<Жьмар 30

[1] Муса сәрwеред qәбилед зар'ед Исраелр'а хәбәрда у гот: «Әв ә хәбәра кӧ Хӧдан ә'мьр кьр:

[2] ‹Гава мерәк ль бәр Хӧдан ад-qьрар бькә йан сонд бьхwә кӧ борщәки һьлдә ль сәр хwә, әw гәрә иди хәбәра хwә нәт'әр'ьбинә, ле һәр тьшт чь кӧ жь дәве wи дәрк'әтийә, гәрәке бинә сери.

[3] Ле гава жьнәк ль мала баве хwә, щаһьлтийа хwәда ль бәр Хӧдан ад-qьрар кә кӧ борщәки һьлдә ль сәр хwә

[4] у баве wе жи бона ад-qьрар у борще wейи һьлдайи ль сәр хwә бьбьһе, дәнге хwә нәкә, һьнге һ'әму ад-qьраред wе у һ'әму борще һьлдайийә ль сәр хwә, дьминьн.

[5] Ле һәгәр баве wе ль wе р'ожа кӧ бьбьһе изьна wе нәдә, һьнге һ'әму ад-qьраред wе у борщед wейә ль сәр, р'әсит дьбьн. Хӧдан wе бьбахшинә wе, чьмки баве wе изьн нә дайә wе.

[6] Ле һәгәр әw мер кә у ад-qьраред wе у хәбәред дәве wейә бе һ'әмде хwә готи, ль сәр wе нә,

[7] ль wе р'ожа кӧ мере wе бьбьһе у дәнге хwә нәкә, һьнге ад-qьраред wе у борще wейә һьлдайи ль сәр хwә, дьминьн.

[8] Ле һәгәр мере wе бьбьһе у хут wе р'оже изьна wе нәдә, һьнге әw р'әсит дькә ад-qьраре ль сәр wе у хәбәред дәве wейә бе һ'әмде хwә готи. Хӧдан wе бьбахшинә wе.

[9] Ле ад-qьраре жьнәбийе йан мербәрдайе, һәр борще кӧ wе һьлда йә ль сәр хwә, ль сәр wе бьминә.

[10] Ле һәгәр жьнәк ль мала мере хwәда ад-qьрар кьрийә йан борщ бь сонд һьлда йә ль сәр хwә,

[11] мере wе бьбьһе, дәнге хwә нәкә у изьна wе бьдә, һьнге һ'әму ад-qьраред wе у һ'әму борщед wе ль сәр wе бьминьн.

[12] Ле гава мере wе ль р'ожа кӧ бьбьһе, wан р'әсит кә, һьнге һ'әму тьшт чь кӧ жь дәве wе дәрк'әтийә, аwа готи ад-qьраред wе у борщед wейә ль сәр wе, һ'ӧкӧме wан т'ӧнә. Мере wе әw р'әсит кьрьн у Хӧдан wе бьбахшинә wе.

[13] Мер дькарә мак кә йан жи р'әсит кә wан һ'әму ад-qьрар у борщед сондхwарийә кӧ бона нәфса хwә шкенандьне кьрийә.

[14] Ле һәгәр мере wе, wе р'оже дәнге хwә нәкә, бь wе йәке әw һ'әму ад-qьраред wе у һ'әму борщед ль сәр wе мак дькә. Чьмки ль р'ожа кӧ wи бьһистийә дәнге хwә нәкьрийә.

[15] Ле һәгәр әw паши бьһистьна хwә р'әсит кә, һьнге әwе дәwса wе сущдар бә›».

[16] Әв ьн qәйдә-qанунед кӧ Хӧдан ә'мьри ль Муса кьрьн, бона мер у жьна wи, бона бав у qиза wи, щаһьлтийа wеда ль мала баве хwәда.