Жьмар 18
[1] Хӧдан готә Һарун: «Тӧ, кӧр'ед хwә у малбәта хwәва, һуне щабдаре нәһәqийа һьндава Пирозгәһеда бьн. Тӧ у кӧр'ед хwәва, һуне щабдаре нәһәqийа һьндава к'аһинтийа хwәда бьн.
[2] Ӧса жи бьрайед хwә йә жь qәбила Леwи, аwа готи бәрәка баве хwә незики хwә кә. Бьра әw бәр дәсте тә бьн у тәр'а qӧльх кьн. Тӧ у кӧр'ед хwәва гәрәке һуне ль бәр Коне Шә'дәтийе бьн.
[3] Бьра әw нобәдарийа тә бькьн у нобәдарийа т'әмамийа Кон бькьн, әв борще wан ә. Ле незики һащәтед щийе пироз у горигәһе нәбьн кӧ нә әw бьмьрьн нә жи һун.
[4] Бьра әw т'әви тә бьн у нобәдарийа Коне Щьвине бькьн, нава һ'әму шьхӧле Конда. Йәки дьн бьра незики wә нәбә.
[5] Бьра нобәдарийа щийе пироз у горигәһе бькьн. У wе иди хәзәб нәйе сәре зар'ед Исраел.
[6] Ва йә мьн бьрайед wә леwи жь нава зар'ед Исраел һьлдан, әw бона wә чаwа п'ешк'еш Хӧданр'а һатьнә дайине кӧ шьхӧле Коне Щьвине бькьн.
[7] Ле тӧ у кӧр'ед хwәва һун гәрә к'аһинтийа хwә хwәйи кьн, нава һ'әму шьхӧле горигәһеда у ӧса жи qӧльхе пьшт п'әр'деда. Әз шьхӧле к'аһинтийе п'ешк'еши wә дькьм, ле гава йәки дьн незик бә wе бе кӧштьне».
[8] Хӧдан готә Һарун: «Ва йә әз тә к'ьфш дькьм, кӧ хwәйитийа дийарийед мьнр'а дайи бьки. Жь һ'әму тьштед пирозә зар'ед Исраел әз п'аре дьдьмә тә у кӧр'ед тә чаwа qәйдә-qануна һ'әта-һ'әтайе.
[9] Әве бьбә п'ара тә жь тьштед һәрә пироз, жь дийарийед агьр: Һ'әму горийед wан аwа готи һәр дийарийа wанә нани, һәр дийарийа wанә паqьжбуне, һәр дийарийа wанә бәрвадайине, чь кӧ әwе дайньнә ль бәр мьн. Әwе бона тә у кӧр'ед тә йед һәрә пироз бьн.
[10] Wе щийе пирозда бьхwьн. Һәр qьсьме нерин дькарә wе бьхwә. Бьра әw бона тә пироз бә.
[11] Әв жи п'ара тә йә жь дийарийед wан: Һ'әму дийарийед һ'әжандьнейә зар'ед Исраел, әз wан дьдьмә тә, кӧр'ед тә у qизед тәйә т'әви тә, чаwа qәйдә-qануна һ'әта-һ'әтайе. Һәр кәсе паqьжи мала тәда бьра жь wе бьхwә.
[12] Һ'әму р'уне нуйи һәри qәнщ, һ'әму шәрава нуйә һәрә qәнщ у гәньме пешийейи кӧ әw дьдьнә Хӧдан әз wан дьдьмә тә.
[13] Бәред дәрәмәта пешьнә һәр тьшти кӧ ә'рде wанда нә к'ижана әwе Хӧданр'а биньн, бьра п'ара тә бә. Һәр кәсе паqьжи мала тәда дькарә wе бьхwә.
[14] Һәр тьште Хӧданр'а к'ьфшкьри ль Исраелда бьра п'ара тә бә.
[15] Һәр ньхӧрийе һәр бинбәри кӧ бәт'ьне вәдькә, жь мерьв у жь һ'әйwен к'ижан кӧ wе Хӧданр'а бьдьн, бьра п'ара тә бә. Ле тӧ гәрә жь бәр ньхӧрийе мерьвва у жь бәр ньхӧрийе һ'әйwане нә һ'әлалва qимәт бьстини.
[16] Йәк мәһийеда жь бәр wева бьстини, һәqе wе жи әв ә: пенщ шекьлед сьфьрә пирозгәһе. Шекьләк бист гер ә .
[17] Ле жь бәр ньхӧрийе бохва йан ньхӧрийе пезва йан ньхӧрийе бьзьнева нәстинә, әw пироз ьн. Хуна wан бьр'әшинә горигәһе у бәзе wан жи чаwа дийарийа шәwатейә бинхwәш бона Хӧдан бьди.
[18] Ле гоште wан бьра п'ара тә бә. Чаwа сәрсинге һ'әжандьне ӧса жи пила р'асте бьра п'ара тә бьн.
[19] Һәр дийарийед пироз кӧ зар'ед Исраел дийари Хӧдан дькьн, әз дьдьмә тә, кӧр'ед тә у qизед тәйә т'әви тә, чаwа qәйдә-qануна һ'әта-һ'әтайе. Әва пәймана хwе йә һ'әта-һ'әтайе ль бәр Хӧдан, бона тә у бона зӧр'әта тә т'әви тә».
[20] Хӧдан готә Һарун: «Ә'рде зар'ед Исраелда тӧ wар наби у п'ара тәйе нава wанда т'ӧнә бә. Әз ьм п'ара тә у wаре тә нава wанда.
[21] Ва йә, әз һәр дәһәка Исраел, чаwа wар дьдьмә зар'ед Леwи, жь бәр шьхӧле wани Коне Щьвинева.
[22] Бона кӧ зар'ед Исраел незики Коне Щьвине нәбьн кӧ wанр'а гӧнә нәйе һ'әсабе у әw нәмьрьн.
[23] Бьра леwи хwәха шьхӧле Коне Щьвине бькьн у хwәха жи щабдаре шашийе хwә бьн. Әва qәйдә-qануна һ'әта-һ'әтайе йә бона зӧр'әтед wә. Ле ль нава зар'ед Исраел wаре wан wе т'ӧнәбә,
[24] чьмки әз дәһәке кӧ зар'ед Исраел дийари Хӧдан дькьн, чаwа wар дьдьмә леwийа. Ләма мьн готә wан: ‹Ль нава зар'ед Исраел wаре wан wе т'ӧнә бә›».
[25] Хӧдан Мусар'а хәбәрда у гот:
[26] «леwийар'а хәбәр дә у бежә wан: ‹Гава һун жь зар'ед Исраел дәһәке бьстиньн, к'ижан кӧ мьн жь wан чаwа wар да wә, һьнге жь wе Хӧданр'а дийари бьдьн, аwа готи дәһека жь wе дәһеке.
[27] Әв дийарийа wә wәр'а wе бе һ'әсабе чаwа нан жь бедәре у чаwа шәрав жь һ'әwз.
[28] Һун жи ӧса дийари Хӧдан кьн, жь һ'әму дәһәкед хwә, йед кӧ һуне жь зар'ед Исраел бьстиньн. У жь wе дийарийа Хӧдан бьдьнә Һаруне к'аһин.
[29] Жь һ'әму п'ешк'ешед хwә һун гәрә һ'әму тьштед һәрә qәнщ башqә кьн у чаwа дийарийа пироз бьдьнә Хӧдан›.
[30] Бежә wан: ‹Пәй башqәкьрьна п'ара һәрә qәнщр'а, чь кӧ бьминә wе леwийар'а бе һ'әсабе чаwа бәр жь бедәре у шәрав жь һ'әwзе›.
[31] Әw һәqе wә йә, жь бәр шьхӧле wәва ль Коне Щьвинеда. Һун у малед wә дькарьн wе ль һәр щийи бьхwьн,
[32] wәр'а гӧнә wе нәйе һ'әсабе, чьмки һун йа һәрә qәнщ жь wе дьдьн. Бь ви аwайи тьштед пирозә зар'ед Исраел нәһ'әр'ьминьн wәки һун нәмьрьн›».