<Жьмар 15

[1] Хӧдан Мусар'а хәбәрда гот:

[2] «Зар'ед Исраелр'а хәбәр дә у бежә wан: ‹Гава һун һәр'ьнә wи ә'рде щи-wаред хwә, к'ижани кӧ әз бьдьмә wә

[3] у һун Хӧданр'а дийарийед шәwате бьдьн, һәгәр әw йа т'әвайишәwате бә, йан qӧрбанәкә жь пез-деwер бә бона ад-qьрар qәдандьне, йан дийарийед р'әзәдьлийе бә, йан жи йа щәжьнед wәда бә, wәки Хӧданр'а дийарийа бинхwәш бьдьн, аһа бькьн:

[4] Дийардар кӧ дийарийа хwә тинә, бьра Хӧданр'а дийарийа нани бьдә, аwа готи п'арәкә чапейә жь дәһа йәк аре хас, т'әви п'арәкә һинейә жь чара йәк р'унда стьрайи.

[5] У бона һәр бәрха дийарийа т'әвайишәwате, йан жи qӧрбана п'арәкә һинейә жь чара йәк шәрав, чаwа дийарийа сәрдакьрьне бьдә.

[6] Ле т'әви бәран, п'арәкә чапейә жь дәһа дӧдӧ аре хаси стьрайи, п'арәкә һинейә жь сьсийа йәк жи р'унда стьрайи, чаwа дийарийа нани бьдә,

[7] ӧса жи п'арәкә һинейә жь сьсийа йәк шәрав бона дийарийа сәрдакьрьне, чаwа дийарийа бинхwәш Хӧданр'а бьдә.

[8] Гава тӧ щанәга чаwа дийарийа т'әвайишәwате, йан qӧрбана бона qәдандьна ад-qьраре, йан дийарийа һәләqәтийе Хӧданр'а бьди,

[9] һьнге т'әви щанәга п'арәкә чапейә жь дәһа сьсе аре хас т'әви нив һин р'унда стьрайи, чаwа дийарийа нани бьдә.

[10] Ӧса жи нив һин шәрав бона дийарийа сәрдакьрьне бьдә. Әва дийарийа шәwатейә бинхwәш ә бона Хӧдан.

[11] Бь ви аwайи бьра т'әви һәр бохәйи, һәр бәрани, һәр бәрхи у һәр каре нерин аһа бе дайине,

[12] чь кӧ бе дайине, бь ви аwайи т'әви һәр дийарийе анәгори һ'әсабе wан бьдә.

[13] Һәр бьнәлийе wәлат бьра ӧса бькә чахе дийарийа шәwате, чаwа дийарийа бинхwәш, бьдә Хӧдан.

[14] Һәгәр ль нава wәда хәрибәк бьжи йан йәк кӧ ль нава зӧр'әтед wәда т'әви wә йә у дийарийа шәwате чаwа дийарийа бинхwәш Хӧданр'а бьдә бьра ӧса бьдә чаwа кӧ һун дьдьн.

[15] Щьвинер'а qәйдә-qанунәк бә, бона wә у бона хәрибе кӧ ль нава wәда дьжи. Qәйдә-qануна һ'әта-һ'әтайе бә зӧр'әтед wәр'а, чаwа һун бьн, ӧса жи хәрибе ль бәр Хӧдан бә.

[16] Qанунәк у диwанәк бә бона wә у бона хәрибе нав wәда дьжи›».

[17] Хӧдан Мусар'а хәбәрда у гот:

[18] «Зар'ед Исраелр'а хәбәр дә у бежә wан: ‹Гава һун бьк'әвьнә wи ә'рде кӧ әз wә дьбьме

[19] у һун жь нане wи ә'рди бьхwьн, Хӧданр'а п'арәкә дийарийе башqә кьн.

[20] Жь һәвире хwәйи пешьн һун гәрә к'атәки чаwа дийарийа бедәре дийари кьн.

[21] Жь һәвире хwәйи пешьн ль нава зӧр'әтед хwәда һун гәрә дийарийе бьдьнә Хӧдан.

[22] Ле гава һун бьшьһ'ьтьн у һ'әму ван ә'мьред бона к'ижана Хӧдан готә Муса нәqәдиньн,

[23] аwа готи һ'әму чь кӧ Хӧдан Хwәдейе wә бь дәсте Муса ль wә ә'мьр кьр, жь wе р'ожа кӧ Хӧдан ә'мьри wә кьр у пәйр'а жи ль зӧр'әтед wә,

[24] һәгәр әw йәк бе һ'әмде хwә һатийә кьрьне у щьвинева вәшарти майә, һьнге һ'әму щьвин бьра щанәгаки чаwа дийарийа т'әвайишәwатейә бинхwәш бьдә Хӧдан, т'әви дийарийа wейә нани у сәрдакьрьне анәгори qануне у нерики жи чаwа дийарийа паqьжбуне.

[25] Һьнге к'аһин бьра бона һ'әму щьвина зар'ед Исраел к'әwандьне бькә у wе ль wан бе бахшандьне. Чьмки wана шаши кьр, ле wана qӧрбана хwә чаwа дийарийа шәwате Хӧданр'а у дийарийа хwәйә паqьжбуне ль бәр Хӧдан бона шашийе дан.

[26] Ль һ'әму щьвина зар'ед Исраел у ль хәрибе нава wанда wе бе бахшандьне, чьмки т'әмамийа щьвине беһ'әмде хwә шаши кьрийә.

[27] Ле һәгәр кәсәк беһ'әмде хwә гӧнә бькә бьра әw бьзьнәкә йәк сали бона паqьжбуне дийари кә.

[28] К'аһине жи бона кәсе беһ'әмде хwә гӧнә кьри к'әwандьне бькә, чьмки бе һ'әмде хwә ль бәр Хӧдан гӧнә кьрийә. Әwе бона wи к'әwандьне бькә у ль wи wе бе бахшандьне.

[29] Бьра qанунәкә тә һәбә бона бьнәлийе жь зар'ед Исраел у бона хәрибе ль нава wанда йе кӧ бе һ'әмде хwә гӧнә бькә.

[30] Ле һәгәр әw кәс бьнәли бә, йан хәриб бә, кӧ бь qәста тьштәки бькә әw бь ве йәке к'ьфьрийа Хӧдан дькә, әw кәс бьра жь нава мьләте хwәда бе ӧндакьрьне.

[31] Чьмки әwи хәбәра Хӧдан т'әхсир кьр у ә'мьре wи т'әр'ьбанд, әw кәс бьра бе ӧндакьрьне, гӧне wи стуйе wи бә›».

[32] Щарәке гава зар'ед Исраел бәр'ийеда бун, wана мәрьвәк дит кӧ р'ожа шәмийе qьрш т'оп дькьр.

[33] Йед кӧ wәхте qьрш т'опкьрьне әw дитьн, гьртьн анинә ль щәм Муса, Һарун у т'әмамийа щьвине

[34] у әw һьштьнә бьн нобәдарийе, чьмки һе нәһатьбу сафи кьрьне, кӧ чь биньнә сәре wи.

[35] Паше Хӧдан готә Муса: «Әw мәрьв бьра бе кӧштьне, т'әмамийа щьвине бьра wи жь зоме дәр бьдә ль бәр кәвьра».

[36] Т'әмамийа щьвине әw жь зоме дәрхьстә дәр у әw данә бәр кәвьра кӧштьн, чаwа кӧ Хӧдан ә'мьри Муса кьр.

[37] Хӧдан Мусар'а хәбәрда у гот:

[38] «Зар'ед Исраелр'а хәбәр дә у бежә wан кӧ әw ль нава зӧр'әтед хwәда п'еше к'ьнщед хwә р'иши кьн у qәйт'ана шин п'ешева кьн.

[39] Әwе wәр'а бьбьнә р'иши у гава кӧ һун wе бьбиньн һуне һ'әму ә'мьред Хӧдан бир биньн у wан бьqәдиньн. Һуне пәй хwәстьна дьле хwә у ч'ә'вед хwә нәчьн, бь к'ижани кӧ һун беә'сьлийе дькьн,

[40] бона кӧ һун бир биньн у бьqәдиньн һ'әму ә'мьред мьн у Хwәдейе хwәр'а пироз бьн.

[41] Әз Хӧдан Хwәдейе wә мә, кӧ һун жь wәлате Мьсьре дәрхьстьн, wәки бьбьмә Хwәдейе wә. Әз Хӧдан Хwәдейе wә мә».