<Жьмар 22

[1] Зар'ед Исраел р'ек'әтьн у ль дәштед Моwабда алийе р'оһьлата Урдӧне, пешбәри Әриһайе зомед хwә ледан.

[2] Wе һьнге Балаqе кӧр'е Сипор әв һ'әму чь кӧ Исраел ани сәр әморийа дит.

[3] Моwаб гәләки жь Исраел тьрсийа, чьмки әw бе һ'әсаб бу. Р'уйе зар'ед Исраелда Моwаб хофе да бу.

[4] У Моwаб готә р'успийед Мьдйане: «Әв щьмә'та һан һәр чь кӧ дора мә һәйә wе бьхwә, чаwа кӧ дәwар гиһайе чоле ләбәр дькә». Балаqе кӧр'е Сипор жи wе һьнге п'адше Моwабе бу.

[5] Әwи qасьд шандьнә ль щәм Бьламе кӧр'е Бәур ль Пьт'оре, кӧ дәве ч'әме Фьрате йә, ә'рде Бьне-Ә'мода гази wи кьр, гот: «Ва йә, мьләтәк жь Мьсьре дәрк'әтийә, р'уйе ә'рде иди ньхамтийә у әw пешбәри мьн щи-wар буйә.

[6] Аwа жь к'әрәма хwә wәрә бона хатьре мьн ньфьр'а ль wи мьләти бькә, чьмки әw жь мьн qәwаттьр ә, бәлки әзе һьнге бькарьбьм зора wи бьбьм у бәр'дьме жь ә'рде хwә дәрхьм. Чьмки әз заньм дӧайе тә дӧайә, ньфьр'а тә жи ньфьр'ә».

[7] Р'успийед Моwабе у р'успийед Мьдйане бь п'ешк'ешед бона сербазийе дәстед wанда чун. Һатьнә ль щәм Бьлам у хәбәред Балаq wир'а гьли кьрьн.

[8] Әwи готә wан: «Ишәв ль вьр бьминьн, әзе щаба wә бьдьм чаwа кӧ Хӧдан мьнр'а бежә». Wәк'илед Моwабе щәм Бьлам ман.

[9] Хwәде һатә щәм Бьлам, гот: «Әв мәрьвед һанә щәм тә, к'и нә?»

[10] Бьлам готә Хwәде: «Балаqе кӧр'е Сипор п'адше Моwабе әв хәбәр мьнр'а шандьнә:

[11] ‹Ва йә мьләтәк жь Мьсьре дәрк'әтийә у р'уйе ә'рде ньхамтийә. Аwа wәрә бона мьн ньфьр'а ль wи бькә, бәлки әзе бькарьбьм мьqабьли wи бькьмә шәр' у бәри wи дьм›».

[12] Хwәде готә Бьлам: «Т'әви wан нәчә, ньфьр'а ль wи мьләти нәкә, чьмки әw мьләта бӧһӧрти йә».

[13] Бьлам сьбәһе р'абу у готә wәк'илед Балаq: «Һәр'ьнә wәлате хwә, чьмки Хӧдан изьна мьн нә да кӧ т'әви wә бем».

[14] Wәк'илед Моwабе р'абун һатьнә ль щәм Балаq у готьн: «Бьлам qайл нәбу т'әви мә бе».

[15] Балаq диса жь wан гәләктьр у жь wан qәдьртьр wәк'ил шандьн.

[16] Әw һатьнә ль щәм Бьлам у готьне: «Балаqе кӧр'е Сипор һа гот: ‹Жь к'әрәма хwә, т'әхсир нәкә, wәрә,

[17] әзе qәдьр-һӧрмәтәкә мәзьн бона тә бькьм у чь кӧ бежи әзе бькьм, т'әне wәрә бона мьн ньфьр'а ль ви мьләти бькә.

[18] Бьлам щаба бәрдәстийед Балаq да у гот: «Дьхwази Балаq мала хwә т'ьжи зер' у зив бьдә мьн әз нькарьм сәр готьна Хӧдан Хwәдейе хwәр'а дәрбаз бьм кӧ тьштәки бьч'ук йан мәзьн бькьм.

[19] Ле һун жи ишәв ль вьр бьминьн у әзе бьзаньбьм к'а Хӧдан wе иди чь бежә мьн».

[20] Хwәде шәв һатә ль щәм Бьлам у готе: «Һәгәр әв мәрьвана һатьнә гази тә дькьн, р'абә т'әви wан һәр'ә, ле т'әне чь кӧ әзе тәр'а бежьм wе бькә».

[21] Бьлам сьбәһе р'абу т'ер'а к'әра хwә гьреда у т'әви wәк'илед Моwаб чу.

[22] Гава Бьлам дьчу һерса Хӧдан р'абу у мьлйак'әте Хӧдан ль сәр р'е чаwа п'ехәм сәкьни. Бьлам жи к'әра хwә дажот, һәр дӧ хӧламед wи жи т'әви wи бун.

[23] К'әр мьлйак'әте Хӧдан дит, кӧ ль сәр р'е сәкьни шуре wи жи тә'зи дестда, һьнге к'әр жь р'е дагәр'ийа у к'әтә дәште. Бьлам к'әре дьхьст кӧ дәрхә сәр р'е,

[24] мьлйак'әте Хӧдан ль шьвәр'ийа нава бахед тьрийада сәкьнибу, ви али диwар бу, wи али диwар бу.

[25] К'әре кӧ мьлйак'әте Хӧдан дит, хwә диwерва гӧһашт у ньге Бьлам жи диwерва һатә гӧһаштьне, әwи диса ле хьст.

[26] Мьлйак'әте Хӧдан жи пешда чу у щики ӧса тәнг сәкьни кӧ р'е т'ӧнә бу нә р'аст вәгәр'иньнә нә жи ч'әп.

[27] Гава к'әре мьлйак'әте Хӧдан дит бьн Бьламда мәр'ьхи, һерса Бьлам же р'абу у әwи к'әр да ль бәр шьва.

[28] Һьнге Хӧдан заре к'әре вәкьр у әwе готә Бьлам: «Мьн чь ль тә кьрийә wәки әва се щар ә тӧ мьн дьхи?»

[29] Бьлам готә к'әре: «Чьмки тә әз кьрьмә пек'әни, һәгәр дәсте мьнда шур һәбуйа мьне һәма ньһа жи тӧ бькӧштайи».

[30] К'әре готә Бьлам: «Әз әw к'әра тә ниньм кӧ тӧ т'әмамийа ә'мьре хwәда һ'әта р'ожа иро ле сийар дьби? Qәт буйә wәки әз һа биньмә сәре тә?» Әwи гот: «На».

[31] Һьнге Хӧдан ч'ә'вед Бьлам вәкьр у әwи мьлйак'әте Хӧдан ль сәр р'е, шуре тә'зи дәсте wида сәкьни дит, та бу у дәвәр'уйа чу.

[32] Мьлйак'әте Хӧдан готә wи: «Бона чь әва се щар ә кӧ тӧ к'әра хwә дьхи? Ва йә әз бәр тә бумә п'ехәм, чьмки р'ийа тә ль бәр мьн нә р'аст ә.

[33] К'әре әз дитьм у се щара жь р'ийа хwә дагәр'ийа. Һәгәр әwа жь р'е данәгәр'ийа, мьн ньһа ә'сә тӧ кӧштьбуйи у әwа сах һьштьбу».

[34] Бьлам готә мьлйак'әте Хӧдан: «Мьн гӧнә кьр, чьмки мьн ньзаньбу кӧ тӧ йи ль сәр р'е пешбәри мьн сәкьни. Аwа, һәгәр әв йәк ль бәр тә хwәш найе, әзе пашда вәгәр'ьм».

[35] Мьлйак'әте Хӧдан готә Бьлам: «Т'әви ван мәрьва һәр'ә ле т'әне чь кӧ әзе бежьмә тә wе бежә». Бьлам т'әви wәк'илед Балаq чу.

[36] Гава Балаq бьһист wәки Бьлам те, дәрк'әтә пешийа wи ль Ир-Моwабе, әw ль сәр лева синоре Арноне йә.

[37] Балаq готә Бьлам: «Нә мьн шандьнә пәй тә гази тә кьр, тӧ чьма нә дьһати щәм мьн? Дьбә әз нькарьбьм бьн qәнщийа тә дәрем?»

[38] Бьлам готә Балаq: «Ва йә әз һатьмә ль щәм тә, ле әз нькарьм хwә сәре хwә хәбәр дьм. Чь кӧ Хӧдан дайнә ль сәр заре мьн wе жи әзе бежьм».

[39] Бьлам т'әви Балаq чунә Qирйат-Һусоте.

[40] Балаq пәз у дәwар кьрьнә qӧрбан, Бьлам у wәк'илед т'әви wир'а шандьн.

[41] У сьбәһе Балаq Бьлам һьлда у әw һьлк'ьшийанә ль сәр Бамот'-Баә'л у жь wьр Бьлам п'арәкә щьмә'та Исраел дит.