Matiyu 16
[1] Falisi ni Sadusi dɔlu ka na Isa ma a lɔsuman ko lɔ. Ai vɛɛ ko a yi kawanako tɔɔmase dɔ kɛ ai ɲana, min bɔnin Ala fɛ.
[2] Isa vɛɛ: [«Ài vɛ sangbolo ɲa wulɛnnin yena telejii waate, ài y'a fɔla ko bananya makatɔle.
[3] Sɔɔma da la, ài vɛ sangboloma finnin yena, ài y'a fɔle la ko sanji natɔle bi, k'a masɔlɔn san finnin. Ài senin sangbolo ɲayena teme k'a kɔlɔ lɔn. Mindɛ lɔ ài tɛ se waate min tɔɔmaselu kɔlɔ lɔnna gbazan?]
[4] Bi mɔɔlu yi limandeyabali le le ani kɔnɔgbeyamɔɔ. Ai y'a fɛ ka kawanako tɔɔmase dɔ ye, kɛɛ tɔɔmase foi tɛ jiya ai la fɔ nabi Yunusa ta.» Wo kɛ, a k'ai to je ka taa.
[5] Kɔbiladennu ka kɔɔ tɛɛ mingɛ, ai k'a ye ko ai vɛ ɲina, ai ma bulu ta.
[6] Isa vɛɛ ai yɛ: «Ài y'ài jando ài jɛlɛ lɔ Falisi ni Sadusilu ya bululafununsɛɛ kanma.»
[7] Kɔbiladennu vɛ a fɔla i ɲɔɔn yɛ, ai vɛɛ: «Mɔ ma na bulu le. Wo le n'a kɛla, a na kuma wo fɔla.»
[8] Isa k'ai miliya lɔn, a vɛɛ ai yɛ wo lɔ: «Àilu minnu ya limandeya dɔɔyanin! Mindɛ lɔ ài y'a fɔla i ɲɔɔn yɛ ko bulu tɛ ài bolo?
[9] Ài m'a ɲaye bene? Ǹ na bulukala loolu tala ka kɛ́ mɔɔ waa loolu balo min na ani ài na gbɔlɔ jein ne lafala bulu kulunkulun tɔ la, ài hangili ma to wo lɔ?
[10] Ǹ na bulukala wolowulan tala ka kɛ́ mɔɔ waa naani balo min na ani ài na gbɔlɔ jein ne lafala bulu kulunkulun tɔ la, ài hangili ma to wo lɔ gbazan?
[11] Mindɛ lɔ ài m'a ɲaye ba k'a fɔ ǹ kain tɛɛ tɛ bulu ma? Ài yi jando ài jɛlɛ lɔ Falisi ni Sadusilu ya bululafununsɛɛ kanma.»
[12] Wo kɛ, kɔbiladennu k'a ɲaye k'a fɔ ko Isa tɛɛ m'a fɔ ai yɛ ko ai y'ai jando ai jɛlɛ lɔ bululafununsɛɛ kanma fɔ Falisi ni Sadusilu ya kalan ne kanma.
[13] Isa ni aa kɔbiladennu senin Sezale Filipi koovi lɔ, a k'ai maɲininga, a vɛɛ: «Mɔɔlu yi ǹe Mɔɔnivin Tanin jatela jene le?»
[14] Ai k'a javi, ai vɛɛ: «A dɔlu y'a fɔla ko Makoliba Yaya le ile le. A dɔlu gbazan y'a fɔla ko kela Iliya le ile le. A dɔgbɛlɛlu y'a fɔla ko kela Jelemi le ile le, ni wo tɛ kela gbɛlɛ min timinnin kɔlɔkɔlɔ le.»
[15] A k'ai maɲininga, a vɛɛ: «Àilu do? Ài yi ǹ jatela jene le?»
[16] Simɔn Piɛl vɛɛ: «Ile le Masa Tɔɔmasenin ne, ani Nimayadiba Ala Den.»
[17] Isa k'a javi, a vɛɛ: «Yaya den Simɔn, i yi duwawuden ne le, k'a masɔlɔn i na min fɔla, mɔɔ ma wo lankɛnɛmaya i yɛ, fɔ ǹ Fa Ala min yi haijɛnɛ.
[18] Ǹ a fɔla i yɛ gbazan, ile le yi Piɛl le, min kɔlɔ yi ko falakolo. Ǹ kɛtɔ ǹa limandeyajama lɔla falakolo wo le kan. Hali saya tɛnala se sɔlɔnna jama wo ma.
[19] Ǹ kɛtɔ koɲilu dila i ma ka da laka mɔɔlu yɛ, sa ai yi don Ala ya masaya kɔlɔ. I vɛ fen fen silila duukolo kan, wo silitɔ haijɛnɛ. Ni do i ka fen fen fɔlin duukolo kan, wo gbazan fɔlintɔ haijɛnɛ.»
[20] Wo kɛ, a k'aa kɔbiladennu jamali k'a magbeleya ko ai kà a fɔ mɔɔ suu suu yɛ k'a fɔ ale le Masa Tɔɔmasenin ne.
[21] K'a ta waate wo ma, Isa tɛɛ a fɔla aa kɔbiladennu yɛ ka a gbɛ ko a ka kan ka taa Jelusalɛm ka tɔlɔya sɔlɔn kɛmɔɔbalu ni salakalaseba kundiilu ani seliya kalanmɔɔlu bolo. A faatɔ, kɛɛ tele fila a sawana, a wulitɔ.
[22] Piɛl ka Isa kili wo lɔ, ka a mataa kɔbiladen tɔlu la, ka a makuma damina, a vɛɛ: «Fanma, Ala y'i tanga wo ma. Wo tɛ kɛ tuun.»
[23] Kɛɛ Isa k'i kɔdon k'a fɔ Piɛl yɛ, a vɛɛ: «Ile Soɛtana. Bɔ ǹ kɔ! Ile yi ǹ kunnɔtɛɛba le le, k'a masɔlɔn i t'i milila Ala sawo ma, fɔ adamadennu sawo.»
[24] Wo kɛnin, Isa vɛɛ aa kɔbiladennu yɛ: «Ni mɔɔ min a fɛ ka bila ǹ kɔ, fɔ wo tii y'i ban a jɛlɛ lɔ ka a gbaankɔlɔman mina ka bila ǹ kɔ.
[25] K'a masɔlɔn mɔɔ min a fɛ ka a nin nakisi, wo tii bɔnɔtɔ a nin na. Kɛɛ ni mɔɔ min ka bɔnɔ a nin na ka bɛn ǹe ma, wo tii kɛtɔ a nin nakisila.
[26] A yi di? Ni mɔɔ ka dunuɲa bɛ sɔlɔn ka bɔnɔ a nin na, tɔnɔ mindɛ yi wo la? Mɔɔ yi se mindɛ dila ka a nin kunmaka?
[27] Alalaa ǹe Mɔɔnivin Tanin kɛtɔ nala ǹa mɛlɛkalu fɛ, ǹ Fa aa magbiliya lɔ. Wo vɛ kɛla, ǹ kɛtɔ mɔɔ kelenkelenna bɛ salala ka bɛn ai kɛkolu ma.
[28] Ǹ'i tuɲa fɔ ài yɛ, a dɔlu y'ài tɛma jan, minnu tɛnala faala, fɔɔ ai vɛ ǹe Mɔɔnivin Tanin natɔ yena ǹa masaya lɔ.»