<Жьмар 12

[1] Мәрйәм у Һарун мьqабьли Муса хәбәр дан, бона жьна к'ушийә станди (чьмки әwи жьна к'уши стандьбу).

[2] Wана гот: ‹Дьбә Хӧдан т'әне бь дәве Муса хәбәр да? Нә бь дәве мә жи хәбәр да?› У Хӧдан әw йәк бьһист.

[3] (Муса мәрьвәки гәләки шкәсти бу, жь һ'әму мәрьвед ль сәр р'уйе ә'рде гәләктьр).

[4] Ньшкева Хӧдан Муса, Һарун у Мәрйәмер'а хәбәр да: «Һун һәр сьсе дәренә ль Коне Щьвине» у һәр сьсе жи дәрк'әтьн.

[5] Хӧдан ль стуна ә'wрда пәйа бу ль бәр дәре Кон сәкьни, гази Һарун у Мәрйәме кьр у әw һәр дӧ жи дәрк'әтьн.

[6] Хӧдан гот: «Ньһа гӧһ бьдьнә хәбәред мьн. Һәгәр нава wәда п'ехәмбәр һәбә жи, әз, Хӧдан дитьнокеда wива ә'йан дьбьм у хәwнеда wир'а хәбәр дьдьм,

[7] ле т'әви Мусайе ә'вде хwә, ӧса ниньм, әw ль нава т'әмамийа мала мьнда йәки амьн ә.

[8] Т'әви wи әз р'у бь р'у хәбәр дьдьм, ашкәрә, нә бь мәсәла у әw дьлqе Хӧдан дьбинә. Һун чаwа нәтьрсийан кӧ мьqабьли ә'вде мьн Муса хәбәрдьн?»

[9] Һьнге һерса Хӧдан ль wан р'абу у һьшт чу.

[10] Гава ә'wр жь сәр Кон чу, аwа Мәрйәм мина бәрфа сьпи бь к'отибуне һатә ледане. Һарун дина хwә да Мәрйәме, ва йә әw к'оти буйә.

[11] Һарун готә Муса: «Хwәйе мьн, һиви дькьм! Мәр'а гӧнә һ'әсаб нәкә, гӧне кӧ мә бефә'мийа хwә кьр.

[12] К'әрәма хwә, бьра Мәрйәм нәбә мина wи мьрийе, кӧ чахе жь бәт'ьна дийа хwә дьк'әвә, ниве qальб иди п'уч'буйи йә».

[13] Муса ль бәр Хӧдан гьрийа, гот: «Йа Хӧдан, к'әрәма хwә, әз т'әwаqә дькьм, wе qәнщ кә!»

[14] Хӧдан готә Муса: «Һәгәр баве wе т'уйи р'уйе wе бькьра, гәло һьнге әw һ'әфт р'ожа гәрә шәрмийеда нәбуйа? Бьра әw һ'әфт р'ожа жь зоме дәр бе хwәйикьрьне, пәйр'а әwе бе qәбулкьрьне».

[15] У Мәрйәм һ'әфт р'ожа жь зоме дәр һатә хwәйикьрьне, мьләт р'е нәдьк'әт һ'әта кӧ Мәрйәм һатә qәбулкьрьне.

[16] Паше мьләт жь Һ'асероте р'е к'әт, һатә бәр'ийа Паране у зомед хwә ледан.