<Жьмар 31

[1] Хӧдан Мусар'а хәбәрда у гот:

[2] «Һ'әйфа зар'ед Исраел жь мьдйанийа һьлдә, паше һәр'ә бьгьһижә щьмә'та хwә».

[3] Муса готә мьләт: «Мера жь нава хwә бона шер' һазьр кьн кӧ әw мьqабьли мьдйанийа шәр' бькьн, һ'әйфа Хӧдан жь Мьдйанийа һьлдьн.

[4] Һ'әзар мери жь һәр qәбилед Исраел бьшиньнә шер'».

[5] Донздәһ һ'әзар мер жь ордийед Исраел һатьнә һазьркьрьне бона шер', жь һәр qәбиле һ'әзарәк.

[6] Муса жь һәр qәбиле һ'әзарәк шандьнә шер'. Т'әви wан Пинһасе кӧр'е Елазаре к'аһин жи шанд, кӧ тьштед пироз у бор'ийед һәwаре дестда бун.

[7] Әw мьqабьли Мьдйане чунә шер', чаwа кӧ Хӧдан ә'мьри ль Муса кьр у һ'әму мер кӧштьн.

[8] У ль сәр wанр'а пенщ п'адшед Мьдйане кӧштьн: Еwи, Р'әqәм, Сур, Һур у Р'әба. Wана ӧса жи Бьламе кӧр'е Бәур бь шур кӧшт.

[9] Зар'ед Исраел жьн у зар'е мьдйанийа һесир һьлдан. Һ'әму һ'әйwанед wан, пәз-дәwаред wан у һ'әму һәбука wан т'алан бьрьн.

[10] У һ'әму бажаред wанә ль щи-wаред wан, һ'әму зомед ордийед wан шәwьтандьн,

[11] ле һ'әму т'алан у һ'әму чь кӧ зәфт кьрьбун, жь мерьв һ'әта һ'әйwен хwәр'а бьрьн.

[12] Wана һесиред һьлдайи у т'алан анинә зоме щәм Муса, Елазаре к'аһин у т'әмамийа щьвина зар'ед Исраел, ль дәштед Моwабе, незики Урдӧне, пешбәри Әриһайе.

[13] Һьнге Муса, Елазаре к'аһин у һ'әму сәрwеред щьвине жь зоме дәр дәрк'әтьнә пешийа wан.

[14] Муса һерса хwә ль сәрәскәра, сәрһ'әзара у сәрсәдед кӧ жь шер' вәгәр'ийа бун р'акьр.

[15] Муса готә wан: «Wә һ'әму жьн сах һьштьнә?

[16] Нә wана бь хәбәра Бьлам кьрьн кӧ зар'ед Исраел ль бәр Хӧдан беә'сьлийе бькьн, р'уйе П'ьһорда бәла һатә сәре щьвина Хӧдан.

[17] Ньһа, һ'әму зар'ед qьсьме нерин у һ'әму жьнед кӧ сәре хwә мерар'а данинә бькӧжьн,

[18] ле һ'әму qизед щаһьлә кӧ сәре хwә мерар'а данәнинә, бона хwә сах бьһельн.

[19] Ле һун һ'әфт р'ожа жь зоме дәр бьминьн. Һәр кәсе кӧ мәри кӧштийә, һәр кәсе кӧ щьнйаз к'әтийә, ль р'ожа сьсийа у р'ожа һ'әфта хwә паqьж кьн, һун у һесиред wә.

[20] Һ'әму к'ьнщ, һ'әму тьштед ч'әрмин, һ'әму тьштед жь пьр'ч'а бьзьне чекьри у һ'әму тьштед дарин паqьж кьн».

[21] Елазаре к'аһин готә әскәред кӧ чубунә шер': «Әв ә qәйдә-qануна wе һинкьрьна кӧ Хӧдан ә'мьр ль Муса кьр:

[22] ‹Т'әне зер', зив, сьфьр, һ'әсьн, qьла у льһем,

[23] һәр тьшт чь кӧ агьрда нашәwьтә гәрәке ль нава агьрр'а дәрбазкьн у әwе паqьж бә, ле диса гәрә бь ава паqьжбуне жи бе паqьжкьрьне. Чь жи кӧ агьрда дьшәwьтә, гәрә ль нава авер'а дәрбаз кьн.

[24] У ль р'ожа һ'әфта к'ьнщед хwә бьшон, һьнге һуне паqьж бьн, пәйр'а һун дькарьн бьк'әвьнә зоме›».

[25] Хӧдан Мусар'а хәбәрда у гот:

[26] «Тӧ т'әви Елазаре к'аһин у сәрwеред малбәтед щьвине, йед һесир һьлдайи жь мерьв һ'әта һ'әйwен бьжмьрә.

[27] У т'ален ль нава әскәред кӧ чубунә шер' у т'әмамийа щьвине п'арәвәкә.

[28] Жь п'ара әскәред кӧ чубунә шер' Хӧданр'а хәрщ һьлдә: Жь пенсьд һесири йәк, ӧса жи жь пез-деwер у жь к'әра.

[29] Жь п'ара wан һьлдә у бьдә Елазаре к'аһин чаwа дийари Хӧданр'а.

[30] Ле жь п'ара зар'ед Исраел, жь пенщи һесири йәке, ӧса жи жь пез-деwер, жь к'әра жь һ'әму һ'әйwани һьлдә у wан бьдә леwийе кӧ хwәйитийа П'арьстгәһа Хӧдан дькьн».

[31] Муса у Елазаре к'аһин ӧса жи кьрьн, чаwа кӧ Хӧдан ә'мьри Муса кьрьбу.

[32] Т'әмамийа һ'әсабе т'алан, аwа готи чь кӧ әскәр зәфт кьрьбу, әв бу: 675000 пәз,

[33] 72000 дәwар,

[34] 61000 к'әр,

[35] 32000 жи qизед кӧ сәре хwә мерр'а данәнибун.

[36] Ниве wе, аwа готи п'ара йед кӧ чубунә шер', әв бу: 337500 пәз,

[37] у жь ве 675 чаwа хәрщ данә Хӧдан.

[38] 36000 дәwар у жь wан 72 чаwа хәрщ данә Хӧдан.

[39] 30500 к'әр у жь wан 61 чаwа хәрщ данә Хӧдан.

[40] 16000 мәри у жь wан 32 чаwа хәрщ данә Хӧдан.

[41] Муса әв хәрще дийарийа Хӧдан данә Елазаре к'аһин, чаwа кӧ Хӧдан ә'мьри ль Муса кьрьбу.

[42] Ниве wе п'ара зар'ед Исраел, к'ижан кӧ Муса жь п'ара йед чубунә шер' дәрхьстьбу,

[43] һаqас бу п'ара щьвине: 337000 пәз,

[44] 36000 дәwар,

[45] 30500 к'әр,

[46] 16000 мәри бун.

[47] Муса жь п'ара зар'ед Исраел, аwа готи йәк жь пенщийи, жь мерьв у жь һ'әйwен һьлда у да леwийе кӧ хwәйитийа П'арьстгәһа Хӧдан дькьн. Чаwа кӧ Хӧдан ә'мьри ль Муса кьр.

[48] Сәрәскәре сәр сәрһ'әзара у сәрсәда незики Муса бун

[49] у готьнә Муса: «Ә'вдед тә әскәред кӧ әм сәрwерийе ль wан дькьн, мә әw жьмьрин у аwа т'ӧ кәс жь wан ӧнда нәбуйә.

[50] Ва йә әм бона к'әwандьна нәфса хwә ль бәр Хӧдан ве дийарийе Хӧданр'а дьдьн, к'е чь тьштед зер'ин дит: Базьне сәр мьл, базьн, гӧстил, гӧһар у хьшьр бә».

[51] Муса у Елазаре к'аһин әв зер', һ'әму тьштед нәqьшанди жь wан һьлдан.

[52] Һ'әму зер'е кӧ сәрһ'әзара у сәрсәда дийари Хӧдан кьрьн, 16750 шекьл бу.

[53] Әскәра һәр кәси т'алане хwә һьлда бу.

[54] Муса у Елазаре к'аһин зер' жь сәрһ'әзара у сәрсәда һьлдан у анинә ль Коне Щьвине, чаwа биранин бона зар'ед Исраел ль бәр Хӧдан.