<Жьмар 23

[1] Бьлам готә Балаq: «Мьнр'а ль вьр һ'әфт горигәһа чекә, һ'әфт щанәга у һ'әфт бәрана ль вьр мьнр'а һазьр кә».

[2] Балаq анәгори готьна Бьлам кьр. Балаq у Бьлам ль сәр һәр горигәһе щанәгак у бәранәк дан.

[3] Бьлам готә Балаq: «Тӧ бәр т'әвайишәwате хwә бә, әзе һәр'ьм, бәлки Хӧдан мьнва хӧйа бә у чь кӧ әw мьнва ә'йан кә әзе тәр'а бежьм кьм». У әw чу сәре т'апәки хьки-хwәли.

[4] Хwәде Бьламва хӧйа бу у Бьлам готә wи: «Мьн һ'әфт горигәһ чекьрьнә, щанәгак у бәранәк ль сәр һәр горигәһе дайә».

[5] Хӧдан хәбәр дани ль сәр заре Бьлам готе: «Вәгәр'ә ль щәм Балаq һа беже».

[6] Әw вәгәр'ийа ль щәм Балаq, ва йә, әw т'әви һ'әму wәк'илед Моwабе ль бәр т'әвайишәwате хwә сәкьнийә.

[7] Бьлам мәсәла хwә пешда ани у гот: «Балаq әз жь Араме аним, п'адше Моwабе әз жь ч'ийайед р'оһьлате: ‹Wәрә мьнр'а ньфьр'а ль Аqуб бькә, wәрә ль Исраел һьле!›

[8] Әзе чаwа ньфьр'а ле бькьм, wәки Хwәде ньфьр' ле нәкьр? Әзе чаwа ле һьлем, wәки Хӧдан ле һьлнәһат?

[9] Чьмки әз жь сәр сәре qәйева дьбиньм, жь сәр гьрава әз wи дьньһер'ьм, ва йә, мьләтәк башqә дьжи, у мьнәте т'ӧ мьләти нагьрә.

[10] К'е дькарә т'оза Аqуб һ'әсаб кә, йан аха Исраел бьжмьрә? Хwәзи нәфса мьн бь мьрьна р'аста бьмьрә, хwәзи ахьрийа мьн мина йа wан бә!»

[11] Балаq готә Бьлам: «Тә чь ани сәре мьн? Мьн тӧ дәрхьсти ль вьр кӧ ньфьр'а ль дьжмьнед мьн бьки, ле тӧ бьмбарәк дьки!»

[12] Бьлам щаба wи да у гот: «Чь кӧ Хӧдан датинә ль сәр заре мьн әз гәрә т'әне wе бежьм!»

[13] Балаq готә wи: «Жь к'әрәма хwә т'әви мьн wәрә щики дьн, те wи жь wьр бьбини. Те т'әне п'арәкә wи бьбини ле т'әмамийа wи те нәбини, жь wьр те мьнр'а ньфьр'а ле бьки».

[14] У Балаq әw бьрә ль дәшта Софиме ль сәр сәре Писгайе у һ'әфт горигәһ чекьрьн. Щанәгак у бәранәк ль сәр һәр горигәһе да.

[15] Әwи готә Балаq: «Ль вьр бәр т'әвайишәwате хwә бьсәкьнә әзе жи ль wьр р'асти Хӧдан бем».

[16] Хӧдан Бьламва хӧйа бу у хәбәр дани ль сәр заре wи готе: «Вәгәр'ә ль щәм Балаq һа беже».

[17] Бьлам һатә ль щәм Балаq, ва йә, әw т'әви wәк'илед Моwаб ль бәр т'әвайишәwате хwә сәкьнийә. Балаq готә wи: «Хӧдан чь гот?»

[18] Бьлам мәсәла хwә пешда ани у гот: «Р'абә Балаq у бьбьһе, гӧһ бьдә мьн кӧр'е Сипор!

[19] Хwәде нә инсан ә кӧ дәрәwа бькә, нә жи бәни Адәм ә кӧ п'ошман бә. Әwи гот wе нәкә? Хәбәр да wе нәйнә сери?

[20] Ва йә, мьн ә'мьр станд кӧ бьмбарәк кьм. Хwәде бьмбарәк кьр әз нькарьм бьгӧһезьм.

[21] Нәһәqи ль нава Аqубда нә дитийә, хәм ль нава Исраелда к'ьфш нәкьрийә. Хӧдан Хwәдейе wи т'әви wи йә, шабуна бона п'адше нава wи йә.

[22] Хwәде әw жь Мьсьре дәрхьстьн. Qәwата wан мина qәwата гайе бәйани йә.

[23] Сербази ль нава Аqубда т'ӧнәйә, к'оч'әкти ль нава Исраелда т'ӧнәйә. Ньһа wе бежьнә Аqуб у Исраел: «Кӧ Хwәде чь кьр».

[24] Аwа мьләт чаwа макәшер р'адьбә у чаwа шер банздьдә, п'ал надә һ'әта т'ален нәхwә у хуна йед кӧшти вәнәхwә.

[25] Балаq готә Бьлам: «Нә ньфьр'а ль wи бькә, нә жи wи бьмбарәк кә!»

[26] Бьлам щаба Балаq да у гот: «Мьн әва йәка нә готә тә: wәки чь кӧ Хӧдан бежә мьн әзе wе бькьм?»

[27] Балаq готә Бьлам: «Жь к'әрәма хwә wәрә әзе тә бьбьмә щики дьн, бәлки әwе ль Хwәде хwәш бе у те жь wьр бона мьн ньфьр'а ль Исраел бьки.

[28] У Балаq Бьлам бьрә ль сәр сәре П'ьһоре, жь к'идәре бәр'и дьһатә к'ьфше.

[29] Бьлам готә Балаq: «Мьнр'а ль вьр һ'әфт горигәһа чекә, һ'әфт щанәга у һ'әфт бәрана ль вьр мьнр'а һазьр кә».

[30] Балаq анәгори хәбәра Бьлам кьр, щанәгак у бәранәк ль сәр һәр горигәһе да.