Жьмар 21
[1] П'адше Ә'раде кәнани кӧ ль Нәщәфе дьма, бьһист wәки Исраел р'ийа Ат'аримда те, т'әви Исраел кьрә шәр' у жь wан һесир бьрьн.
[2] Һьнге Исраел ль бәр Хӧдан ад-qьрар кьр у гот: «Һәгәр тӧ ви мьләти бьди дәсте мьн, әзе бажаред wан wеран кьм, wи т'ам дийари Хӧдан бькьм».
[3] Хӧдан дәнге Исраел бьһист у кәнани данә дәстед wан. Әw у бажаред wан wеран кьрьн, әw т'ам дийари Хӧдан кьрьн. Наве wи щийи данин Һ'орма .
[4] Әw жь ч'ийайе Һоре р'ек'әтьн р'ийа Бә'ра Сорва чун wәки дора ә'рде Әдомва һәр'ьн. Сәбьра щьмә'те р'ева т'ере нәкьр.
[5] Щьмә'те мьqабьли Хwәде у Муса хәбәрда у гот: «Чьма wә әм жь Мьсьре һәвраз дәрхьстьн кӧ бәр'ийеда бьмьрьн? Чьмки нә нан һәйә, нә ав һәйә у әв хwарьна һанә п'уч' жи, кӧ мә'де мә же ль һәв дьк'әвә».
[6] Хӧдан мә'ред жә'рдадайи шандьнә ль сәр мьләт у wана мьләт хьст. Гәләк мәри жь Исраел мьрьн.
[7] Һьнге мьләт һатә ль щәм Муса у гот: «Мә гӧнә кьр кӧ мьqабьли Хӧдан у тә хәбәрда, р'әща жь Хӧдан бькә кӧ мә'ра дури мә хә». У Муса бона щьмә'те р'әща кьр.
[8] Хӧдан готә Муса: «Хwәр'а мә'рәки чекә у дарва дардакә, һәр кәсе мә'р ледайи ль wи бьньһер'ә wе сах бьминә».
[9] Муса мә'рәки сьфьр чекьр, әw дарва дарда кьр. Гава мә'р мәрьвәки дьхьст әwи ль мә'ре сьфьр дьньһер'и у сах дьма.
[10] Зар'ед Исраел р'е к'әтьн у ль Овот'е зомед хwә ледан.
[11] Жь Овот'е жи р'е к'әтьн у ль Ийе-Һаһабариме ль бәр'ийа пешбәри Моwабе алийе р'оһьлате зомед хwә ледан.
[12] Жь wьр р'е к'әтьн у ль нәwала Зәрәде зомед хwә ледан.
[13] Жь wьр жи р'е к'әтьн у бәр'ийеда wи бәри Арноне кӧ жь синоре әморийа дәр те, зомед хwә ледан. Чьмки Арнон синоре нава Моwаб у әморийа йә.
[14] Ләма ль к'ьтеба Шәр'ед Хӧданда те готьне: «Ваһев у ньхалед Арнон ль Суфайе нә,
[15] ӧса жи п'ебәржеред ньхала кӧ дьк'ьшьнә жер һ'әта Ә'ре у ль синоре Моwабе һьлдьпәсерә».
[16] У жь wьр чунә Бере. Әва әw бир бу бона к'ижани Хӧдан готә Муса: «Щьмә'те т'опи ль сәр һәв кә у әзе аве бьдьмә wан».
[17] Wе һьнге Исраел әва стьрана стьра: «Бир бьдә дәр! Wер'а бьстьрен!
[18] Бира кӧ wәк'ила әw вәданә, ә'сьлзадәйед мьләта әw к'оланә бь шьв у шьвдаред хwә!» Жь бәр'ийе әw чунә Мат'анайе.
[19] Жь Мат'анайе жи чунә Наһ'алийеле, жь Наһ'алийеле чунә Бамот'е.
[20] У жь Бамот'е чунә нәwала дәшта Моwабда ль сәре Писгайе, кӧ ль бәр'ийе дьньһер'ә.
[21] Wе һьнге Исраел qасьд шандьнә ль щәм Сихоне п'адше әморийа, гот:
[22] «Изьна тә һәбә әм ә'рде тәр'а дәрбаз бьн, әм вәнагәр'ьнә дәшт у баха, әм аве жи жь бира вәнахwьн, әме р'ийа п'адшева һәр'ьн һ'әта синоре тәр'а дәрбаз бьн».
[23] Ле Сихон нә һьшт кӧ Исраел синоре wир'а дәрбаз бә. Сихон һ'әму щьмә'та хwә т'оп кьр у дәрк'әтә мьqабьли Исраел ль бәр'ийе, һатә Йаһасе у т'әви Исраел кьрә шәр'.
[24] Исраел әw да бәр дәве шур, ә'рде wи жь Арнон һ'әта Йабоqе, һ'әта зар'ед Амон зәфт кьр. Чьмки синоре зар'ед Амон qәwаткьри бу.
[25] Исраел һ'әму әв бажар һьлдан у Исраел ль һ'әму бажаред әморийада щи-wар бу ӧса жи Һ'әшбоне у һ'әму дор-бәре wеда.
[26] Чьмки Һ'әшбон бажаре Сихоне п'адше әморийа бу. Әwи т'әви п'адше Моwабейи пешийе кьрьбу шәр' у т'әмамийа ә'рде wи һ'әта Арноне жь дәсте wи стандьбу.
[27] Ләма йе мәсәла сальх дькьн, дьбежьн: «Wәрьнә Һ'әшбоне, бьра әw ава бә у qәдим бә бажаре Сихоне!
[28] Чьмки агьр жь Һ'әшбоне дәрк'әт, алав жь бажаре Сихоне. Һ'уфи хwә кьр Ә'ра Моwабе, wәк'илед Арнонейә һеланед жорьн.
[29] Wәй ль тә Моwаб! Тӧ ӧнда буйи щьмә'та К'ьмош , кӧр'ед хwә данә р'әве, qизед хwә жи данә һесирийе ль Сихоне п'адше әморийа.
[30] Мә әw ә'рде хьст, жь Һ'әшбоне һ'әта Дибоне. Мә әw һ'әта Нофаһ'е кӧ незики Медәбайе йә wеран кьрьн».
[31] Бь ви аwайи Исраел ль ә'рде әморийада щи-wар бу.
[32] Wе һьнге Муса шанд кӧ щә'сусийа Йазере бькьн, Исраел дор-бәред wе зәфт кьр у бәри әморийед кӧ ль wьр дьман да
[33] у вәгәр'ийан ль р'ийа Башанеда һәвраз чун. Һьнге Оге п'адше Башане у т'әмамийа мьләте wи ль Едрәйе дәрк'әтә шер' мьqабьли wан.
[34] Хӧдан готә Муса: «Нәтьрсә жь wи, чьмки әwи, т'әмамийа щьмә'та wи у ә'рде wи әз дьдьмә дәсте тә. Те ӧса бини сәре wи чаwа кӧ тә ани сәре Сихоне п'адше әморийа кӧ ль Һ'әшбоне дьма».
[35] У Исраел әw, кӧр'ед wи у т'әмамийа щьмә'та wи qьр' кьрьн, qәт йәк сах нә һьштьн у ә'рде wи зәфт кьрьн.