Жьмар 8
[1] Хӧдан Мусар'а хәбәрда у гот:
[2] «Һарунр'а хәбәр дә у бежә wи: ‹Гава тӧ ч'ьра саз ки, һәр һ'әфт ч'ьра гәрә пешийа шәмдане р'онайи кьн›.
[3] Һарун хут ӧса жи кьр, әwи ч'ьрайед шәмдане пешийа wе саз кьрьн, чаwа кӧ Хӧдан ә'мьр ль Муса кьрьбу.
[4] Шәмдан һа һатьбу чекьрьне: Жь бьнгәһа wе һ'әта кӧлиркед wе әw жь зер'е к'оланди бу. Анәгори щур'е кӧ Хӧдан нишани Муса кьрьбу хут ӧса әwи шәмдан чекьр».
[5] Хӧдан Мусар'а хәбәрда у гот:
[6] «леwийа жь нава зар'ед Исраел башqә кә у wан паqьж кә.
[7] Бона паqьжбуна wан аһа бькә: Ава паqьжкьрьне бьр'әшинә ль сәр wан, бьра әw бь дузен һ'әму пьр'ч'а ль сәр хwә һьлдьн, к'ьнщед хwә бьшон у әwе паqьж бьн.
[8] Бьра әw щанәгаки т'әви дийарийа wийә нани жь аре хаси р'унда стьрайи һьлдьн у щанәге дӧда жи бона дийарийа паqьжбуне тӧ һьлдә.
[9] Пәйр'а леwийа бинә ль бәр Коне Щьвине у т'әмамийа щьвата зар'ед Исраел бьщьвинә.
[10] леwийа бинә ль бәр Хӧдан у зар'ед Исраел бьра дәстед хwә дайньнә ль сәр леwийа.
[11] Һарун леwийа жь нава зар'ед Исраел ль бәр Хӧдан чаwа дийарийа һ'әжандьне бьдә, кӧ әw бьбьнә хьзмәтк'аре хәбата Хӧдан.
[12] Леwи жи бьра дәстед хwә дайньнә ль сәр сәре щанәга у бона к'әwандьна леwийа йәке чаwа дийарийа паqьжбуне бьдә, йе дьн жи чаwа дийарийа т'әвайишәwате Хӧданр'а.
[13] леwийа ль бәр Һарун у кӧр'ед wи бьдә сәкьнандьне у чаwа дийарийа һ'әжандьне бьдә Хӧдан.
[14] Бь ви аwайи леwийа жь нава зар'ед Исраел башqә кә. леwийе п'ара мьн бьн.
[15] Пәй ве йәкер'а леwийе бен Коне Щьвинеда бьхәбьтьн, гава тӧ wан паqьж ки у чаwа дийарийа һ'әжандьне бьди.
[16] Әw т'ам жь нава зар'ед Исраел мьнр'а һатьнә дайине, жь бәр һ'әму ньхӧрийед кӧ бәт'ьне вәдькьн аwа готи һ'әму ньхӧрийед жь зар'ед Исраел мьн әw хwәр'а һьлдан.
[17] Чьмки һ'әму ньхӧриед Исраел, жь мерьв гьрти һ'әта һ'әйwен п'ара мьн ьн. Ль wе р'ожа кӧ мьн һ'әму ньхӧрийед ә'рде Мьсьре qьр' кьрьн, мьн һьнге әw хwәр'а к'ьфш кьрьн.
[18] Мьн леwи жь бәр һ'әму ньхӧрийед зар'ед Исраелва һьлдан.
[19] У мьн леwи жь нава зар'ед Исраел данә Һарун у кӧр'ед wи, әw wанр'а һатьнә дайине бона кӧ дәwса зар'ед Исраел хьзмәтк'арийа Коне Щьвине бькьн, бона к'әwандьна гӧне зар'ед Исраел, wәки бәла ль нава зар'ед Исраел т'ӧнә бә wәхте кӧ зар'ед Исраел незики пирозийе бьн».
[20] Муса, Һарун у т'әмамийа щьвина зар'ед Исраел бона леwийа ӧса жи кьрьн. Анәгори һ'әму ә'мьред кӧ Хӧдан бона леwийа ль Муса кьрьбун, зар'ед Исраел ӧса жи кьрьн.
[21] леwийа хwә паqьж кьрьн, к'ьнщед хwә шуштьн у Һарун әw чаwа дийарийа һ'әжандьне ль бәр Хӧдан данә сәкьнандьне. Бона паqьжбуна wан Һарун к'әwандьн кьр.
[22] Пәй ве йәкер'а леwи һатьн хьзмәтк'арийа хwә бәр Һарун у кӧр'ед wи ль Коне Щьвинеда бькьн. Чаwа кӧ Хӧдан ә'мьр ль Муса кьрьбу бона леwийа, ӧса жи кьрьн.
[23] Хӧдан Мусар'а хәбәрда у гот:
[24] «Әва жь Леwийа дьк'әвә: Әw гәрәке жь бистпенщсалийе жортьр бен бьхәбьтьн, хьзмәтк'арийа Коне Щьвине бькьн.
[25] У пенщисалийа хwәда бьра әw хьзмәтк'арийе бьһельн у иди нәхәбьтьн.
[26] Әw дькарьн Коне Щьвинеда бь нобәдарийе бәрдәстийа бьрайед хwә бькьн, ле хьзмәтк'арийе нәкьн. Аһа бькә бона борще стуйе леwийа».