[1] Wo timinnin kɔ, Jusufu ka jamali di aa bonkunnasiiba ma, a vɛɛ: «I yi kɛ́ minu ya bɔlɔlu lafa balo la kpe, ka ban ka mɔɔ kelenkelenna bɛ ya wɔli bila a ta bɔlɔ lɔ.
[2] Wo kɔ, i yi ǹa wɔligbɛ jiyafɛ ta, i yi wo bila dɔɔmamɔɔ ya bɔlɔ lɔ, ka la aa balo sɔɔn kan.» A do k'a kɛ iwo Jusufu n'a jamalila teme.
[3] Kɛnɛ bɔnin, siya ka di ai ma, ai do vɛ siya minala aiya sofalinilu le.
[4] Ai bɔ so kɔnɔ dɔni ne, Jusufu k'a fɔ aa bonkunnasiiba yɛ, a vɛɛ: «I wuli, i yi kɛ́ wolu gbɛn! I vɛ ai talanna, i y'a fɔ ai yɛ, i vɛɛ: ‹A yi di vɛ, ài na koɲuma salala kojuu la?
[5] Jiyafɛ min ǹ kuntii y'a minna lɔ, ani a yi duukɔtɔ kɛla a le, a tɛɛ ài bolo? Ài vɛ kojuu ba le kɛ yi ne dɛ!› »
[6] Bonkunnasiiba k'ai talan ngɛ, a ka kuma kelen wolu fɔ ai yɛ.
[7] Ai do k'a javi, ai vɛɛ: «Maa kuntii, i yi kan mindɛ suu fɔla i ye? Ǹu tɛnala wo suu kɛla tuun!
[8] Ile gbu k'a lɔn ne ko mɔ na wɔli minu yena maa bɔlɔlu lɔ, mɔ seikɔnin wɔli wolu le i fɛ ka bɔ Kanaan duu lɔ. Mɔ kɛtɔ wɔligbɛ niwotɛ sanu suɲala i kuntii ya bon na di vɛ?
[9] I vɛ jiyafɛ yena mɔɔ min kun mɔ tɛma, wo tii faatɔle. Ǹu tɔlu yi kɛ iya jɔn ne.»
[10] Bonkunnasiiba do vɛɛ: «A yi kɛ iwo ài n'a fɔla teme. Kɛɛ jiyafɛ vɛ yena mɔɔ min kun, wo tii kelenpesa kɛtɔ ǹa jɔn ne. Wo kolɔtiɲa kunko tɛ lala ài tɔ bɛ kun dɛ.»
[11] Wo fɔ, ai kelenkelenna bɛ k'i lateleja ka aiya bɔlɔla lajii duu ma, k'a lafɔlin.
[12] Bonkunnasiiba ka bɔlɔlu lɔfɛlɛn damina kɔlɔmamɔɔ ta le ma ka taa sii dɔɔmamɔɔ ta la. Jiyafɛ do ka ye Bɛnjamin ya bɔlɔ le lɔ.
[13] Wo kɛ, ai k'ai kannafaanilu lɔfalafala damina josomakasi boloma. Ai bɛ do ka aiya donilu sili aiya sofalinilu kɔ lɔ, ai vɛ ai kɔseila so kɔnɔ.
[14] Juda ni a badennu senin Jusufu ya bon na, k'a talan a yi je bene. Ai do k'i kɛ duu ma Jusufu sen kɔlɔ.
[15] Jusufu do vɛɛ ai yɛ: «Ài na ko suu mindɛ kɛla yi ne? Ài m'a lɔn k'a fɔ kɛ́ min suu yi ǹ ne, k'a fɔ ko fɛlɛnnikɛ see yi ǹ yɛ?»
[16] Juda do k'a javi, a vɛɛ: «Ǹ kuntii, wo vɛ mɔ dalaja. Kuma tɛ mɔ bolo butu k'a fɔ. M'i se mɔ jɛlɛ lagbɛla di vɛ? Ala vɛ maa kolɔtiɲa labɔ gbɛ la yi ne. Mɔ bɛ vɛ k'iya jɔn ne butu, ǹu tanin ka la mɔɔ kan, jiyafɛ yenin min kun.»
[17] Kɛɛ Jusufu k'a javi, a vɛɛ: «Ǹ tɛnala ko suu wo kɛla tuun! Jiyafɛ yenin min kun jɔ, wo tii ma kelenpesa le kɛtɔ ǹa jɔn ne. Ài tɔlu koni, ài yi taa hɛlɛ lɔ ài fa fɛlɔ.»
[18] Wo fɔ Jusufu bolo, Juda k'i madon a la k'a fɔ a yɛ, a vɛɛ: «Ǹ kuntii, i jaani le, i yi diɲa, ǹ'i kuma kelen fɔ i yɛ. I do k'i josolakuna m̀ ma, ile min ni Misilan masakɛ lɔkaannin.
[19] Ǹ kuntii, i ka mɔ maɲininga waate lɔ, i vɛɛ: ‹Ài fa yi je? Dɔɔkɛ gbɛlɛ y'ài bolo?›
[20] Mɔ do k'i javi, mɔ vɛɛ: ‹Iin, mɔ fa yi je, kɛɛ a vɛ kɔlɔya. Kavelen dɔ yi je fana, mɔ fa na min sɔlɔnna aa kɔlɔya waate lɔ. Wo kɔlɔkɛ vɛ sa. Ale kelenpesa tonin butu a badennu lɔ. Ale kavelen diyanin mɔ fa yɛ bubale.›
[21] Wo fɔ mɔ bolo, i do k'a fɔ mɔ yɛ, i vɛɛ: ‹Ài yi na kavelen ne ǹ fɛ, kosa ǹ'a ye ǹ ɲa la.›
[22] Mɔ do vɛɛ i yɛ: ‹Maa kuntii, kavelen tɛ se bɔla mɔ fa dafɛ. Ni a ka bɔ a dafɛ, mɔ fa satɔle.›
[23] Kɛɛ i ka mɔ javi, i vɛɛ: ‹Ni ài dɔɔkɛ dɔɔmaninda ma na ài fɛ, ài man kan k'ài lɔ ǹ kɛɛna tuun!›
[24] «Ǹ kuntii, mɔ kɔseinin mɔ fa fɛlɔ, mɔ k'i kumakan lase a ma.
[25] Waate dana timinnin, mɔ fa k'a fɔ mɔ yɛ ko m'i kɔsei balo sanya lɔ.
[26] Mɔ ka mɔ fa javi, mɔ vɛɛ: ‹Mɔ tɛ se taala ten dɛ. Kɛɛ ni mɔ dɔɔni do ka bila mɔ fɛ, wo vɛ kɛla, m'i taale. Kamasɔlɔn mɔ man kan k'i lɔ kɛ́ wo kɛɛna butu fɔ mɔ dɔɔni vɛ kɛla mɔ fɛ.›
[27] Wo fɔ mɔ bolo, mɔ fa min yi iya jɔn ne, wo vɛɛ mɔ yɛ: ‹Àilu gbu k'a lɔn ne k'a fɔ ko m̀ moso Lasɛli na denkɛ fila le sɔlɔnna ǹ yɛ.
[28] A kelen vɛ tunun m̀ ma. Ǹ lanin a la, soo fali dɔ le n'a lɔfalafalala. Ka ta wo waate ma ka sii bi la, m̀ ma a ye ba.
[29] Ni ài do ka dɔ min ta ǹ dafɛ fana, ni masuwako dɔ ka kɛ a la, wo vɛ kɛla, ài vɛ sabu le, ǹ kungbɛ jiitɔ kabulu kɔnɔ josomakasi boloma.›
[30] «Wo lɔ saa, ni ǹ ka ǹ kɔsei ǹ fa fɛlɔ tan, kavelen do tɛ mɔ fɛ, k'a talan wo ya ko gbaanyine ǹ fa josokun na bubale,
[31] ni a k'a ye ko kavelen m'i kɔsei mɔ fɛ, wo vɛ kɛla, ǹ fa satɔle. Ni wo ka kɛ, ǹu iya bɔidennu kɛtɔ kɛla sabu le ka mɔ fa kungbɛ lajii kabulu kɔnɔ josomakasi boloma.
[32] K'a dɔ la wo kan, ǹ kuntii, ǹ na ǹ jɛlɛ kɛla tɔima le le ǹ fa yɛ ka bɛn kavelen latangako ma. Ǹ ko a yɛ: ‹Ǹ fa, ni m̀ ma a laseikɔ i ma, wo vɛ kɛla, wo kunko latɔ ǹ kun i ɲakɔlɔ ǹa dunuɲalɔtɛɛ tɔ bɛ lɔ.›
[33] Wo lɔ saa ǹ kuntii, i yi diɲa, ǹe yi kɛ kavelen min ɲɔɔ le, ǹ'i to i bolo jan jɔnya boloma. Kavelen do yi seikɔ ka taa a kɔlɔnu fɛ.
[34] Ǹe kɛtɔ seikɔla ǹ fa fɛlɔ di, k'a talan kavelen tɛ ǹ fɛ? Ni wo masuwako vɛ ǹ fa masɔlɔnna, ǹ tɛ se ǹ ɲa lala a kan.»