<Жьмар 17

[1] Хӧдан Мусар'а хәбәрда у гот:

[2] «Т'әви зар'ед Исраел хәбәр дә у жь һәр qәбиләкә wан, шьвдарәке жь һәр сәрwерәки qәбилед wан һьлдә, аwа готи донздәһ шьвдара. Наве һәр кәси ль сәр шьвдара wи бьньвисә.

[3] Наве Һарун ль сәр шьвдара Леwи бьньвисә, чьмки гәрәке бона һәр бавә'ширәки qәбиләкә wан шьвдарәк бә.

[4] У wан дайнә пешбәри Сьндоqа Шә'дәтийе ль Коне Щьвинеда, к'идәре әз wәва хӧйа дьбьм.

[5] Wе бьбә әw мәрьве кӧ әзе бьбьжерьм, шьвдара wи wе гӧл дә. Бь ви аwайи әзе wе бинтәнгийа зар'ед Исраел бәр хwә бьдьмә бьр'ине, бь к'ижане әw бина хwә ль wә тәнг дькьн».

[6] Муса т'әви зар'ед Исраел хәбәрда у һ'әму сәрwеред wан шьвдар данә wи, шьвдарәк жь һәр сәрwери анәгори qәбилед wан, аwа готи донздәһ шьвдар. Шьвдара Һарун жи нава шьвдаред wанда бу.

[7] Муса шьвдар данинә ль бәр Хӧдан ль Коне Щьвинеда.

[8] Р'ожтьра дьне гава Муса һатә Коне Шә'дәтийе, ва йә шьвдара Һарунә жь мала Леwи гӧл дайә. Ч'ә'в бьшкьфти нә, гӧл дайә у бәһив дайә.

[9] Муса һ'әму шьвдар жь бәр Хӧдан дәрхьстьнә ль бәр һ'әму зар'ед Исраел. Wана ньһер'ин у һәр кәси шьвдара хwә һьлда.

[10] Хӧдан готә Муса: «Диса шьвдара Һарун дайнә ль бәр Сьндоqа Шә'дәтийе бона хwәйикьрьне, чаwа нишан бона зар'ед р'абәрик'ар, бь ви аwайи бинтәнгийа wане ль бәр мьн бьсәqьр'ә у әwе нәмьрьн».

[11] Чаwа кӧ Хӧдан ә'мьр кьр Муса ӧса жи кьр.

[12] Зар'ед Исраел Мусар'а хәбәрдан у готьн: «Ва йә әм дьмьрьн! Qьр'а мә те! Әм һ'әму ӧнда дьбьн!

[13] Һәр кәсе кӧ незики Пирозгәһа Хӧдан бә wе бьмьрә. Гәло qьр'а мә һ'әмуйа wе нәйе?»