Жьмар 6
[1] Хӧдан Мусар'а хәбәрда у гот:
[2] «Зар'ед Исраелр'а хәбәр дә у бежә wан: ‹Һәгәр мер йан жьн бона нәзирийе дьхwазә ад-qьрар кә, кӧ әw бьбә нәзире Хӧдан,
[3] Гәрәке әw хwә жь шәрав у араqе дур бьгьрә, сьрка шәраве у сьрка араqе вәнәхwә, т'ӧ щар жь тьште тьрийа чекьри вәнәхwә у нә тьрийе гьһишти бьхwә у нә жи к'ьшмиша.
[4] Һ'әму р'ожед нәзирийа хwәда, әw гәрәке һәр тьште жь тьрийа чекьри нәхwә, жь дәндькада гьрти һ'әта qалька.
[5] Һ'әму р'ожед ад-qьрарейә нәзирийа хwәда, гәрәке дузан сәре wи нәк'әвә, һ'әта т'әмамбуна р'ожед кӧ әwи хwә Хӧданр'а нәзир кьрийә әw бьра пироз бә, п'ор'е сәре хwә бьра бьһелә дьреж бьн.
[6] Һ'әму р'ожед кӧ wи хwә Хӧданр'а нәзир кьрийә әw бьра незики т'ӧ щьнйази нәбә,
[7] нә щьнйазе баве хwә, нә дийа хwә, нә бьре хwә нә жи хушка хwә. Һ'әта бона мьрьна wан жи әw бьра паqьжийа хwә нәһ'әр'ьминә, чьмки нәзирийа бона Хwәдейе wи ль сәр сәре wи йә.
[8] Һ'әму р'ожед wийә нәзирийе бьра әw Хӧданр'а пироз бә.
[9] Ле һәгәр йәк ньшкева ль бәр wи бьмьрә у әw сәре хwәйи нәзирийе бьһ'әр'ьминә, һьнге әw гәрә п'ор'е хwә р'ожа хwәйә паqьжбуне кӧр' кә. Р'ожа һ'әфта бьра әw п'ор'е хwә кӧр' кә
[10] у ль р'ожа һ'әйшта бьра дӧ фатьмока йан жи дӧ щущукед кәwа бинә ль бәр дәре Коне Щьвине ль щәм к'аһин.
[11] К'аһине йәки бьдә чаwа дийарийа гӧнәк'әwандьне йе дьне жи чаwа дийарийа т'әвайишәwате у wи жь гӧнәйе wийи бона дәстдайина йе мьри бьк'әwинә. Ль wе р'оже сәре wи пироз бькә.
[12] У диса р'оже хwәйә нәзирийе Хӧданр'а к'ьфш кә, бәрхәки йәксали Хӧданр'а бьдә чаwа дийарийа жь бәр нәһәqийева. Р'ожед wийә бәри ве йәке ӧнда дьбьн, чьмки нәзирийа wи һ'әр'ьмийә.
[13] Әв ә qануна бона нәзирийе: Чахе р'ожед нәзирийа wи т'әмам бьн, бьра wи биньнә ль бәр дәре Коне Щьвине.
[14] Әwе дийарийа хwә бәрхәки йәксалийи бе qӧсур Хӧданр'а т'әвайишәwат кә у бәрхәкә мейә йәк салийә бе qӧсур бона паqьжбуне дийари кә, ӧса жи бәранәки бе qӧсур бона дийарийа һәләqәтийе бьдә,
[15] сәлә нане бе һәвиртьр'шк, аwа готи к'атед жь аре хас р'унда стьрайи у лошед бе һәвиртьр'шкә сәр р'ункьри, т'әви дийарийа wанә нани у дийарийа wанә вәхwарьне бьдә.
[16] К'аһин бьра ван дайнә ль бәр Хӧдан у дийарийа wийә паqьжбуне у т'әвайишәwате бьдә.
[17] Ле бәран т'әви сәла нане бе һәвиртьр'шк чаwа дийарийа һәләqәтийе бьдә Хӧдан, ӧса жи к'аһин бьра дийарийа wийә нани у вәхwарьне бьдә.
[18] Һьнге йе нәзир ль бәр дәре Коне Щьвине п'ор'е хwәйи нәзирийе кӧр' кә. П'ор'е сәре хwәйи нәзирийе һьлдә у дайнә ль сәр агьре бьне дийарийа һәләqәтийе.
[19] К'аһин жи бьра пила бәране к'әланди, к'атәки бе һәвиртьр'шк, лошәки бе һәвиртьр'шк жь сәле һьлдә у бьдә дәстед нәзир, пәй кӧр'кьрьна п'ор'е нәзирийа wир'а.
[20] К'аһин гәрә wан чаwа дийарийа һ'әжандьне ль бәр Хӧдан бьһ'әжинә, әва йәка пироз ә у п'ара к'аһин ә т'әви синге дийарийе у пиле дийарийе. Пәйр'а нәзир дькарә шәраве вәхwә.
[21] Әв ә qануна бона нәзирийе. Ле һәгәр әw ад-qьрар дькә кӧ ль сәр qануна нәзирр'а һ'әдике зедә бьдә Хӧдан, чь кӧ жь дәсте wива те, әw гәрә хут ӧса бькә, чаwа кӧ ад-qьрар кьр бә›».
[22] Хӧдан Мусар'а хәбәрда у гот:
[23] «Һарун у кӧр'ед wир'а хәбәр дә, бежә: ‹Аһа зар'ед Исраел бьмбарәк кьн, бежьнә wан:
[24] Бьра Хӧдан тә бьмбарәк кә у хwәйи кә!
[25] Бьра ч'ә'ве Хӧдан ль сәр тә бә у р'ә'ме ль тә бькә!
[26] Бьра Хӧдан бәре хwә бьдә тә у хер у хwәшийе бьдә тә!›
[27] Бь ви аwайи наве мьне зар'ед Исраелва бе гьредьн у әзе wан бьмбарәк кьм».