aa kabuluso le.