Жьмар 10
[1] Хӧдан Мусар'а хәбәрда у гот:
[2] «Хwәр'а дӧ бор'ийед зивинә к'оланди чекә, әwе тәр'а бьбьн бона газикьрьна щьвине у бона р'ек'әтьна зома.
[3] Гава дьреж wан һәр дӧ бор'ийа хьн т'әмамийа щьвине wе бьщьвә ль щәм тә ль бәр дәре Коне Щьвине.
[4] Ле гава жь wан йәке хьн, сәрwер, аwа готи сәрәкед ә'лаләтед Исраел wе бьщьвьнә ль щәм тә.
[5] Ле һәгәр һун кьн лехьн һьнге зомед алийе р'оһьлате ледайи р'е к'әвьн.
[6] Ле гава щара дӧда кьн лехьн һьнге зомед алийе башуре р'е к'әвьн. Әв ледана кьн бона р'е к'әтьна wан ә.
[7] Бона щьвандьна щьвине дьреж ледьн, нә кьн.
[8] Зар'ед Һарунә к'аһин wе бор'ийа хьн, әве wәр'а бьбә qәйдә-qануна һ'әта-һ'әтайе ль нава зӧр'әтед wәда.
[9] Гава һун ль нава ә'рде хwәда һәр'ьнә шер' мьqабьли дьжмьне кӧ wәр'а дьжмьнатийе дькә, һьнге кьн бор'ийа хьн, һуне ль бәр Хӧдан Хwәдейе хwә бенә биранине у жь дьжмьнед хwә бенә хьлазкьрьне.
[10] Ӧса жи р'ожа шабуна хwәда, щәжьнед хwәйә к'ьфшкьрида у дәстпебуна мәһед хwәда бор'ийа хьн, wәхте т'әвайишәwатед хwә у дийарийед хwәйә һәләqәтийе жи. Әве wәр'а бьбә чаwа биранин ль бәр Хwәдейе wә. Әз Хӧдан Хwәдейе wә мә».
[11] Бисте мәһа дӧдайә сала дӧда ә'wр жь сәр Пирозгәһа Шә'дәтийе бьльнд бу
[12] һьнге зар'ед Исраел жь бәр'ийа Синайе р'ек'әтьн чун у ль бәр'ийа Паране ә'wр дани.
[13] Әв щара пешийе бу кӧ әw ль гора готьна Хӧдан бь дәсте Муса р'ек'әтьн,
[14] у ала зома зар'ед Щьһуда анәгори ордийед хwә пешийе чу. Сәрwере ордийа wи Нәһшоне кӧр'е Аминадав бу.
[15] Сәрwере ордийа qәбила зар'ед Исахар Ньт'анеле кӧр'е Суһар бу.
[16] Сәрwере ордийа qәбила зар'ед Зәбулон Әлйабе кӧр'е Һ'елон бу.
[17] Ле гава Пирозгәһ дьһатә һәвдане һьнге зар'ед Гершон у зар'ед Мерари дьчун у Пирозгәһ дьбьрьн.
[18] Пәйр'а ала зома Р'убен анәгори ордийед хwә дьчу у Әлисуре кӧр'е Шьдейур сәрwере ордийа wи бу.
[19] Сәрwере ордийа qәбила зар'ед Шьмһ'ун Шьлумийеле кӧр'е Суришадай бу.
[20] Сәрwере ордийа qәбила зар'ед Гад Әлйасафе кӧр'е Дьһуйел бу.
[21] Пәйр'а Каһати дьчун, йед кӧ тьштед пироз дьбьрьн. Пирозгәһ гәрә бәри һатьна wан бьһата вәгьртьне.
[22] Пәйр'а ала зома зар'ед Әфрайим анәгори ордийед хwә дьчу у Әлишамайе кӧр'е Ә'миһуд сәрwере ордийа wи бу.
[23] Сәрwере ордийа qәбила зар'ед Мьнашә Гамалйеле кӧр'е Пьдаһсур бу.
[24] Сәрwере ордийа qәбила зар'ед Бьнйамин Абидане кӧр'е Гидони бу.
[25] Пәйр'а чаwа пьштгьре һ'әму зома, ала зома зар'ед Дан анәгори ордийед хwә дьчу у Ахиһәзәре кӧр'е Ә'мишадай сәрwере ордийа wи бу.
[26] Сәрwере ордийа qәбила зар'ед Ашер Пагийеле кӧр'е Ок'ран бу.
[27] Сәрwере ордийа qәбила зар'ед Нәфтәли Аһ'ирайе кӧр'е Әйнан бу.
[28] Әв ьн qәйдед чуйина зар'ед Исраел анәгори ордийед wан. Әw бь ви аwайи дьчун.
[29] Һьнге Муса готә Һ'оваве кӧр'е Р'ьһуеле мьдйанийи хәзуре хwә: «Әм дьчьнә ль wи щийе кӧ Хӧдан гот: ‹Әзе wи бьдьмә wә›. Т'әви мә wәрә әме qәнщийе бона тә бькьн, чьмки Хӧдан qәнщи соз дайә Исраел».
[30] Ле әwи щаба Муса да: «Әз найем, ле әзе вәгәр'ьм һәр'ьмә ль ә'рде хwә у нава мәрийед хwә».
[31] Муса гот: «Жь к'әрәма хwә мә нәһелә, чьмки тӧ зани кӧ бәр'ийеда әм к'идәре зомед хwә ледьн, те бьби р'ебәре мә.
[32] Аwа һәгәр тӧ т'әви мә бейи, әw qәнщийа кӧ Хӧдане бона мә бькә, әме жи бона тә бькьн».
[33] Ӧса әw жь ч'ийайе Хӧдан р'ийа се р'ожа чун. Сьндоqа Пәймана Хӧдан жи пешийа wанва р'ийа се р'ожа дьчу, wәки щийе р'ьһ'әтбуне wанр'а р'ач'ә'в кә.
[34] Ә'wре Хӧдан р'оже ль сәр wан бу чахе әw жь зоме р'едьк'әтьн.
[35] У дәма бьрьна сьндоqе, Муса дьгот: «Р'абә Хӧдан! У бьра дьжмьнед тә бәла бьн, йед дьжәньнә тә бьра жь бәр тә бьр'әвьн».
[36] Ле чахе сәкьнандьне әwи дьгот: ‹Хӧдан ль һ'әзар-һ'әзаред Исраел вәгәр'ә!›