<Жьмар 14

[1] Т'әмамийа щьвине дәнге хwә һьлда у wе шәве мьләт гьрийа.

[2] Т'әмамийа зар'ед Исраел мьqабьли Муса у Һарун бина хwә тәнг кьр, т'әмамийа щьвине готә wан: «Хwәзи әм ә'рде Мьсьреда бьмьрана йан хwәзи әм ль ве бәр'ийеда бьмьрана!

[3] Гәло чьма Хӧдан мә дьбә ль wи ә'рди? Wәки әм бь шур бенә qьр'е? Жьн у зар'ед мә т'алан һәр'ьн. Гәло мәр'а нә qәнщ ә әм вәгәр'ьнә Мьсьре?»

[4] Готьнә һәвдӧ: «Wәрьн әм сәрwерәки к'ьфш кьн у вәгәр'ьнә Мьсьре».

[5] Һьнге Муса у Һарун ль бәр т'әмамийа щьвина зар'ед исраелейә щьвийайи дәвәр'уйа чунә ә'рде.

[6] Йешуйе кӧр'е Нун у К'алебе кӧр'е Йьфунәһ жь wан йед кӧ щә'сусийа wи ә'рди кьрьбун к'ьнщед хwә qәлаштьн

[7] у готьнә т'әмамийа щьвина зар'ед Исраел: «Ә'рде кӧ әм навр'а дәрбазбун бона щә'сусийе, әw ә'рдәки п'ьр' хwәш ә.

[8] Һәгәр Хӧдан һ'ьз кә, әwе мә бьбә wьр у wи ә'рди бьдә мә, к'ижан кӧ шир у һьнгьв же дьк'ьшә.

[9] Т'әне мьqабьли Хӧдан р'анәбьн у жь мәрьвед wи ә'рди нәтьрсьн, чьмки әwе бьбьнә хӧре мә. Сийа сәр wан жь сәр wан һатә һьлдане. Хӧдан т'әви мә йә, жь wан нәтьрсьн».

[10] Ле т'әмамийа щьвине гот: «Wан бьдьнә ль бәр кәвьра!» Һьнге р'умәта Хӧдан ль Коне Щьвинеда т'әмамийа зар'ед Исраелва хӧйа бу.

[11] Хӧдан готә Муса: «Һ'әта к'әнге әв мьләте мьн т'әхсир кә? Һ'әта к'әнге әwе баwәрийа хwә мьн нәйнә, һәqа жи нишан мьн ль нава wида кьрьн?

[12] Әзе бь нәхwәшийа һ'ал wан хьм у мьлк' жь wан бьстиньм у тә бькьмә мьләтәки жь wан мәзьнтьр у qәwаттьр».

[13] Муса готә Хӧдан: «Мьсьри, жь нава к'ижанада тә әв мьләт бь qәwата хwә дәрхьст wе бьбьһен

[14] у wе бежьнә бьнәлийед wи ә'рди. Әwед кӧ бьһистьнә wәки тӧ йа Хӧдан, ль нава ви мьләтийи, кӧ р'у бь р'у тӧ йа Хӧдан, хӧйа буйи. Ә'wре тә ль сәр wан ә у р'оже ль стуне ә'wрда пешийа wанва дьчи, шәв жи бь стуна агьр.

[15] Һәгәр тӧ ви мьләти чаwа мәрьвәки qьр' ки, һьнге әw мьләтед кӧ бона тә бьһистьнә wе бежьн:

[16] ‹Хӧдан нькарьбу әв мьләта бьбьра ль ә'рде кӧ бь сонд соз дабу wан, ләма әw ль бәр'ийеда qьр' кьр›.

[17] Дә бьра ньһа qәwата Хwәйе мьн мәзьн бә, чаwа кӧ тә гот:

[18] ‹Хӧдан сәбьр-ськ'ан ә у хwәйе һ'ӧба амьн ә, нәһәqийе у нәр'астийе дьбахшинә. Ле сущдара бе щәза наһелә, нәһәqийа бава тинә сәре зар'а, һ'әта ньсьле сьсийа у чара›

[19] Жь к'әрәма хwә нәһәqийа ви мьләти анәгори һ'ӧба хwәйә амьнә п'ьр' бьбахшинә, чаwа кӧ тә жь Мьсьре һ'әта ньһа бахшандийә ви мьләти».

[20] Хӧдан гот: «Мьн анәгори готьна тә бахшанд.

[21] Әз сахийа хwә кьм, чаwа бь р'умәта Хӧдан wе т'әмамийа ә'рде т'ьжи бә.

[22] Һ'әму мәрьвед кӧ р'умәт у нишанед мьн дитьн, к'ижан кӧ мьн Мьсьре у бәр'ийеда кьрьн у wан дәһә щара әз щер'ьбандьм у гӧһ нәданә дәнге мьн,

[23] әw ә'рде кӧ мьн бь сонд соз дабу бавед wан, әw набиньн. Һ'әмуйед кӧ әз т'әхсир кьрьм wи ә'рди набиньн,

[24] пештьри К'алебе ә'вде мьн, чьмки р'ӧһ'әки дьн нав wида бу у т'ам гӧр'а мьн кьр, әзе wи бьбьмә wи ә'рде кӧ әw чуйе у зӧр'әта wи wе ле wар бә.

[25] Амалеки у кәнани нәwалада дьжин. Һун сьбе р'абьн р'ек'әвьн р'ийа Бә'ра Сорр'а һәр'ьнә бәр'ийе».

[26] Хӧдан Муса у Һарунр'а хәбәрда у гот:

[27] «Һ'әта к'әнге әв щьвина һанә хьраб wе һьндава мьнда бина хwә тәнг кә? Бинтәнгийа зар'ед Исраел кӧ һьндава мьнда бина хwә тәнг дькьн, мьн бьһист.

[28] Бежә wан: ‹Әз сахийа хwә кьм, Хӧдан дьбежә, мьн бьһист чь wә гот, хут ӧса әзе биньмә сәре wә.

[29] Ль ве бәр'ийеда щьнйазе wәйе бьминьн. Йе wан һ'әмуйед жьмартийә wәкә һ'әсабе wә, жь бистсалийе жортьр, к'ижана кӧ һьндава мьнда бина хwә тәнг кьрьнә.

[30] Әвана wе нак'әвьнә ль ә'рде кӧ мьн сонд хwар wәки wә ле wар кьм. Пештьри К'алебе кӧр'е Йьфунәһ у Йешуйе кӧр'е Нун.

[31] Хьшимед wәйә бона к'ижана wә дьгот кӧ әwе т'алан һәр'ьн, әзе wан бьбьмә wьр у әwе wи ә'рди тә'м кьн, к'ижан кӧ wә т'әхсир кьр.

[32] Ле щьнйазед wә wе ль ве бәр'ийеда бьминьн.

[33] Зар'ед wә жи wе чьл сали т'әркәсәри бәр'ийе бьн у wе бьчәрчьрьн р'уйе беә'сьлийа wәда, һ'әта щьнйазед wә бәр'ийеда бьр'ьзьн.

[34] Wә чьл р'ожи щә'сусийа wи ә'рди кьр, ле һуне щәзайе бона гӧнәйед хwә чьл сали бьстиньн. Саләке жь бәр р'ожәкева. Wәки һун бьзаньбьн мьqабьли мьн чуйин чьйә.

[35] Мьн Хӧдан гот, хут ӧса жи әзе биньмә сәре т'әмамийа ве щьвина һанә хьраб йа кӧ р'абуйә мьqабьли мьн. Ль ве бәр'ийеда qьр'а wане бе у ль wьр wе бьмьрьн›».

[36] Әw мәрьвед кӧ Муса шандьбун wәки щә'сусийа wи ә'рди бькьн, гава вәгәр'ийан, т'әмамийа щьвине р'акьрьнә мьqабьли Муса, щаб-саwе хьраб бона wи ә'рди бәла дькьрьн,

[37] һ'әму әw мәрьвед кӧ щаб-саwе хьраб бона wи ә'рди бәла дькьрьн бь бәла һатьнә кӧштьне ль бәр Хӧдан.

[38] Жь wан мәрьвед кӧ чубун щә'сусийа wи ә'рди бькьн т'әне Йешуйе кӧр'е Нун у К'алебе кӧр'е Йьфунәһ сах ман.

[39] Гава Муса әв хәбәр гиһандьнә т'әмамийа зар'ед Исраелр'а, мьләт шинәкә гьран кьр.

[40] Сьбәһе зу әw р'абун кӧ һьлк'ьшинә сәр ч'ийа-банийа, дьготьн: «Әм һазьр ьн һьлк'ьшьнә ль wи щийе кӧ Хӧдан готьбу, чьмки мә гӧнә кьр».

[41] Муса гот: «Һун чьма гӧр'а Хӧдан накьн? Йәкә әw йәк бефәйдә йә.

[42] Һьлнәк'ьшьн кӧ һун жь дьжмьнед хwә нәйенә qьр'е, чьмки Хӧдан т'әви wә нинә.

[43] Амалеки у кәнани ль wьр пешийа wә нә, һуне бь шур бьк'әвьн, чьмки wә пьшта хwә да Хӧдан у Хӧдане т'әви wә нибә».

[44] Wана хwә һ'ьшьр кьр, һьлк'ьшийанә сәре ч'ийа-банийа, ле Сьндоqа Пәймана Хӧдан у Муса жь зоме дәрнәк'әтьн.

[45] Һьнге амалеки у кәнани бьнәлийед wан ч'ийа-банийа бәржер бун у qьр'а wан анин, һ'әта Һ'ормайе әw һурдәхwәши кьрьн.