<Жьмар 36

[1] Сәрwеред олк'ед малбәта зар'ед Гилә'де Махире кӧр'е Мьнашә жь малбәта зар'ед Усьв, һатьнә ль бәр Муса у сәрwеред олк'ед зар'ед Исраел, хәбәрдан

[2] у готьн: «Хӧдан хwәйе мәр'а ә'мьр кьр кӧ ә'рд чаwа мьлк', бь п'әшк авитьне, бьдә зар'ед Исраел. Хӧдан ӧса жи ә'мьри хwәйе мә кьр кӧ мьлк'е Сьлофһ'аде бьре мә бьдә qизед wи.

[3] Ле һәгәр әw т'әви йәки жь qәбиләкә дьнә зар'ед Исраел мер кьн, һьнге мьлк'е wан wе жь мьлк'е кал-бавед мә бе стандьне у ль мьлк'е wе qәбилер'а бе дайине к'ижанеда әwе мер кьн. Бь ви аwайи мьлк'е мәйи бь п'әшк станди wе кем бә.

[4] У сала р'аwастийейә зар'ед Исраел, мьлк'е wан wе бьгьһижә мьлк'е qәбила к'ижанеда кӧ әwе меркьн. Бь ви аwайи жь qәбила кал-бавед мә мьлк'е wан wе бе стандьне».

[5] Муса анәгори хәбәра Хӧдан ә'мьри зар'ед Исраел кьр у гот: «Qәбила зар'ед Усьв р'аст дьбежә.

[6] Аwа Хӧдан чь ә'мьр кьр бона qизед Сьлофһ'ад у гот: ‹Әw дькарьн wан мера бьстиньн, к'ижана кӧ әw бәгәм дькьн, ле т'әне жь qәбила малбәта баве хwә.

[7] Бона кӧ мьлк'е зар'ед Исраел жь qәбиләке дәрбази qәбиләкә дьн нәбә. Чьмки һәр кәсе жь зар'ед Исраел гәрәке мьлк'е qәбила кал-бавед хwәва бе гьредане.

[8] Һәр qиза хwәйимьлк' ль нава qәбилед зар'ед Исраелда гәрәке т'әви йәки жь малбәта qәбила баве хwә мер кә, бона кӧ зар'ед Исраел һәр кәс мьлк'е кал-бавед хwә wар бә.

[9] Мьлк'е qәбиләке дәрбази qәбиләкә дьн нәбә, чьмки һәр qәбила зар'ед Исраел гәрә мьлк'е хwәва гьредайи бә›».

[10] Чаwа кӧ Хӧдан ә'мьри Муса кьр, qизед Сьлофһ'ад ӧса жи кьрьн.

[11] Маһ'ла, Т'ирса, Һ'огла, Милк'а у Ноһа qизед Сьлофһ'ад кӧр'апед хwә стандьн.

[12] Wана меред жь малбәтед зар'ед Мьнашәйе кӧр'е Усьв стандьн. Бь ви аwайи мьлк'е wан ль нава qәбила малбәта баве wанда ма.

[13] Әв ьн әw qанун у диwан кӧ Хӧдан бь дәсте Муса ль дәштед Моwабеда, незики Урдӧне, пешбәри Әриһайе ә'мьри зар'ед Исраел кьр.