Matiyu 5
[1] Isa ka jama ye mingɛ, a ka jɛlɛ tini kɔkan k'i sii. Aa kɔbiladennu k'ai madon a la.
[2] A vɛ ai kalanna, a vɛɛ:
[3] «Mɔɔ minnu k'a lɔn ai lɔnin fandanya la Ala ɲakɔlɔ, wolu yi duwawuden ne le, k'a masɔlɔn ai yi Ala ya masaya le kɔlɔ.
[4] Mɔɔ minnu josomakasanin, wolu yi duwawuden ne le, k'a masɔlɔn Ala kɛtɔ ai joso sumala.
[5] Mɔɔ mafanilu, wolu yi duwawuden ne le, k'a masɔlɔn duukolo kɛtɔ ai ta le le.
[6] A lɔɔ yi mɔɔ minnu la k'ai telen Ala yɛ, wolu yi duwawuden ne le, baa Ala kɛtɔ ai lawasala.
[7] Mɔɔ minnu yi hinala ai mɔɔɲɔɔlu la, wolu yi duwawuden ne le, k'a masɔlɔn Ala kɛtɔ hinala ai la.
[8] Mɔɔ minnu joso gbɛnin, wolu yi duwawuden ne le, k'a masɔlɔn ai kɛtɔ Ala yena.
[9] Mɔɔ minnu yi hɛlɛ ladonna mɔɔlu wotɛ, wolu yi duwawuden ne le, k'a masɔlɔn Ala kɛtɔ a fɔla ai ma ko a dennu.
[10] Mɔɔ minnu yi tɔlɔyala k'a masɔlɔn ai yi siya telennin kan, wolu yi duwawuden ne le, k'a masɔlɔn ai yi Ala ya masaya le kɔlɔ.
[11] Mɔɔlu vɛ ài jɛvɛla, k'ài tɔlɔ, ka tɔɔ la ài la, ka kuma yon suu bɛ fɔ ài ma ǹa ko lɔ, wo vɛ kɛla, ài yi duwawuden le le.
[12] Ài kɔnɔ yi diya bubale, baa ài kɛtɔ balayi ba sɔlɔnna haijɛnɛ, k'a masɔlɔn ai ka kela kɔlɔkɔlɔlu tɔlɔya tenden ne.»
[13] Isa ka to kumala, a vɛɛ: «Àilu yi kɔɔ le le duukolo kɔkan. Kɛɛ ni kɔɔ timiya vɛ bɔla a la, a yi se timiyala di kɔtunun? A tɛ foi ɲia butu, mafɔ mɔɔ y'a lafili banama, mɔɔlu timintɔ y'a lɔdɔndɔn.
[14] Àilu yi kɛnɛya le le duukolo kɔkan. So min siinin tini kɔkan, wo tɛ se doonna.
[15] Mɔɔ tɛ fitina lamɛnɛnna k'a sii nɛɛ kɔlɔ. Fɔ i y'a sii fitinasiiya le lɔ, sa a yi kɛnɛya di bonnamɔɔ bɛ ma.
[16] Àiya kɛnɛya yi bɔ ten ne mɔɔlu ɲana, sa ai y'ài kɛko keinnu ye k'ài Fa magbiliya, min yi haijɛnɛ.»
[17] Isa ka to kumala, a vɛɛ: «Ài k'ài mili k'a fɔ ǹ nanin ka seliyalu bɔ ai nɔ lɔ, min bɛ sɛvɛnin kela Musa ya Taulati lɔ, ni wo tɛ kela dɔgbɛlɛlu ya kitabulu lɔ. M̀ ma na ka wolu bɔ ai nɔ lɔ, fɔ k'ai mafa.
[18] Ǹ'i tuɲa fɔ ài yɛ, haan ka taa a sii sangbolo ni duukolo ban lon na, foi tɛnala bɔla seliya kitabu la, hali a tomi kelen, ni wo tɛ a sɛvɛliden kelen, haan fɔɔ seliya bɛ ma vɛ fala.
[19] Wo le y'a kɛla, hali ni mɔɔ min ka seliya bɛ lɔ dɔɔmaninda dɔ to je, k'a dɔlu kalan ko ai yi wo ɲɔɔn kɛ, wo vɛ kɛla wo tii jatetɔ dɔɔmaninda le le Masaba ya mɔɔlu tɛma. Ni do mɔɔ min ka seliya wolu labato k'a dɔlu kalan a la, wo tii jatetɔ mɔɔba le le Masaba ya mɔɔlu tɛma.
[20] Ǹ'i tuɲa fɔ ài yɛ, ǹ ko ni ài ma telen ka timin Falisi ni seliya kalanmɔɔlu la, ài tɛnala donna Ala ya masaya kɔlɔ tuun.
[21] Isa ka to kumala, a vɛɛ: «Ài k'a lɔn a k'a fɔ ài bemanu yɛ ko: ‹Ài kà mɔɔ faa, ko min vɛ mɔɔ faala, kiti yi bila wo tii la.›
[22] Kɛɛ ǹ a fɔ ài yɛ, ǹ ko min vɛ mɔnɛla a badenma ma, kiti yi bila wo tii la. Ni do min vɛ a badenma dɔɔyala, ai yi taa wo tii le kititɛɛjama lɔ. Ni do min v'a fɔla a badenma ma ko ‹mɔɔ kolon›, wo la yi fili jahanama taa la.
[23] Wo le y'a kɛla, i vɛ kɛla salaka bɔla gbalan kɔkan, ni i hangili ka bila k'a fɔ ko dɔ yi ile ni i badenma wotɛ,
[24] wo vɛ kɛla, iya salaka to gbalan ɲafɛ je, i yi taa i ni i badenma wotɛ bɛn bene. Wo latimin kɔfɛ, i kɔsei ka taa ya salaka bɔ.
[25] Ni mɔɔ dɔ vɛ kɛla taala i le kititɛɛya lɔ, ài vɛ kɛla taala, i i lɔja ka kɛlɛ ban jani ài yi se je. Ni wo tɛ, ni a k'i don kititɛɛba bolo, wo kɛtɔ i donna kasobon lakanaliba le bolo. Wo gbazan kɛtɔ i bilala kaso la.
[26] Ǹ'i tuɲa fɔ ài yɛ, i tɛ bɔ je mafɔ i vɛ banna wɔli bɛ salala.»
[27] Isa ka to kumala, a vɛɛ: «Ài k'a lɔn a k'a fɔ ài bemanu yɛ ko: ‹Ài kà jalɔnya kɛ.›
[28] Kɛɛ ǹ a fɔ ài yɛ, ǹ ko ni i k'i ɲa kaa moso lɔ haan a masɔlɔn lɔɔ y'i mina, i vɛ ban jalɔnya kɛla wo fɛ i josokun nɔ.
[29] Ni i bolokinin ɲaden k'i lafili, i y'a bɔ a lɔ ka a lafili, k'a masɔlɔn i bɔnɔ ko i fali fan kelen na, wo le fisayanin i ma jani i fali dafanin la yi fili jahanama.
[30] Ni i bolokinin k'i lafili, i y'a tɛɛ a la ka a lafili, k'a masɔlɔn i bɔnɔ ko i fali fan kelen na, wo le fisayanin i ma jani i fali dafanin yi taa jahanama.»
[31] Isa ka to kumala, a vɛɛ: «A sɛvɛnin kitabu lɔ gbazan ko: ‹Ni kɛ́ min a fɛ ka a moso bila, a ka kan ka fulusa sɛvɛ di a ma.›
[32] Kɛɛ ǹ a fɔ ài yɛ, ǹ ko mɔɔ min v'a moso bilala k'a talan a ma jalɔnya kɛ, wo tii vɛ kɛ sabu le k'a lɔ jalɔnya la. Ni kɛ́ gbɛlɛ k'a fulu wo boloɲa ma, wo gbazan vɛ jalɔnya kɛ.»
[33] Isa ka to kumala, a vɛɛ: «Ài k'a lɔn gbazan Ala k'a fɔ ài bemanu yɛ ko: ‹I k'i kalinkan tiɲan. I vɛ dalakan min tala Ala yɛ, i yi wo mafa.›
[34] Kɛɛ ǹ a fɔ ài yɛ, ǹ ko ài k'ài kalin tuun. Ài k'ài kalin haijɛnɛ la, k'a masɔlɔn wo yi Ala ya masayasiifen ne le.
[35] Ài k'ài kalin duukolo la, k'a masɔlɔn wo yi Ala senbilaya le le. Ài k'ài kalin Jelusalɛm la, min yi Masaba ya so le.
[36] Ài k'ài kalin ài jɛlɛ kun na, k'a masɔlɔn ài tɛ se hali ài kunsi kelen gbɛla, ni wo tɛ k'a fin.
[37] Ài vɛ diɲala ko min ma, ài y'a fɔ le kɛ dein ko ‹Aan, wo le›. Ni ài ma diɲa ko min ma, ài y'a fɔ le kɛ dein ko ‹Ɛnɛn, wo tɛ›. Ài yi dan wo ma. Ni wo tɛ, ài vɛ ko ko lala wo kan, wo bɔnin Soɛtana le lɔ.»
[38] Isa ka to kumala, a vɛɛ: «Ài k'a lɔn a k'a fɔ ài bemanu yɛ ko: ‹Mɔɔ min v'i ɲa tela, ai yi wo gbazan ɲa te. Mɔɔ min v'i ɲin kalila, ai yi wo gbazan ɲin kali.›
[39] Kɛɛ ǹ a fɔ ài yɛ, ǹ ko ni mɔɔ ka koyon kɛ i la, i k'i ta sala. Ni mɔɔ k'i gbasi i bolokinin tolo la, i y'a tɔ kelen di a ma gbazan.
[40] Ni mɔɔ a fɛ ka taa i le kititɛɛya lɔ a y'iya faaniba kɔlɔbila mina i la, iya faaniba gbazan di a ma.
[41] Ni mɔɔ min v'i lɔla diyanigbeya doni tala ka kilo kelen taama a kɔ, i y'aa doni ta ka kilo fila taama a kɔ.
[42] Ni mɔɔ min ka i dali fen na, i y'a sɔ. Ni do mɔɔ a fɛ ka fen siɲa i ma, i k'i ban.»
[43] Isa ka to kumala, a vɛɛ: «Ài k'a lɔn a k'a fɔ ài bemanu yɛ ko: ‹I i ɲiilu kanu, ka i juulu gbeya i yɛ.›
[44] Kɛɛ ǹ a fɔ ài yɛ, ǹ ko ài y'ài juulu kanu, ka Ala dali ài tɔlɔyabalu yɛ,
[45] sa ài Fa min yi haijɛnɛ, wo y'ài jate a dennu le. K'a masɔlɔn ale le yi tele labɔla mɔɔ yon ni mɔɔ bɛlɛlu yɛ. A do yi san nanala mɔɔ telennin ni mɔɔ telenbalilu yɛ.
[46] Ni wo tɛ, ni ài k'ài ɲiilu kanu dein, ài kɛtɔ balayi mindɛ sɔlɔnna wo lɔ? Hali nisɔɔnminabalu yi wo ɲɔɔn kɛla.
[47] Ni ài y'ài badenmalu le fola dein, wo yi ko ba le le? Hali Alalɔnbalilu yi wo ɲɔɔn kɛla.
[48] Ài yi dafa ko bɛ lɔ iwo ài Fa min yi haijɛnɛ, wo dafanin teme.»