Q. Дӧщари 9
[1] Бьбьһе Исраел! Иро тӧ Урдӧнер'а дәрбаз дьби кӧ һәр'и у мьләтед тә мәстьр, тә qәwаттьр, бажаред мәзьнә һ'әта ә'змен суркьри wар би.
[2] Мьләте мәзьн у бьльнд, зар'ед әнаqийа, тә әw нас дькьрьн у бона wан тә бьһистьбу, кӧ те готьн: ‹К'е wе бәр зар'ед Әнаqийа тәйах кә?›
[3] Ле тӧ иро бьзаньбә кӧ Хӧдан Хwәдейе тә чаwа агьре п'әр'ьтандьне пешийа тәва дьчә. Әwе wан ӧнда кә, ль бәр тә та кә, те бәри wан ди у зутьрәки wан qьр' ки, чаwа кӧ Хӧдан готьбу тә.
[4] Гава кӧ Хӧдан Хwәдейе тә wан дури тә хә, дьле хwәда нәбежи: ‹Бона р'астийа мьн Хӧдан әз анимә ви wәлати ле wар бьм›. Ле бона нәһәqийа ван мьләта Хӧдан бәри wан дьдә.
[5] Нә бона һәqийа тә, нә жи р'астийа дьле тә тӧ дьчи wәлате wан wар би. Ле Хӧдан Хwәдейе тә бона нәһәqийа ван мьләта бәри wан дьдә жь бәр тә у бона созе хwә кӧ кал-бавед тә: Бьраһим, Исһаq у Аqубр'а сонд хwарьбу, бинә сери.
[6] Бьзаньбә! Хӧдан Хwәдейе тә нә бона р'астийа тә ви wәлате qәнщ дьдә тә кӧ ле wар би, чьмки тӧ мьләтәки сәрһ'ьшк и.
[7] Бькә бира хwә у бир нәкә кӧ тә бәр'ийеда чьqаси һерса Хӧдан Хwәдейе хwә р'акьрийә. Жь wе р'ожа кӧ тӧ жь wәлате Мьсьре дәрк'әти һ'әта һатьна wәйә ль ви щийи һун мьqабьли Хӧдан бун.
[8] Бәр ч'ийайе Һ'оребе wә Хӧдан һерс хьст. Һерса Хӧдан ль wә р'абу ӧса кӧ wи хwәст wә qьр' кә.
[9] Әз һьлк'ьшийамә сәре ч'ийе, wәки сәлед кәвьри, сәлед пәймана Хӧдан т'әви wә гьреда һьлдьм. Һьнге әз ль сәре ч'ийе чьл р'ожи у чьл шәви бе нан у бе ав мам.
[10] Хӧдан әw һәр дӧ сәлед кәвьрийә кӧ бь т'ьлийа Хwәде һатьбунә ньвисаре данә мьн. Һ'әму хәбәред кӧ Хӧдан ль сәре ч'ийе жь нава егьрда р'ожа щьвате готьбу wә, ль сәр wан бун.
[11] Бь ви аwайи хьлазийа ван чьл р'ож у чьл шәви Хӧдан әw һәр дӧ сәлед кәвьрийә пәймане данә мьн.
[12] Һьнге Хӧдан готә мьн: ‹Р'абә зу жь вьр пәйа бә, чьмки щьмә'та тә, к'ижан кӧ тә жь Мьсьре дәрхьст, жь р'е шьһ'ьти. Әw зу жь wе р'ийа кӧ мьн ль wан ә'мьр кьр хальфин, wана хwәр'а п'ут р'окьр›.
[13] Һьнге Хӧдан мьнр'а хәбәр да у гот: ‹Мьн дит әва мьләта, ва йә әw мьләтәки сәрһ'ьшк ә.
[14] Бьһелә әзе qьр'а wан биньм, наве wан бьн п'әр'е ә'зменда р'әсит кьм. Ле жь тә мьләтәки wан qәwаттьр у мәстьр пешда биньм›.
[15] Һьнге агьр ч'ийе к'әтьбу, әз вәгәр'ийам һәр дӧ сәлед пәйманейә кәвьри дәстед мьнда жь ч'ийе һатьмә харе.
[16] Мьн дит ва йә wә бәр Хӧдан Хwәдейе хwә гӧнә кьрийә, хwәр'а п'утәки гольке р'окьрийә. Һун зу жь wе р'ийа кӧ Хӧдан ль wә ә'мьр кьр хальфин.
[17] Мьн жи һәр дӧ сәл һьлдан, бь һәр дӧ дәстед хwә әw авитьн у ль бәр ч'ә'вед wә һурдәхwәши кьрьн.
[18] Мьн диса мина бәре хwә авитә ль бәр Хӧдан, чьл р'ож у чьл шәви, мьн нә нан хwар нә жи ав вәхwар, бона һ'әму гӧнед wә, бь к'ижана wә хьраби ль бәр Хӧдан кьр, һерса wи р'акьр.
[19] Әз жь һерс у хәзәба Хӧдан тьрсийам, чьмки һерса wи ль сәр wә р'абу у wи хwәст wә qьр' кә. Ле ве щаре жи Хӧдан дәнге мьн бьһист.
[20] У Хӧдан ль сәр Һарун гәләки һерс к'әт, хwәст к'ока wи бинә, ле мьн һьнге бона Һарун жи дӧа кьр.
[21] Мьн гӧне wә, әw голька wә чекьри һьлда у агьрда һ'әланд. Пәйр'а мьн әw шкенанд у һур-һури кьр кьрә т'оз. Мьн әw т'оз р'әшандә селафа кӧ жь ч'ийе дьк'ьшийа.
[22] Ль Т'авә'райе, Массаһе у ль Qиброт-Һат'аwайе жи wә һерса Хӧдан р'акьр .
[23] Һьнге Хӧдан һун жь Qадеш-Барнеайе шандьн у гот: ‹Һәвраз һәр'ьн у ә'рде кӧ әз дьдьмә wә ле wар бьн›. Ле һун мьqабьли готьна Хӧдан Хwәдейе хwә чун у wә баwәрийа хwә wи нә ани у гӧр'а wи нәкьр.
[24] Жь wе р'ожеда кӧ мьн һун нас кьрьнә, һун мьqабьли Хӧдан ьн.
[25] Әз нава wи чьл р'ож у чьл шәвида дәвәр'уйа к'әтьбумә ль бәр Хӧдан. Дәвәр'уйа ль бәр Хӧдан к'әтьбум чьмки Хӧдан дьхwәст qьр'а wә банийа.
[26] Мьн р'әща жь Хӧдан дькьр у дьгот: ‹Хӧдан Хwәйе мьн! Мьләте хwә, аwа готи wаре хwә qьр' нәкә, к'ижан тә бь мәзьнайийа хwә хьлаз кьр у жь Мьсьре бь дәсте зор дәрхьст.
[27] Бир бинә хӧламед хwә Бьраһим, Исһаq у Аqуб, дина хwә нәдә сәрһ'ьшки, нәһәqи у гӧне ви мьләти,
[28] wәки нәбә әw wәлате кӧ тә әм жь нава wи дәрхьстьн, бежә: «Хӧдан нькарьбу әw бьбьрана wи ә'рде кӧ wи соз дабу wан, ле әw бәр ч'ә'ве wи р'әш бун, ләма әw дәрхьстьн кӧ бәр'ийеда бькӧжә».
[29] Ле әw мьләте тә йә, wаре тә, к'ижан кӧ тә бь qәwата хwәйә мәзьн у бь зәнда хwәйә дьрежкьри дәрхьст›.