<Жьмар 27

[1] Qизед Сьлофһ'аде Һ'ефәре кӧр'е Гилә'де Махире кӧр'е Мьнашәйе жь малбәта Мьнашәйе кӧр'е Усьв һатьн. Әв бун навед wан: Маһ'ла, Ноһа, Һ'огла, Милк'а у Т'ирса.

[2] Әвана ль бәр Муса, Елазаре к'аһин, сәрwера у тәмамийа щьвине ль бәр дәре Коне Щьвине сәкьнин у готьн:

[3] «Баве мә бәр'ийеда мьр, ле әw нә нава wе к'омеда бу, к'ижан кӧ мьqабьли Хӧдан щьвийа бун, аwа готи щьвина Qорах. Ле бона гӧне хwә мьр у кӧр'ед wи т'ӧнәбун.

[4] Чьма наве баве мә жь нава малбәта wи гәрә бе һьлдане, wәки кӧр'ед wи т'ӧнәнә? Жь нава бьрайед баве мә, мьлк' бьдә мә».

[5] Муса шьхӧле wан дани ль бәр Хӧдан.

[6] Хӧдан Мусар'а хәбәрда у гот:

[7] «Qизед Сьлофһ'ад р'аст дьбежьн. Мьлк' бьдә wан жь нава бьрайед баве wанда кӧ wар бьн, аwа готи wаре баве wан дәрбази сәр wан кә.

[8] У зар'ед Исраелр'а хәбәр дә, бежә: ‹Гава йәк бьмьрә у кӧр'е wи т'ӧнә бә, һьнге wаре wи бьра дәрбази qиза wи бә.

[9] Ле һәгәр qиз жи т'ӧнә, һьнге wаре wи бьдьнә бьрайед wи.

[10] Ле һәгәр бьра жи т'ӧнәнә, һьнге wаре wи бьдьнә апед wи.

[11] Ле һәгәр ап жи т'ӧнәнә, һьнге wаре wи бьдьнә пьсмаме wийи незик жь малбәта wи кӧ әw ле wар бә. Бьра әв бона зар'ед Исраел бьбә qәйдә-qануна һәqийе, чаwа кӧ Хӧдан ә'мьри Муса кьр›».

[12] Хӧдан готә Муса: «Һьлк'ьшә ль сәр ви ч'ийайе һани жь ч'ийа-банийед Абарим у дина хwә бьдә wи ә'рде кӧ әзе бьдьмә зар'ед Исраел.

[13] У гава wи бьбини, һьнге те жи һәр'и бьгьһижи щьмә'та хwә, мина Һаруне бьре хwә.

[14] Чьмки wә бәр'ийа Синеда гӧһдарийа мьн нәкьр, дәма qалмә-qалма щьвине, сәр аве wә пирозийа мьн ль бәр ч'ә'вед wан нә да к'ьфше». (Әва авед Мерибаһе нә ль Qадеше бәр'ийа Синда).

[15] Муса Хӧданр'а хәбәрда у гот:

[16] «Бьра Хӧдан Хwәдейе р'ӧһ'е һәр бәдәни ль сәр ве щьвинер'а мәрьвәки к'ьфш кә,

[17] wәки р'ебәрийе wан бькә у ч'ә'ве wи сәр к'әтьн у дәрк'әтьна wан бә, кӧ щьвина Хӧдан нәбә мина пәзе бе шьван».

[18] Хӧдан готә Муса: «Хwәр'а Йешуйе кӧр'е Нун, мәрьве кӧ Р'ӧһ'е мьн теда йә, һьлдә. Дәсте хwә дайнә ль сәр wи,

[19] wи ль бәр Елазаре к'аһин у ль бәр т'әмамийа щьвине бьдә сәкьнандьн у ль бәр ч'ә'вед wан wи к'ьфш кә.

[20] Жь сәрwерийа хwә бьдә wи кӧ т'әмамийа щьвина зар'ед Исраел гӧһ бьдә wи.

[21] Әw гәрә ль бәр Елазаре к'аһин бьсәкьнә. Елазаре бона wи qьрара Урим ль бәр Хӧдан бьпьрсә. Анәгори wе qьраре әw гәрә дәрк'әвьн у анәгори wе әw гәрә бен, әw у т'әмамийа зар'ед Исраел аwа готи т'әмамийа щьвине».

[22] У Чаwа кӧ Хӧдан ә'мьр ль Муса кьрьбу, әwи ӧса жи кьр. Әwи Йешу һьлда у әw ль бәр Елазаре к'аһин у т'әмамийа щьвине да сәкьнандьне.

[23] Муса дәстед хwә данинә ль сәр wи у әw к'ьфш кьр, чаwа кӧ Хӧдан пе Муса готьбу.