<Жьмар 5

[1] Хӧдан Мусар'а хәбәрда у гот:

[2] «Ә'мьри зар'ед Исраел кә кӧ һ'әмуйед к'оти, һ'әмуйед гәмар же дьчә у һ'әмуйед нәпаqьж кӧ дәст данә щьнйаз жь нава зоме дәрхьн.

[3] Чаwа мер ӧса жи жьн жь зоме дәрхьнә дәр wәки әw зомед хwә, нава к'ижана әз һеwьримә нәһ'әр'ьминьн».

[4] Зар'ед Исраел хут ӧса кьрьн әw жь нава зоме дәрхьстьнә дәр. Чаwа кӧ Хӧдан готьбу Муса зар'ед Исраел хут ӧса кьрьн.

[5] Хӧдан т'әви Муса хәбәрда у гот:

[6] «Бежә зар'ед Исраел, һәгәр мер йан жьнәк, ль бәр Хӧдан беә'сьлийе бькә, аwа готи гӧнәки һьндава йәки дьнда бькә у әw мәрьв гӧне хwә фә'м бькә,

[7] бьра әw гӧне хwәйи кьри бьдә р'уйе хwә, бьра әw жь бәр гӧне хwәва т'ам бьдә у бьра чарика пенща жи сәрда зедәкә у бьдә wи ль бәр к'е гӧнә кьрийә.

[8] Ле һәгәр пьсмаме wи мәрьви т'ӧнә бә кӧ жь бәр гӧнәва бьдьнә wи, һьнге дайина жь бәр гӧнәва, дьгьһижә Хӧдан бона к'аһин, сәрда жи бәране гӧнәк'әwандьне, бь к'ижани гӧнәк'әwандьн wе бона wи бе кьрьне.

[9] У һ'әму һ'әдийед жь һ'әму тьштед пирозә зар'ед Исраел кӧ әwе биньнә ль щәм к'аһин, бьра п'ара wи бә.

[10] Тьштед пирозә һәр кәси п'ара к'аһин ьн, к'е чь кӧ бьдә wи әw п'ара wи йә».

[11] Хӧдан Мусар'а хәбәрда у гот:

[12] «Зар'ед Исраелр'а хәбәр дә у бежә wан: ‹Һәр мере кӧ жьна wи жь р'ийа хwә дәре у һьндава мере хwәда ширһ'әлал нибә,

[13] мерәк сәре хwә wер'а дайнә у әва йәка жь мере wе вәшарти бьминә, ле әw дьзива һ'әр'ьмийә, шә'дә жи мьqабьли wе т'ӧнәйә, әw нәһатийә гьртьне.

[14] Һәгәр р'ӧһ'е к'ӧмр'әшийе бе ль сәр мере wе у әw к'ӧмр'әшийе жьна хwә бькә, жьн жи һ'әр'ьми йә, йан жи һәгәр р'ӧһ'е к'ӧмр'әшийе бе ль сәр wи у әw к'ӧмр'әшийе жьна хwә бькә ле жьн нә һ'әр'ьмийә,

[15] бьра мер жьна хwә бинә ль щәм к'аһин. Бьра бона wе qӧрбане бьдә аwа готи п'арәк жь дәһа ефа аре щәһә, ле бьра р'ун нәр'ежә ль сәр wе у нә жи бьхуре, чьмки әв дийарийа нанийә к'ӧмр'әшийе йә, дийарийа нанийә биранине йә бона ә'йанкьрьна нәһәqийе.

[16] К'аһин бьра wе бьбә у ль бәр Хӧдан бьдә сәкьнандьне.

[17] К'аһин бьра ава пироз бькә дәрдана ахин, аха ә'рде Коне Шә'дәтийе һьлдә у бькә нава wе аве.

[18] Пәйр'а к'аһин бьра жьне ль бәр Хӧдан бьдә сәкьнандьне у лач'ька сәре wе вәкә , дийарийа нанийә биранине бьдә дәсте wе аwа готи дийарийа нанийә к'ӧмр'әшийе. Ле дәсте к'аһинда жи гәрә ава тә'лә ньфьр' кьрьне һәбә.

[19] К'аһин гәрә wе бьдә сонде у бежә жьне: ‹Һәгәр т'ӧ мери сәре хwә тәр'а данәнийә хенщи мере тә йан һәгәр тӧ р'ийа хwә дәрнәк'әтийи, нәһ'әр'ьмийи, тӧ азайи жь ве ава тә'лә ньфьр' кьрьне,

[20] ле һәгәр тӧ жь бьн qоле мере хwә дәрк'әтийи, һ'әр'ьмийи у мерәки дьн хенщи мере тә сәре хwә тәр'а данийә...›

[21] (Һьнге бьра к'аһин жьне бь сонда ньфьр'е бьдә сонде у бежә жьне) ‹...бьра Хӧдан тә бькә ньфьр' у сонд ль нава мьләте тәда, бь дайина Хӧдан бәт'ьне тә п'уч' бә у зьке тә жи бьwәрьмә.

[22] Бьра әва ава һанә ньфьр' кьрьне бьк'әвә зьке тә wәки зьке тә бьwәрьмә у бәт'ьне тә жи п'уч' бә›. Бьра жьн жи бежә: ‹Амин, амин›.

[23] К'аһин бьра ван ньфьр'а ль сәр к'ахазе бьньвисә у ль ава тә'лда бьшо р'әсит кә .

[24] У ава тә'лә ньфьр' кьрьне бьдә жьне кӧ вәхwә, ава ньфьр' кьрьне wе бьк'әвә зьке wе у wе тә'лайе пешда бинә.

[25] Паше к'аһин бьра жь дәсте жьне дийарийа нанийә к'ӧмр'әшийе һьлдә, wе дийарийа нани ль бәр Хӧдан бьһ'әжинә у wе дайнә ль сәр горигәһе.

[26] К'аһине к'ӧлмәке жь wе дийарийа нанийә биранине һьлдә у ль сәр горигәһе агьршәwати кә у паше әwе аве ль жьне бьдә вәхwарьне.

[27] К'әнге әw жьне бь wе аве бьдә вәхwарьне һәгәр әw һ'әр'ьмибә, мере хwәр'а ширһ'әлал нибуйә әw ава ньфьр' кьрьне зьке wеда wе тә'лайе пешда бинә у зьке wе wе бьwәрьмә, бәт'ьне wе п'уч' бә у әw жьне ль нава мьләте хwәда бьбә ньфьр' лебуйи.

[28] Ле һәгәр әw жьна нә һ'әр'ьмийә, һ'әлал ә, әwе аза бә wе бькарьбә зар'а бинә›».

[29] Әва һинкьрьна бона к'ӧмр'әшийе йә, гава жьн бьн qоле мере хwә дәре у бьһ'әр'ьмә,

[30] йан жи һәгәр р'ӧһ'е к'ӧмр'әшийе бе ль сәр мер у әw к'ӧмр'әшийе ль жьна хwә бькә у жьна хwә бьбә ль бәр Хӧдан, һьнге к'аһине һ'әму анәгори ве һинкьрьне бькә.

[31] Мере бесущ бә жь гӧна, ле жьне бона гӧне хwә сущдар бә.