Matiyu 6
[1] Isa ka to kumala, a vɛɛ: «Ài kà àiya diina kolu kɛ mɔɔlu ɲana, sa ai yi wolu kɛnin ye ài bolo. Ài vɛ wo kɛla, ài Fa min yi haijɛnɛ, wo tɛnala ài balayila feu.
[2] I vɛ bolokolon dɔ sɔla, i k'i waso a la iwo filangafolu y'a kɛla teme. Ai yi wolu le kɛla Aladalibon ni siya dalu la, sa mɔɔlu y'ai matɔɔ. Ǹ'i tuɲa fɔ ài yɛ, wolu vɛ ban ai balayi sɔlɔnna.
[3] Ni i ka bolokolon sɔ i bolokinin na, i bolonunma kà wo lɔn,
[4] kosa ya sɔli yi to doon nɔ. Wo do vɛ kɛla, i Fa Ala min yi ko doonnin bɛ yena, wo le kɛtɔ i balayila.»
[5] Isa ka to kumala, a vɛɛ: «Ài vɛ kɛla Ala dalila, ài kà a kɛ iwo filangafolu y'a kɛla teme. A diyanin ai yɛ k'ai lɔ Aladalibon ni siya dalu la ka Aladali kɛ, sa mɔɔlu y'ai ye. Ǹ'i tuɲa fɔ ài yɛ, wolu vɛ ban ai balayi sɔlɔnna.
[6] Ni i ka kɛ Ala dalila, i don i sibon na ka da latuun i jɛlɛ ma. I i Fa Ala dali je, k'a masɔlɔn a yi dingila doonnin wo lɔ. Min yi kɛla doon nɔ, i Fa Ala yi wo yena, a do kɛtɔ i balayila.
[7] Ài vɛ kɛla Ala dalila, ài kà kuma fuun siyama fɔ iwo Alalɔnbalilu y'a kɛla teme. A yi wolu kɔnɔ ko Ala kɛtɔ aiya madaili minala aiya kuma siyama le fɛ.
[8] Ài kà kɛ wolu ɲɔɔzii le, k'a masɔlɔn ài mako yi fen fen na, ài Fa Ala ka wo lɔn jani ài y'a madali.
[9] Ài ka kan ka Ala dali teme, wo le ne. Mɔ Fa min yi haijɛnɛ, i tɔɔ yi buɲa mɔɔlu bolo.
[10] Iya masaya lankɛnɛmaya. I sawo yi kɛ duukolo kan, iwo a yi haijɛnɛ teme.
[11] I yi maa balo sɔniya lon lon.
[12] I yi mɔ hakɛlu lɔkoto, iwo ǹu gbazan vɛ mɔ hakɛtabalu makoto teme.
[13] I kà a to mɔ ma yi nɛɛn ka bila koyon nɔ, kɛɛ mɔ mantanga ka bɔ Soɛtana bolo.
[14] Ni ài k'ài hakɛtabalu makoto, ài Fa min yi haijɛnɛ, wo kɛtɔ ài makotola.
[15] Ni do ài ma ài hakɛtabalu makoto, ài Fa Ala gbazan tɛnala ài hakɛlu lɔkotola.»
[16] Isa ka to kumala, a vɛɛ: «I vɛ sun donna lon min, i k'i ɲakɔlɔ sili iwo filangafolu y'a kɛla teme. Wolu y'ai ɲakɔlɔ silila sa mɔɔlu y'a lɔn ai yi sun nɔ. Ǹ'i tuɲa fɔ ài yɛ, ai vɛ ban ai balayi sɔlɔnna.
[17] I vɛ sun donna, i ɲa lako ka tulu sisa i kun na,
[18] sa mɔɔlu kana a lɔn i yi sun nɔ. Kɛɛ i Fa Ala min doonnin, wo kɛtɔ a lɔnna. Min yi kɛla doon nɔ, i Fa Ala yi wo yena, a do kɛtɔ i balayila.»
[19] Isa ka to kumala, a vɛɛ: «Ài kà nafolo ladɛn ài jɛlɛ yɛ dunuɲa min nɔ jan, baabaa ni soon yi tiɲali kɛla tɛɛ min ja. Son gbazan yi se da kalila tɛɛ min ja ka suɲali kɛ.
[20] Mafɔ ài yi nafolo ladɛn ài jɛlɛ yɛ haijɛnɛ le, bao baabaa ni soon tɛ se tiɲali kɛla wo ja. Son gbazan tɛ se da kalila ka suɲali kɛ je.
[21] K'a masɔlɔn ya nafolo ladalonin tɛɛ min ja, i hangili gbazan yi wo le ja.»
[22] Isa ka to kumala, a vɛɛ: «Mɔɔ ɲaden kɛnin ne a falikolo lɔ iwo fitina. Ni i ɲaden kɛnɛyanin, kɛlɛya yi donne i falikolo fan bɛ lɔ.
[23] Ni do i ɲaden kɛnɛyanin tɛ, i fali fan bɛ kɛtɔ divi le lɔ. Wo lɔ, kɛnɛya min ka kan ka sɔlɔn i lɔ, ni kɛnɛya wo vɛ kɛla divi le, divi wo fintɔ mainmain!»
[24] Isa ka to kumala, a vɛɛ: «Jɔn tɛ se baale kɛla jɔnfa fila yɛ waate kelen nɔ. Ni jɔnfa ka kɛ fila le, jɔn kɛtɔ a dɔ lagbeyaɲɛla k'a dɔ kanu. A do fasatɔ a dɔ ma, k'i ban a dɔ lɔ. Wo lɔ, ài tɛ se kɛla Ala ya jɔn ne, ka kɛ wɔli gbazan ya jɔn ne.»
[25] Isa ka to kumala, a vɛɛ: «Wo le y'a kɛla, ǹ a fɔla ài yɛ, ǹ ko ài kà hamin àiya dɔnnifen ko le, ni wo tɛ àiya minnifen ko le, ni wo tɛ àiya feleyabɔ ko le. Àiya nimaya kulu ma gbeleya dɔnnifen ko le? Ài fali ya ko kulu ma gbeleya feleyabɔ ko le?
[26] Ài y'ài mili kɔnɔnilu ma, minnu y'i ndiinna sanma. Ai tɛ sɛnɛ kɛla, ai do tɛ sɛnɛfen kalila. Ai tɛ malo ladonna bolon kɔnɔ. Kɛɛ do ài Fa min yi haijɛnɛ, wo y'ai balola. A yi di? Àilu kulu gbeleyanin tɛ wolu le?
[27] Jene y'ài tɛma, min yi se tele kelen kafonna a si kan ka bɛn aa hamin ma?
[28] Mindɛ lɔ ài yi haminna àiya feleyabɔ ko lɔ? Ài y'ài mili tuukɔlɔbinnu ma, ai yi fɛlɛnna ɲa min ma. Ai tɛ baale kɛla, ai do tɛ feleyabɔ ladanna.
[29] Kɛɛ ǹ a fɔ ài yɛ, hali nabi Sulimana ni a banaya, wo ma faani suu suu don min keinyanin ka se bin fele wo dɔ lɔ.
[30] Bin minnu yi tuu kɔlɔ bi, wolu ɲɛnintɔ taa la sinin. Wo bɛ n'a kɛ, Ala yi feelelu bilala ai ma, minnu kɛnin iwo aiya feleyabɔ. Àilu minnu ya limandeya dɔɔyanin, sika t'a lɔ, ni Ala yi wo kɛla binnu yɛ, a kɛtɔ feleyabɔ dila àilu gbazan ma.
[31] Wo lɔ, ài kà hamin k'a fɔ ko: ‹Mɔ kɛtɔ mindɛ dɔnna, mɔ kɛtɔ mindɛ minna, mɔ kɛtɔ feleyabɔ sɔlɔnna di?›
[32] Alalɔnbalilu le yi haminna ko wolu le la. Ài Fa min yi haijɛnɛ, wo k'a lɔn ài mako yi fen wo bɛ la.
[33] Àiya ko kunfɔlɔ yi kɛ fanmajii le Ala ya masaya kɔlɔ, ani k'aa siya telenninnu taama. Wo vɛ kɛla, wo bɛ yi dile ài ma.
[34] Ài kà hamin sinin kolu la. Ài yi sinin kolu to sinin yɛ. Mɔɔ yi ɲangba min sɔlɔnna tele kelen kɔlɔ, wo vɛ wo ta bɔ.»