[1] Lon dɔ, Janguba denmoso Dina, Leya na min sɔlɔnna a yɛ, wo ka taa bɔ duu wo singbililu ma.
[2] Wo k'a talan, Hivika kɛ́ Hamoli le tɛɛ duu wo masaya la. Wo denkɛ Sɛkɛmu ka Dina ye ngɛ, a ka a mina fanga la k'i filin a kan.
[3] Wo kɛ, Janguba denmoso Dina ya ko ka gbaan Sɛkɛmu josokun na. Singbili ya ko ka diya a yɛ, a do ka kuma a fɛ fɔsa a a lakunfa teme.
[4] Sɛkɛmu k'a fɔ a fa Hamoli yɛ, a vɛɛ: «Ǹ'a fɛ i yi singbili min fulu ǹ yɛ.»
[5] Janguba k'a mɛn k'a fɔ ko Sɛkɛmu vɛ a denmoso Dina lakɔsɔ, kɛɛ komi aa denkɛlu tɛɛ vɛ taa kolofen kunnasiiya lɔ tuu kɔlɔ, wo le k'a kɛ, a k'i makun haan fɔɔ ai yi na.
[6] Wo yi kɛla waate min nɔ, Sɛkɛmu fa Hamoli ka na bɔ Janguba ma ka kuma a fɛ.
[7] Janguba denkɛlu nanin ka bɔ tuu kɔlɔ ka ko wo mɛn, wo k'ai niimakumun bubale. Ai ka mɔnɛ bubale, kamasɔlɔn Sɛkɛmu tɛɛ vɛ malobaliyako le la Bani-Isilankalu kɔkan, ka bɛn a n'i filin mingɛla Janguba denmoso kan. Mɔɔ man kan ka ko suu wo kɛ tuun!
[8] Kɛɛ Hamoli k'a fɔ ai yɛ, a vɛɛ: «Ài denmoso ya ko gbaanyine ǹ den Sɛkɛmu josokun na bubale. Ài jaani le, ài y'a di a ma fulu boloma.
[9] Ài m'i bɛn kan kelen ma ka bɛn aa mɔ wotɛ fuluɲɔɔya ma. Ài y'ài denmosolu di mɔ ma. Ǹu fana yi mɔ denmosolu di ài ma.
[10] Ài y'ai sii mɔ tɛma. Maa duu muumɛ labilatɔ ài yɛ. Ài y'ài sii maa duu lɔ, ài vɛ julayalu kɛla. Ài yi maa duu dɔ san ài jɛlɛ yɛ.»
[11] Wo fɔ Hamoli bolo, Sɛkɛmu do vɛɛ denmoso fa ni a kɔlɔnu yɛ: «Ǹ'a fɛ ǹa ko yi diya ài yɛ. Ài vɛ fen fen ɲininna ǹ fɛ, ǹ kɛtɔ wo dila ài ma.
[12] Ài ka fuluwɔli daa gbeleyala te o te, ani ka fulufen suu suu ya ko fɔ ǹ yɛ, ǹ kɛtɔ wo bɛ dila iwo ài n'a fɔla teme. Kɛɛ fɔ ài yi singbili di m̀ ma, a yi kɛ m̀ moso le.»
[13] Janguba denkɛlu ka Sɛkɛmu ni a fa Hamoli javi janva kuma la, kamasɔlɔn Sɛkɛmu tɛɛ vɛ ban ai dɔɔmoso Dina lakɔsɔla.
[14] Ai do vɛɛ ai yɛ: «K'a fɔ m'i mɔ dɔɔmoso di kɛ́ kɛnɛkɛbali ma, mɔ tɛ se ko suu wo kɛla feu! Wo yi kɛle maloyako ba le mɔ ma.
[15] Kɛɛ ni ài do ka ko kelen min kɛ, ni ài ka ài jɛlɛ kɛ iwo ǹu kɛnin teme, ka àiya kɛlu bɛ makɛnɛ, wo vɛ kɛla, mɔ bolo siitɔ àiya kuma kɔlɔ.
[16] Mɔ kɛtɔ mɔ denmosolu dila ài ma. Ǹu fana kɛtɔ ài denmosolu fulula. Mɔ siitɔ ài tɛma jan ka kɛ mɔɔ kelen ne.
[17] Kɛɛ ni ài ma diɲa ài makɛnɛkɛko ma, wo vɛ kɛla, mɔ kɛtɔ mɔ dɔɔmoso minala ài la ka taa a le.»
[18] Kuma wo ka diya Hamoli ni a den Sɛkɛmu yɛ.
[19] Kavelen do ma tamala don wo kɛko la, kamasɔlɔn Janguba denmoso ka diya a yɛ bubale. Wo k'a talan, ai tɛɛ Sɛkɛmu magbiliyala ka timin aa demaya tɔ bɛ la.
[20] Hamoli ni a denkɛ Sɛkɛmu ka taa ladɛnkɛya lɔ so donda la ka kuma sokɔnɔkɛlu fɛ.
[21] Ai vɛɛ: «Mɔɔ minu nanin josolajii le lɔ. Ài m'i diɲa ai siiko ma jan, ai yi julaya kɛ maa duu lɔ. Maa duu lɔbuɲanin, ǹu ni ailu bɛ yi sene kunna je. Mɔ y'ai denmosolu fulu ka mɔ denmosolu di ai ma.
[22] Kɛɛ fɔ m'i ko kelen min kɛ, jani ai yi diɲa k'i sii mɔ tɛma ka ailu ni ǹu bɛ kɛ mɔɔ kelen ne. Wo le, fɔ maa kɛ́ kelenkelenna bɛ makɛnɛ yi kɛ, iwo ailu gbu makɛnɛkɛnin teme.
[23] Ni mɔ do ka wo kɛ, aiya kolofennu ni ai sɔlɔnfen tɔ bɛ kɛtɔ ǹu le ta le, kɛlɛ? Kɛɛ fɔ m'i mɔ bolo sii aiya kuma wo kɔlɔ. Wo le y'a kɛ, ai yi sii mɔ tɛma.»
[24] Sokɔnɔkɛ minu tɛɛ vɛ ai ladɛn so donda la, wolu bɛ k'ai bolo sii Hamoli ni a denkɛ Sɛkɛmu ya kuma kɔlɔ. Wo kɛ, sokɔnɔkɛlu bɛ makɛnɛ ka kɛ.
[25] A tele sawana lon, k'ai bɛ to jolokulaya bolo wo ma, Janguba denkɛ fila, Dina badennu Simiyɔn ni Levi, wolu ka aiya siyamifannu ta ka don so kɔnɔ sokɔnɔmɔɔlu ɲina ma, k'i ben so kan ka je kɛlu bɛ faa.
[26] Ai ka Hamoli ni a denkɛ Sɛkɛmu faa siyamifan ne, k'ai dɔɔmoso Dina ta Sɛkɛmu ya bon na ka taa a le.
[27] Janguba denkɛ tɔlu ka don so kɔnɔ ngɛ ka sulu lanin ye je, ai k'i ben kɛlɛkɔlɔfennu lɔ, kamasɔlɔn ai dɔɔmoso lakɔsɔko fɛ sokɔnɔmɔɔlu bolo.
[28] Saalu o, banilu o, sofalinilu o, nisilu o, ai na fen kaalama suu suu yena so kɔnɔ ni a laminin nɔ, ai ka wo bɛ ta.
[29] Ai ka aiya nafololu ni aiya dennilu ni ai mosolu bɛ ta, k'ai kɛ ai ta kɛlɛtɔnɔlu le, ani ai na fen kaalama suu suu yena aiya bonnu la.
[30] Wo kɛnin, Janguba k'a fɔ Simiyɔn ni Levi yɛ, a vɛɛ: «Ài vɛ ǹa ko gbeya teme Kanaanka ni Pelizika duulennu yɛ, wo ko le vɛ m̀ bila namala lɔ yi ne. Ǹa mɔɔlu siyayanin tɛ. Ni jan duulennu k'i ladɛn k'i kɛ ǹ kan, ǹe ni ǹa demaya bɛ siyasatɔle.»
[31] Kɛɛ ai do k'a javi, ai vɛɛ: «Sɛkɛmu na mɔ dɔɔmoso kɛ yi la iwo sungulunba. Wo bɛnyine?»