Matiyu 18
[1] Wo waate, Isa ya kɔbiladennu ka na a maɲininga, ai vɛɛ: «Ala vɛ aa masaya lankɛnɛmayala lon min, jene kɛtɔ ɲamɔɔ le?»
[2] Wo lɔ, Isa ka denni dɔ kili ka a lalɔ ai tɛma.
[3] A vɛɛ ai yɛ: «Ǹ'i tuɲa fɔ ài yɛ, ni ài ma ài joso jɛlɛma ka kɛ iwo dennilu, ài tɛnala donna Ala ya masaya kɔlɔ.
[4] Mɔɔ min do vɛ a fanmajiila ka kɛ iwo denni min ne, wo tii le kɛtɔ ɲamɔɔ le Masaba ya mɔɔlu tɛma.
[5] Mɔɔ min vɛ diɲala ka denni min ɲɔɔzii mina kobɛn ka bɛn ǹa ko ma, wo tii vɛ ǹe gbu mina kobɛn.»
[6] «Ni do mɔɔ dɔ ka denni minnu kelen nafili minnu limandeyanin m̀ ma, a fisayanin ne ai yi kawa ba sili wo tii kanna ka a lafili kɔɔ duun ba lɔ.
[7] Gbalo yi dunuɲamɔɔlu yɛ, k'a masɔlɔn ko siyama yi kɛla dunuɲa min yi mɔɔlu lafilila. Alalaa ko wolu yi kɛla waate bɛ. Kɛɛ mɔɔ min y'a mɔɔɲɔɔ lafilila, gbalo yi wo tii yɛ!
[8] I bolo ni wo tɛ i sen vɛ i lafilila, i y'a tɛɛ a la ka a lafili, k'a masɔlɔn i bɔnɔ ko i bolo ni wo tɛ i sen na, wo le fisayanin i ma, jani i fali dafani la yi fili taa banbali lɔ.
[9] Ni i ɲaden kelen v'i lafilila, i y'a bɔ a lɔ ka a lafili, k'a masɔlɔn ni i ɲakelentɔ ka don nimaya banbali lɔ, wo le fisayanin i ma, jani i ɲafilatɔ la yi fili Jahanama taa lɔ.»
[10] «Ài alama ài kà denni minnu dɔ dɔɔya, k'a masɔlɔn ǹ a fɔ ài yɛ, ǹ ko mɛlɛka minnu y'ai jandola ai lɔ, wolu yi sene ai madonna ǹ Fa Ala la haijɛnɛ waate bɛ.»
[12] «Ài miliya yi di? Ni saa kelen ka tunun saa kɛmɛ tii ma do? A tɛ a tɔ bikɔnɔ ni kɔnɔ to tini kɔkan ka taa saa tununnin ɲininya lɔ?
[13] Ǹ'i tuɲa fɔ ài yɛ, a v'a yena, a sawatɔ a la ka timin a tɔ bikɔnɔ ni kɔnɔ ya ko la, minnu ma tunun a ma.
[14] Wo ɲa kelen ma, ài Fa min yi haijɛnɛ, wo t'a fɛ hali denni minnu kelen yi tunun.»
[15] «Ni i badenma ka hakɛ ta i la, i yi taa a ɲafɔ a yɛ, ile kelen, ale kelen. Ni a ka diɲa ya kuma ma, àiya badenmaya yi tole a nɔ lɔ.
[16] Ni do a ma diɲa ya kuma ma, i yi mɔɔ kelen ni wo tɛ mɔɔ fila ta ka taa a fɛlɔ, fɔsa mɔɔ fila ni wo tɛ mɔɔ sawa yi kɛ wo ko masele le.
[17] Ni do a k'i ban a tolo malɔla ai la, i yi wo lase limandeyajama ma. Ni do a k'i ban a tolo malɔla jama la kɔtunun, i y'a jate iwo Alalɔnbali, ni wo tɛ nisɔɔnminaba.
[18] Ǹ'i tuɲa fɔ ài yɛ, ài vɛ fen fen silila duukolo kan, wo silitɔ haijɛnɛ. Ni do ài ka fen fen fɔlin duukolo kan, wo gbazan fɔlintɔ haijɛnɛ.»
[19] «Ǹ a fɔ ài yɛ gbazan, ǹ ko ni ài lɔ mɔɔ fila ka bɛn ko ko ma ka Ala dali a la duukolo kan, ǹ Fa Ala min yi haijɛnɛ, a kɛtɔ wo kɛla ai yɛ.
[20] K'a masɔlɔn mɔɔ fila ni wo tɛ mɔɔ sawa v'i ɲɔɔ ladɛnna ǹ tɔɔ lɔ, ǹ kɛtɔ ai tɛma je.»
[21] Wo kɛnin, Piɛl ka na Isa maɲininga, a vɛɛ: «Fanma, ni m̀ badenma ka to hakɛ tala ǹ na, ǹ a makoto haan fɔɔ siɲa jein? Siɲa wolowulan?»
[22] Isa vɛɛ a yɛ: «Ɛnɛn, i kà dan siɲa wolowulan ma. I yi wo tii makoto fɔɔ siɲa biwolowulan siiyama wolowulan.
[23] Ala vɛ aa masaya lankɛnɛmayala lon min, a kɛtɔle iwo masa dɔ min tɛɛ a fɛ ka wɔli ko ɲabɔ ale ni aa bɔlidennu wotɛ.
[24] A k'i wuli wo ɲabɔla mingɛ, ai ka aa bɔliden dɔ lana a ma, aa wɔli waa jilika jilika julu yi min na.
[25] Kɛɛ se tɛɛ tɛ a yɛ ka julu sala mingɛ, masakɛ vɛɛ ko bɔliden yi fele, ka a moso ni a dennu gbazan fele ani a bolofen bɛ, sa julu wo yi sala.
[26] Wo lɔ, bɔliden v'i mabilinna ka masakɛ sen mina, ka a madiya kosɛvɛ, a vɛɛ: ‹I i joso lajii. Ǹ kɛtɔ iya wɔli bɛ salala.›
[27] A hina ka don masakɛ la. Wo k'a bila, ka julu wo bɛ lokoto.
[28] Bɔliden do vɛ bɔla je ka taa bɛn a bɔlidenɲɔɔn dɔ le, aa wɔligbɛ kɛmɛ julu tɛɛ min na. A vɛ wo minala a kanma k'a lɔja fɔɔ ka wo nunakili matɛɛ. A vɛɛ a yɛ: ‹I yi ǹa julu sala!›
[29] A bɔlidenɲɔɔn v'i mabilinna k'a sen mina k'a madiya, a vɛɛ: ‹I i joso lajii, ǹ kɛtɔ iya wɔli salala.›
[30] Kɛɛ bɔliden ma diɲa feu. A ka kɛ́ mina ka a bila kaso la ko ni a ma julu sala, a tɛnala bɔla je.
[31] A bɔlidenɲɔɔlu ka wo ye mingɛ, ai josoma ka gba kosɛvɛ. Ai ka taa wo bɛ ɲafɔ aiya masakɛ yɛ.
[32] Wo kɛ, masakɛ ka bɔliden wo kili k'a fɔ a yɛ, a vɛɛ: ‹Ile, bɔliden kolon! Ǹ na iya julu bɛ lɔkotola i yɛ baa i na m̀ madiyala.
[33] Ǹ na hinala i la teme, ile gbazan tɛɛ ka kan ka hina i bɔlidenɲɔɔ la ten ne, kɛlɛ?
[34] Mɔnɛ boloma, masakɛ ka a bila kaso la ko ai y'a tɔlɔya je fɔɔ a vɛ banna aa julu bɛ salala.»
[35] Isa vɛɛ: «Ǹ Fa min yi haijɛnɛ, wo gbazan kɛtɔ wo suu kɛla ài kelenkelenna bɛ la ni ài ma ài badenmalu makoto ài josokun bɛ la.»