Жьмар 9
[1] Мәһа йәкейә сала дӧда пәй дәрк'әтьна жь ә'рде Мьсьре, Хӧдан ль бәр'ийа Синайеда Мусар'а хәбәрда у гот:
[2] «Бьра зар'ед Исраел Щәжьна Дәрбазбуне wә'де wеда бькьн.
[3] Ль бәре еваре р'ожа чардәһе ве мәһе wә'де wеда, анәгори һ'әму qәйдә-qанун у qьраред wе, бькьн».
[4] Муса зар'ед Исраелр'а хәбәрда кӧ Щәжьна Дәрбазбуне бькьн.
[5] Wана Щәжьна Дәрбазбуне ль бәре еваре р'ожа чардәһе мәһа йәке ль бәр'ийа Синайеда кьрьн. Анәгори һ'әму чь кӧ Хӧдан ә'мьр ль Муса кьрьбу, зар'ед Исраел ӧса жи кьрьн.
[6] Һәбун мәри кӧ дәст дабунә щьнйаз у нәпаqьж бун у нькарьбун Щәжьна Дәрбазбуне wе р'оже бькьрана. Әw wе р'оже незики Муса у Һарун бун
[7] у wан мәрьва готьнә Муса: «Әмә нә паqьж ьн чьмки мә дәст дайә щьнйаз, чьма әм гәрә хwә жь wе йәке бьгьрьн кӧ дийарийа Хӧдан wә'де wеда т'әви зар'ед Исраел нәдьн?»
[8] Муса готә wан: «Һәла бьсәкьньн, әз бьзаньбьм к'а Хӧдане бона wә чь ә'мьр кә».
[9] Хӧдан Мусар'а хәбәрда у гот:
[10] «Т'әви зар'ед Исраел хәбәр дә у бежә: ‹Һәгәр йәк жь wә йан жь зӧр'әта wә р'ийа дурда бә йан нәпаqьж бә чьмки дәст дайә щьнйаз, әw жи бьра Щәжьна Дәрбазбуне Хӧданр'а бькә,
[11] ле бьра бәре еваре р'ожа чардәһе мәһа дӧда wе бькә. Бьра бь нане шкәва у п'ьнщар'а тә'л Щәжьна Дәрбазбуне бьхwә,
[12] жь wе һ'әта сьбәһе нәһелә, нә жи һәстуйед wе бьшкенә. Бьра анәгори һ'әму qәйдә-qанунед Щәжьна Дәрбазбуне бькә.
[13] Һәгәр мәрьв паqьж бә у ль р'еwитийе нибә ле Щәжьна Дәрбазбуне нәкә әw нәфса гәрә жь нава мьләте хwә бе бьр'ине, чьмки дийарийа Хӧдан wә'де wеда нә дайә, әw мәрьве гәрәке гӧне хwә бьк'ьшинә.
[14] Һәгәр нава wәда хәрибәк бьжи у әw бьхwазә Щәжьна Дәрбазбуне Хӧданр'а бькә, бьра анәгори qәйдә-qануне Щәжьна Дәрбазбуне у qьрара wе бькә. Qәйдә-qанун бона wә, бона хәриб у бона бьналийе wи ә'рди гәрә йәк бә›».
[15] Ль р'ожа сәкьнандьна Пирозгәһе ә'wр Пирозгәһ аwа готи Коне Щьвине ньхамтьбу у еварда һ'әта сьбәһе әw мина агьр ль сәр Пирозгәһе бу.
[16] Һәр гав ӧса бу: Р'оже ә'wр әw дьньхамт, шәве жи әw мина агьр бу.
[17] Һәр щар гава ә'wр жь сәр кон р'адьбу һьнге зар'ед Исраел р'е дьк'әтьн у ль wи щийе кӧ ә'wр датини ль wьр зар'ед Исраел зомед хwә ле дьдан.
[18] Бь готьна Хӧдан зар'ед Исраел р'е дьк'әтьн у бь готьна Хӧдан зомед хwә ле дьдан, һ'әму р'ожед кӧ ә'wр данийа ль сәр Пирозгәһе әw ль wьр дьман.
[19] Гава ә'wр дьреж ль сәр Пирозгәһе бьма зар'ед Исраел гӧһ дьданә нишана Хӧдан у р'е нәдьк'әтьн.
[20] Дьбу wәки ә'wр чәнд р'ожа ль сәр Пирозгәһе дьма. Бь готьна Хӧдан wана зомед хwә ле дьдан у бь готьна Хӧдан әw р'е дьк'әтьн.
[21] Дьбу wәки ә'wр жь еваре һ'әта сьбәһе дьма у сьбәһе кӧ ә'wр бьльнд дьбу әw р'е дьк'әтьн. Р'ож буйа йан шәв, гава ә'wр бьльнд буйа әw жи р'е дьк'әтьн.
[22] Һәгәр дӧ р'ожа, йан мәһәке, йан саләке ә'wр ль сәр Пирозгәһе бьма, зар'ед Исраел жи ль wьр дьман у р'е нәдьк'әтьн. Ле к'әнге ә'wр р'абуйа, әw һьнге р'е дьк'әтьн.
[23] Бь готьна Хӧдан зомед хwә ле дьдан у бь готьна Хӧдан р'е дьк'әтьн. Готьна Хӧданә бь дәсте Муса хwәйи дькьрьн.