<Жьмар 24

[1] Бьлам дит wәки ль Хӧдан хwәш те Исраел бьмбарәк кә, мина бәре нәчу кӧ сербазийе бькә, ле бәре хwә да бәр'ийе.

[2] Бьлам сәре хwә бьльнд кьр у Исраел бь qәбилед хwә щи-wарбуйи дит, һьнге Р'ӧһ'е Хwәде һатә ль сәр wи.

[3] Әwи мәсәла хwә пешда ани у гот: «Аwа хәбәра Бьламе кӧр'е Бәур, хәбәра мере кӧ зәлал дьбинә.

[4] Хәбәра йе кӧ готьнед Хwәде дьбьһе, йе кӧ дитьнокед Йе Һәри Зор дьбинә, ч'ә'вед wи тенә вәкьрьне у әw та дьбә.

[5] Чаwа бәдәw ьн конед тә Аqуб! Щи-wаред тә Исраел!

[6] Чаwа нәwал әw фьрә дьбьн, чаwа бахче бәр дәве ч'ем, чаwа удед кӧ Хӧдан дач'ькандийә чаwа әрзед дәве аве.

[7] Ав жь ә'лбед wи дьһәр'ькә, т'охьме wи р'ьнд авадайи йә. П'адше wи wе Агаг дәрбазтьр бә, п'адшатийа wи wе бьльнд бә.

[8] Хwәде әw жь Мьсьре дәрхьст. Qәwата wи мина qәwата гайе бәйани йә. Әwе мьләтед дьжмьнед wи даqӧртинә у һәстуйед wан wе һурдәхwәши кә, бь тиред хwә wе лехә.

[9] Әw тәлийа, мина шер вәләзийа, чаwа макәшере кәс нькарә әwи р'акә. К'е тә бьмбарәк кә, wе бьмбарәк бә, к'е ньфьр'а ль тә бькә, wе ньфьр'е ль wи бә.

[10] Һьнге һерса Балаq ль Бьлам р'абу, әwи дәстед хwә һәв хьстьн у Балаq готә Бьлам: «Мьн гази тә кьр кӧ ньфьр'а ль дьжмьнед мьн бьки, ле дәwсе әва се щар ә тә әw бьмбарәк кьрьн.

[11] Ньһа бьр'әвә һәр'ә щийе хwә! Мьн гот әзе qәдьр-һӧрмәта мәзьн бона тә бькьм, ле ва йә Хӧдан әw йәк жь дәсте кьр».

[12] Бьлам готә Балаq: «Нә мьн qасьдед тәр'а жи хәбәрда у гот, к'ижан кӧ тә шандьбунә ль щәм мьн:

[13] ‹Дьхwази Балаq мала хwә т'ьжи зер' у зив бьдә мьн, әз нькарьм сәр готьна Хӧданр'а дәрбаз бьм, кӧ тьштәки qәнщ йан хьраб бь хwәстьна хwә бькьм. Чь кӧ Хӧдан бежә, әзе wе бежьм›.

[14] Ньһа әз дьчьмә ль щәм мьләте хwә, wәрә әзе тәр'а бежьм, кӧ р'оже бен әв мьләт wе чь бинә сере мьләте тә».

[15] Әwи мәсәла хwә пешда ани у гот: «Аwа хәбәра Бьламе кӧр'е Бәур, хәбәра мере кӧ зәлал дьбинә.

[16] Хәбәра йе кӧ готьнед Хӧдан дьбьһе, йе кӧ һаш жь занәбуна Йе Һәри Жорьн һәйә, йе кӧ дитьнокед Йе Һәри Зор дьбинә, ч'ә'вед wи тенә вәкьрьне у әw та дьбә.

[17] Әз wи дьбиньм, ле нә ньһа, ль wи дьньһер'ьм, ле нә незик. Стәйрке жь Аqуб дәрк'әвә, шьва п'адшатийе wе жь Исраел пешда бе, wе щеника Моwаб һурдәхwәши кә, һ'әму зар'ед Шет' qьр' кә.

[18] Әдоме бьбә wар, Сеһире бьбә wаре дьжмьнед хwә, Исраел жи wе сәр к'әвә.

[19] Жь Аqуб һ'акьме дәрк'әвә у йед жь бажер майи wе qьр' кә».

[20] Бьлам Амалек дит, мәсәла хwә пешда ани у гот: «Мьләте лапи пеш Амалек бу, ле ахьрийа wи qьр'бун ә».

[21] Qени дит, мәсәла хwә пешда ани у гот: «Щи-wаре тә qәдим ә, һелина тә ль сәр qәйайе һатийә данине.

[22] Qайинийе бе qьр'кьрьне, гава Ашур тә һесир бьбә».

[23] Бьлам мәсәла хwә пешда ани у гот: «К'е wе сах бьминә гава Хwәде ве йәке бькә?

[24] Гәмийе жь К'ит бен, wе Ашур у Әбәр бьзериньн, ле әw хwәха жи wе бе ӧндакьрьне».

[25] Бьлам р'абу у вәгәр'ийа чу щийе хwә, Балаq жи р'ийа хwәда чу.