Matiyu 19
[1] Isa wɔlinin wo fɔla, a ka bɔ Galile ka taa Jude fan dɔ lɔ min yi Jɔdan kɔɔ kɔma.
[2] Jama ba ka bila a kɔ, a do ka wolu lakɛnɛya je.
[3] Wo kɛ, Falisi dɔlu ka na Isa maɲininga a lɔsuman ko lɔ, ai vɛɛ: «A ladaannin ne kɛ́ y'a moso bila ko bɛ lɔ?»
[4] Isa k'ai javi, a vɛɛ: «Min sɛvɛnin kitabu kɔnɔ, ài ma wo kalan? A sɛvɛnin ko dunuɲa dan waate lɔ, Danniba na kɛ́ ni moso le danna.
[5] Ala vɛɛ: ‹Wo le y'a kɛla, kɛ́ yi bɔla a fa ni a ba fɛ, ka a ni a moso dɛn, sa ai mɔɔ fila yi kɛ fali kelen ne.›
[6] Ai tɛ jatela mɔɔ fila la butu fɔ fali kelen. Wo lɔ, Ala na minnu ladɛnna k'ai kɛ kelen ne, mɔɔ suu suu kà wolu falan i ɲɔɔn ma.»
[7] Falisilu vɛɛ Isa yɛ kɔtunun: «Ni wo le, kela Musa na jamali dila mindɛ lɔ ko kɛ́ yi fulusasɛvɛ di a moso ma jani a a bila?»
[8] Isa k'ai javi, a vɛɛ: «Kela Musa na diɲala ko ài y'ài mosolu bila ka bɛn àiya kunnɔgbeleya le ma. Ni wo tɛ, a damina lɔ a tɛɛ tɛ ten.
[9] Kɛɛ ǹ a fɔ ài yɛ, ǹ ko ni mɔɔ min ka a moso bila ka moso gbɛlɛ ta, k'a talan a moso kunfɔlɔ wo tɛɛ ma jalɔnya kɛ, wo tii vɛ jalɔnya kɛ.»
[10] Isa ya kɔbiladennu vɛɛ a yɛ: «Ɛɛ! Ni a yi ten ne kɛ́ ni a moso wotɛ, fulubaliya fisayanin wo lɔ dɛ.»
[11] Isa k'ai javi, a vɛɛ: «Mɔɔ bɛ tɛ se diɲala kuma wo ma, fɔ Ala na a se dila minnu ma.
[12] Sabu siyama le yi mɔɔlu bilala fulubaliya lɔ: dɔlu sɔlɔnnin ten ne, dɔlu gbazan ta yi adamadennu nɔ le, dɔlu tɛ moso fulula sa ai yi baale kɛ Masaba yɛ aiya ko bɛ lɔ. Ni mɔɔ min yi se diɲala min ma, wo tii yi diɲa a ma.»
[13] Wo kɔ, mɔɔ dɔlu vɛ nala dennilu le Isa fɛ, sa a a bolo la ai kan ka duwawu kɛ ai yɛ. Kɛɛ kɔbiladennu ka mɔɔ wolu makuma.
[14] Isa do vɛɛ ai yɛ: «Ài y'a to dennilu yi na m̀ ma. Ài kà ai dansii, k'a masɔlɔn mɔɔ minnu kɛnin iwo dennilu, wolu yi Ala ya masaya le kɔlɔ.»
[15] Wo fɔ, a ka a bolo la dennilu kan, ka duwawu kɛ ai yɛ, ka ban ka bɔ je.
[16] Lon dɔ, kɛ́ dɔ ka na ka Isa maɲininga, a vɛɛ: «Kalanmɔɔ, ǹ ka kan ka koɲuma mindɛ le kɛ, sa ǹ'i nimaya banbali sɔlɔn?»
[17] Isa vɛɛ a yɛ: «Mindɛ kɛnin i yi m̀ maɲiningala ɲumaya ko ma? Ala kelenpesa le ɲumayanin. Ni i y'a fɛ ka nimaya banbali sɔlɔn, i yi Ala ya seliyalu labato.»
[18] Kɛ́ vɛɛ: «Seliya mindɛ?» Isa k'a javi, a vɛɛ: «I kà mɔɔ faa, i kà jalɔnya kɛ, i kà suɲali kɛ, i kà kɛ faɲafɔsele le,
[19] i i fa ni i ba buɲa, ani i i siiɲɔɔmalu kanu iwo ile gbu.»
[20] Kavelen vɛɛ a yɛ: «M̀'ɛ seliya wo bɛ labato. Kɛɛ ǹ dɛsɛnin mindɛ la bene?»
[21] Isa k'a javi, a vɛɛ: «Ni i y'a fɛ ya ko bɛ da yi fa, i yi taa i bolofennu fele ka a wɔli lɔtala bolokolonnu wotɛ. Wo vɛ kɛla, nafolo ba kɛtɔ i bolo haijɛnɛ. Wo kɔ, i yi na i yi bila ǹ kɔ.»
[22] Kavelen ka kuma wo mɛn mingɛ, a ninnafinnin v'i wulila ka taa, k'a masɔlɔn a bolofen walanin tɛɛ bubale.
[23] Wo kɛnin, Isa vɛɛ aa kɔbiladennu yɛ: «Ǹ'i tuɲa fɔ ài yɛ, a gbeleyanin k'a fɔ nafolotii yi don Ala ya masaya kɔlɔ!
[24] Ǹ a fɔ ài yɛ kɔtunun, ǹ ko ka ɲɔɔmɛ don sɛɛlan woo la, wo nɔɔyanin ne danin nafolotii yi don Ala ya masaya kɔlɔ.»
[25] Kɔbiladennu ka wo mɛn k'ai kawakoya kosɛvɛ, ai vɛɛ: «Jene yi se kisila wo lɔ?»
[26] Isa v'i ɲa kaana ai lɔ k'a fɔ ai yɛ, a vɛɛ: «Mɔɔ tɛ se wo kɛla, kɛɛ Ala yi sene ko bɛ kɛla.»
[27] Wo kɛ, Piɛl vɛɛ Isa yɛ: «Ǹu do? Mɔ vɛ fen bɛ to je ka bila i kɔ. Mɔ kɛtɔ mindɛ sɔlɔnna wo lɔ?»
[28] Isa vɛɛ a yɛ: «Ǹ'i tuɲa fɔ i yɛ, dunuɲa vɛ kɛla dunuɲa kula le, ǹe Mɔɔnivin Tanin siitɔ ǹa masayasiifen nɔ. Àilu minnu vɛ bila ǹ kɔ, àilu gbazan siitɔ masayasiifen tan ni fila lɔ ka Isilanmɔɔlu ya kabila tan ni fila ya kiti tɛɛ.
[29] Ni mɔɔ min ka aa bon to a kɔ, ni wo tɛ a badenmalu, ni wo tɛ a ba, ni wo tɛ a fa, ni wo tɛ a dennu, ani aa sɛnɛlu ka bɛn ǹa ko ma, wo vɛ kɛla wo tii kɛtɔ wo ɲɔɔn kɛmɛ sɔlɔnna dunuɲa min nɔ jan. A kɛtɔ nimaya banbali gbazan sɔlɔnna.
[30] Kɛɛ ɲamɔɔ siyama kɛtɔ kɔmɔɔ le le. Kɔmɔɔ siyama gbazan kɛtɔ ɲamɔɔ le le.»