Matiyu 13
[1] Wo lon kelen, Isa ka bɔ bon na ka taa i sii kɔɔ kawun na.
[2] Jama ba k'ai ladɛn mingɛ a laminin nɔ, a ka don kulun dɔ lɔ k'i sii. Ka jama to kawun na,
[3] a vɛ ko siyama fɔla ai yɛ sanalu lɔ, a vɛɛ: «Ài y'ài tolo malɔ. Sɛnɛkɛba dɔ ka bɔ ka taa malofalinya lɔ.
[4] K'a to malo falinna, a dɔlu ka ben siya dala. Kɔnɔnilu ka na wolu ta ta.
[5] Malo dɔlu ka ben fala kan, fulumuu walanin tɛ tɛɛ min ja. Malo wolu ka soi fɛlɛnna, kɛɛ ai lilen ma don duu kɔlɔ kosɛvɛ.
[6] Tele bɔnin gbolon gbalan, ai bululu ka ja, k'a masɔlɔn ai lilen ma don duu kɔlɔ kosɛvɛ.
[7] Malo dɔlu ka benben woninnu tɛma. Ai fɛlɛnnin, woninnu gbazan ka fɛlɛn ka malo lɔgbalin.
[8] Malo dɔlu gbazan ka ben duu kein nɔ. Wolu ka ɲia kosɛvɛ. A dɔlu k'ai den kɛmɛ kɛ, a dɔlu biwɔɔlɔ, a dɔlu bisawa.
[9] Tolo yi min kun, wo tii y'a tolo malɔ kuma wo la.»
[10] Wo kɛnin, kɔbiladennu k'ai madon Isa la k'a maɲininga, ai vɛɛ: «Mindɛ kɛnin i yi kumala mɔɔlu fɛ sanalu lɔ?»
[11] A vɛɛ ai yɛ: «Ala vɛ aa masaya gbonolu lɔnniya di ài ma, kɛɛ a ma wo di dɔlu ma.
[12] K'a masɔlɔn fen yi min bolo, a dɔ latɔ wo tii le ta kan ka a lawala. Kɛɛ fen tɛ min bolo, hali min ni y'a bolo, wo minatɔ a la.»
[13] Wo le y'a kɛla, ǹ'i kumala ai fɛ sanalu lɔ, k'a masɔlɔn ai y'ai ɲa kaana a lɔ, kɛɛ ai tɛ foi yena. Ai y'ai tolo malɔla a la, kɛɛ ai tɛ foi mɛnna, ai do tɛ foi ɲayena.
[14] Kela Aizaya na kuma min fɔla ka bɛn ai ma, wo ma vɛ fa, ko: ‹Ài kɛtɔ ài tolo malɔla a la kosɛvɛ, kɛɛ ài tɛnala foi ɲayena. Ani ài kɛtɔ ài ɲa kaana a lɔ, kɛɛ do ài tɛnala foi yena.
[15] k'a masɔlɔn bi mɔɔlu hangili vɛ gbeleya. Ai v'ai tolo datuun, k'ai ɲa masili, sa ai ɲa kana yeni kɛ, ai tolo kana mɛnni kɛ, ani ai joso kana ko ɲaye, kosa ai kana ai jɛlɛ lasei m̀ ma, sa ǹ ai lakisi.›»
[16] «Àilu kɔni yi duwawuden ne le, k'a masɔlɔn ài ɲa yi yeni kɛla, ani ài tolo yi mɛnni kɛla.
[17] Ǹ'i tuɲa fɔ ài yɛ, ài ɲa yi fen minnu yena, a lɔɔ tɛɛ kela ni Alaɲasiyanɲamɔɔ siyama la ka wolu ye, kɛɛ do ai ma ai ye. Ài tolo yi ko minnu mɛnna, a lɔɔ tɛɛ ai la ka wolu mɛn, kɛɛ ai ma a mɛn.»
[18] Isa vɛɛ: «Ài tolo malɔ, ǹ'i malofalinba ya sana kɔlɔ fɔla ài yɛ.
[19] Malo minnu bennin siya dala, wolu kɛnin ne iwo mɔɔ minnu yi Ala ya masaya ko mɛnna, ai do t'a ɲayena. Soɛtana yi nala wo le lɔ ka kuma wo bɔ ai josokun na.
[20] Malo minnu bennin fala kan, wolu kɛnin ne iwo mɔɔ minnu yi Ala ya kumakan mɛnna k'a mina telemanin k'ai kɔnɔ diya wo lɔ.
[21] Kɛɛ kuma wo lilen tɛ donna ka jaanfa ai josokun nɔ. A tɛ tola ai kɔnɔ. Gbeleya v'ai sɔlɔnna, ni wo tɛ mɔɔlu v'ai tɔlɔyala ka bɛn Ala ya kuma ma, ai yi siya bila telemanin.
[22] Malo minnu bennin woninnu tɛma, wolu kɛnin ne iwo mɔɔ minnu yi Ala ya kumakan mɛnna, kɛɛ dunuɲa ko le hamin yi donna ai josokun na. Nafolo lɔɔ y'ai minala ka Ala ya kumakan lɔgbalin ai josokun na. Kumakan wo tɛ foi ɲiala wo lɔ.
[23] Malo minnu bennin duu kein nɔ, wolu kɛnin ne iwo mɔɔ minnu yi Ala ya kumakan mɛnna k'a ɲaye. Kumakan wo yi donna ai josokun na ka kɛ iwo malo minnu yi ɲiala k'ai den kɛmɛ kɛ, ni wo tɛ biwɔɔlɔ, ni wo tɛ bisawa.»
[24] Isa ka sana gbɛlɛ la ai yɛ, a vɛɛ: «Ala y'aa masaya lankɛnɛmayala teme, wo kɛnin ne iwo kɛ́ min ka malo si falin aa sɛnɛ lɔ.
[25] Kɛɛ k'aa bɔlidennu to sunɔɔ lɔ, a juu ka na bin kolo falin malo tɛma, ka taa.
[26] Malo k'a tizan nabɔ mingɛ, mɔɔlu ka bin gbazan ye a lɔ.
[27] Bɔlidennu ka taa a fɔ sɛnɛtii yɛ, ai vɛɛ: ‹Kundii, i ma malo le falin ya sɛnɛ lɔ? Mindɛ kɛnin bin vɛ fɛlɛn a lɔ?›
[28] Sɛnɛtii vɛɛ: ‹Ǹ juu nɔ le.› Baaledennu do vɛɛ a yɛ: ‹I y'a fɛ m'i taa bin bɔn?›
[29] A vɛɛ: ‹Ɛnɛn, ài y'a to ten. Ni wo tɛ, ài vɛ kɛla bin bɔnna, ài kɛtɔ malo dɔlu gbazan bɔnna.
[30] Ài y'a bɛ to je. Ai yi wuli i ɲɔɔn fɛ fɔɔ malo kali waate vɛ sena. Wo waate, ǹ kɛtɔ a fɔla malo kalibalu yɛ, ǹ ko ai yi bin bɔn kunfɔlɔ le, k'ai lasili, k'ai ɲɛnin. Wo vɛ kɛla, ai yi malo kali k'a ladon ǹa bolon kɔnɔ.›»
[31] Isa ka sana gbɛlɛ la ai yɛ, a vɛɛ: «Ala y'aa masaya lankɛnɛmayala teme, wo kɛnin ne iwo biyaki kolo, kɛ́ dɔ ka min sɛnɛ aa gbele lɔ.
[32] Hali a dɔɔyanin ka timin sɛnɛfen kolo tɔ bɛ la, a vɛ fɛlɛnna k'i wuli, a buɲatɔ ka timin gbelelɔfen bɛ la. A kɛtɔ kɔlɔmanju le fɔɔ kɔnɔnilu yi se ai ɲaa lɔla a bololu la.»
[33] A ka sana gbɛlɛ la ai yɛ, a vɛɛ: «Ala y'aa masaya lankɛnɛmayala teme, wo kɛnin iwo bululafununsɛɛ, moso ka min ɲaami falinimuu siyama lɔ ka wo kɛ dɛɛ le. Bululafununsɛɛ wo ka dɛɛ bɛ lawuli ka a funun.»
[34] Isa ka wo bɛ fɔ mɔɔlu yɛ sana le lɔ. A ma ko ko fɔ ai yɛ ni a ma min fɔ sana lɔ.
[35] A k'a kɛ ten sa kuma min fɔnin kela bolo, wo ma yi fa, ko: «Ǹ kumatɔ sanalu le lɔ. Ko minnu doonnin k'a ta dunuɲa dan waate ma, ǹ kɛtɔ wolu le fɔla.»
[36] Wo kɔ, Isa ka bɔ jama fɛ ka taa don bon na. Aa kɔbiladennu k'ai madon a la k'a fɔ a yɛ, ai vɛɛ: «Bin min ka fɛlɛn sɛnɛ lɔ, i yi sana wo kɔlɔ fɔ mɔ yɛ.»
[37] Isa k'ai javi, a vɛɛ: «Mɔɔ min yi malo falinna, wo le yi Mɔɔnivin Tanin ne.
[38] Sɛnɛ wo yi dunuɲa le le. Malo wo yi Masaba ya mɔɔlu le le. Bin wo yi Soɛtana ya mɔɔlu le le.
[39] Juu min na bin kolo falinna sɛnɛ lɔ, wo le Soɛtana gbu le. Malo kali waate, wo yi dunuɲa laban ne le. Malo kaliba wolu yi mɛlɛkalu le le.
[40] Bin na yi dɛnna ka ɲɛnin taa lɔ teme, wo suu kɛtɔ dunuɲa laban waate.
[41] Ǹe Mɔɔnivin Tanin kɛtɔ ǹa mɛlɛkalu kelayala ka mɔɔlafiliba ni koyonkɛbalu ladɛn k'ai bɔ Masaba ya mɔɔlu tɛma,
[42] ka wolu lafili taa ba lɔ. Ai kasitɔ k'ai ɲin sii i ɲɔɔn na dimin bolo wo ja.
[43] Ai Fa v'aa masaya lankɛnɛmayala lon min, Alaɲasiyanɲamɔɔlu mɛnɛnmɛnɛntɔ gbesekele iwo tele. Tolo yi min kun, wo tii y'a tolo malɔ kuma wo la.»
[44] Isa vɛɛ kɔtunun: «Mɔɔ minnu v'ai fanmajiila Ala ya masaya kɔlɔ, wolu sawatɔ iwo kɛ́ min na nafolo doonnin yena sɛnɛ dɔ lɔ. A kɛtɔ a doonna kɔtunun ka taa sawa boloma, k'a bolofen bɛ fele, ka na sɛnɛ wo san.
[45] Mɔɔ minnu v'ai fanmajiila Ala ya masaya kɔlɔ, wolu kɛtɔ gbazan iwo juwa min yi lulu keinnu ɲininna.
[46] A vɛ lulu kulugbelen ba dɔ yena, a taatɔ a bolofen bɛ felela ka na a san.»
[47] Isa vɛɛ: «Ala v'aa masaya lankɛnɛmayala lon min na, wo kɛtɔ gbazan iwo jɔ, kɔɔsɔmɔɔnilu na min nafilila kɔɔ lɔ ka jɛɛ suu bɛ dɔ mina.
[48] A na fala mingɛ jɛɛ lɔ, ai na jɔ samana ka a labɔ kawun na. Wo kɛ, ai k'i sii ka jɛɛlu lɔtɔmɔntɔmɔn k'a keinyanilu bila nɛɛ lɔ k'a kɛwonnu lafila.
[49] Dunuɲa laban waate kɛtɔ ten ne. Mɛlɛkalu kɛtɔ mɔɔlu lɔtɔmɔntɔmɔnna ka mɔɔ bɛlɛlu bɔ mɔɔ yonnu tɛma,
[50] ka mɔɔ yonnu lafili taa ba lɔ. Ai kasitɔ k'ai ɲin sii i ɲɔɔn na dimin bolo je.»
[51] Isa k'aa kɔbiladennu maɲininga, a vɛɛ: «Ài na kuma min bɛ ɲayena?» Ai vɛɛ: «Aan, mɔ n'a ɲayena.»
[52] Wo kɛ, Isa vɛɛ ai yɛ: «Seliya kalanmɔɔ minnu vɛ kalan Ala ya masaya kolu la, wo bɛ kɛnin ne iwo lutii min yi fen kula ni fen kɔlɔ bɛ labɔla aa nafolo ladaloya lɔ.»
[53] Isa wɔlinin sana wolu lala, a ka bɔ wo ja ka taa a fɛso.
[54] A vɛ mɔɔlu kalanna aiya Aladalibon kɔnɔ. A lamɛnbalu ka kawakoya, ai vɛɛ: «Kɛ́ min na hangili min suu sɔlɔnna min ne, ani kawanako se?
[55] Jilisaba den ne tɛ ve? A ba le tɛ Moyamu le? A dɔɔkɛ le tɛ Janguba ni Jusufu ni Simɔn ni Jude le?
[56] A dɔɔmosolu bɛ tɛ mɔ fɛ le lɔ jan? A na hangili ni setiiya min sɔlɔnna min ne wo lɔ?»
[57] Wo le k'a kɛ, ai k'ai ban Isa lɔ. Isa vɛɛ ai yɛ wo lɔ: «Kela tɛ dɔɔyala dingila suu suu fɔ ale gbu fɛso, ani aa bonnamɔɔlu tɛma.»
[58] Isa ma kawanako siyama kɛ wo ja k'a bɛn je mɔɔlu ya limandeyabaliya ma.