[1] Әв ьн qәйдә-qанун у qьраред кӧ һун гәрәке бькьн кӧ бьqәдиньн, ль сәр wи ә'рди к'ижан кӧ Хӧдан Хwәдейе кал-бавед тә wе чаwа мьлк' бьдә тә, һ'әму р'ожед кӧ һун ль сәр дьне бьжин.
[2] Әw һ'әму щийед wан мьләта кӧ һун дьчьне хwәр'а бькьнә мьлк', к'идәре әw хwәдейед хwәр'а qӧльх дькьн: Сәр ч'ийа-банийа, сәр гьра у бьн һәр дарәкә бь ч'ьqьл у бәлгада сьх т'әмами wеран кьн.
[3] Горигәһед wан wеран кьн, һ'әйкәлед wан һурдәхwәши кьн, Ашераһед wан бьшәwьтиньн, п'утед wан бьбьр'ьн у навед wан ль wи щийи р'әсит кьн.
[4] Һун мина wан Хӧдан Хwәдейе хwәр'а qӧльх нәкьн.
[5] Ле wи щийи кӧ Хӧдан Хwәдейе wә wе бьбьжерә, жь нава һ'әму qәбилед wәда кӧ ль wьр наве хwә ле дайнә, хwә ль wи щийи бьгьрьн у һәр'ьнә wьр,
[6] дийарийед хwәйә т'әвайишәwате, qӧрбанед хwә, дәһәкед хwә, дийарийед дәсте хwә, созед хwә, дийарийед хwәйә р'әзәдьлийе, ньхӧрийед пәз у дәwаред хwә бьбьнә ль wьр.
[7] Ль wьр бәр Хӧдан Хwәдейе хwә һун нәфәред хwәва бьхwьн у ша бьн, бона һәр кьрьна дәстед хwә кӧ Хӧдан Хwәдейед тә тӧ бьмбарәк кьри.
[8] Һун гәрә ван тьшта нәкьн, чаwа кӧ дьле wә дьхwазә, чь кӧ жь мә һәр кәс иро ль вьр дькә,
[9] чьмки һун һе нәк'әтьнә щийе р'ьһ'әтийе у wаре кӧ Хӧдан Хwәдейе тә дьдә тә.
[10] Гава һун Урдӧнер'а дәрбаз бьнә wи ә'рде кӧ Хӧдан Хwәдейе wә дьдә wә, хwәр'а бькьнә мьлк', әwе р'ьһ'әтийе бьдә wә жь һ'әму дьжмьнед дора wә, һьнге һуне бе qәзи бьжин.
[11] Wи щийе кӧ Хӧдан Хwәдейе wә wе бьбьжерә кӧ наве хwә ле дайнә, һәр тьшти бьбьнә wьр, чаwа кӧ әз т'әми ль wә дькьм, аwа готи: Дийарийед хwәйә т'әвайишәwате, qӧрбанед хwә, дәһәкед хwә, дийарийед дәсте хwә у һ'әму һ'әдийед хwәйә создайийә жьбарә, к'ижана кӧ һуне Хӧданр'а соз бьдьн.
[12] У ль бәр Хӧдан Хwәдейе хwә ша бьн, һун у кӧр'ед wә, qизед wә, хӧламед wә, щарийед wә, ӧса жи леwийе бажаред wәда, чьмки п'ар у wаре wи т'әви wә т'ӧнә.
[13] Һаш жь хwә һәбә дийарийед хwәйә т'әвайишәwате һәр щийе кӧ тә хwәш те нәки,
[14] ле т'әне wи щийи кӧ Хӧдане жь нава qәбиләкә тә бьбьжерә, ль wьр дийарийед хwәйә т'әвайишәwате у һәр тьшти чь кӧ әз ль тә ә'мьр дькьм бькә.
[15] Ле тӧ дькари ль һәр бажаре хwәда, wәкә wе бьмбарәкийа Хӧдан Хwәдейе хwә һ'әйwен сәржеки у гошт бьхwи, чаwа кӧ дьле тә хwәш те. Паqьж у нә паqьж дькарьн жь wи бьхwьн, мина кара хәзале у бьзьна к'уви.
[16] Т'әне хуне нәхwьн, wе мина аве бьр'ежьнә ль сәр ә'рде.
[17] Изьна тә т'ӧнә кӧ тӧ бажаред хwәда дәһәка гәньме хwә, мәйа хwә, бьзьре хwә, нә жи ньхӧрийед пәз-дәwаред хwә, һ'әму дийарийед хwәйә создайи, дийарийед хwәйә р'әзәдьлийе у дийарийед дәстед хwә бьхwи.
[18] Ле тӧ гәрә ван ль бәр Хӧдан Хwәдейе хwә ль wи щийи кӧ Хӧдан Хwәдейе тә wе бьбьжерә бьхwи. Бь ви аwайи, бона һәр кьрьна дәстед тә, тӧ т'әви кӧр'е хwә, qиза хwә, хӧламе хwә, щарийа хwә у леwийе бажаред хwәда ль бәр Хӧдан Хwәдейе хwә ша бьн.
[19] Һаш жь хwә һәбә wәки т'әмамийа р'ожед хwәда ль сәр ә'рде хwә бона леwи тӧ хәм бьки.
[20] Гава Хӧдан Хwәдейе тә синоре тә бәрфьрә кә, чаwа кӧ wи готә тә у дьле тә гошт бьхwазә у бежи: ‹Әзе гошт бьхwьм› һьнге чьqаси дьхwази гошт бьхwә.
[21] Ле һәгәр әw щийе кӧ Хӧдан Хwәдейе тә бьбьжерә бона кӧ наве хwә ле дайнә, гәләк дури тә бә, һьнге жь пәз у дәwаред хwә, к'ижан кӧ Хӧдан данә тә, чаwа кӧ мьн ль тә ә'мьр кьр сәржекә у бажаред хwәда чьqас кӧ дьле тә дьхwазә бьхwә.
[22] Т'әне wе чаwа кара хәзале у бьзьна к'уви дьхwьн ӧса бьхwә, паqьж у нә паqьж дькарьн wе бьхwьн.
[23] Ле нәби-нәби кӧ тӧ хуне бьхwи, чьмки хун ә'мьр ә, ә'мьр т'әви гошт нәхwи.
[24] Wе нәхwә, мина аве бьр'ежә ль сәр ә'рде.
[25] Wе нәхwә wәки тәр'а у пәй тәр'а жи зар'ед тәр'а qәнщ бә, һәгәр тӧ һәqийе ль бәр ч'ә'ве Хӧдан бьки.
[26] Т'әне дайинед хwәйә пироз йан создайи һьлдә wәрә ль wи щийи кӧ Хӧдане бьбьжерә.
[27] Дийарийед хwәйә т'әвайишәwате, аwа готи гошт у хуне, ль сәр горигәһа Хӧдан Хwәдейе хwә бьдә. Хуна qӧрбанед хwәйә дьн гәрә бьр'ежи ль сәр горигәһа Хӧдан Хwәдейе хwә у гошт бьхwи.
[28] Р'ьнд гӧһ бьдә һ'әму ван хәбәред кӧ әз ль тә ә'мьр дькьм, wәки тәр'а, пәй тәр'а жи зар'ед тәр'а qәнщ бә һ'әта-һ'әтайе, һәгәр һәqийе у р'астийе ль бәр ч'ә'ве Хӧдан Хwәдейе хwә бьки.
[29] Хӧдан Хwәдейе тә wан мьләтед пешийа тә кӧ тӧ дьчи бәри wан ди wе qьр' кә. Гава тә бәри wан да у ә'рде wан хwәр'а кьрә мьлк',
[30] һаш жь хwә һәбә кӧ тӧ п'егәһа wанда нәк'әви т'әле, гава әw ль бәр тә бенә qьр'кьрьне, хwәдейед wан нәгәр'и, бежи: ‹Әв мьләтана чаwа хwәдейед хwәр'а qӧльх дькьн? Әзе жи ӧса бькьм›.
[31] Тӧ Хӧдан Хwәдейе хwәр'а ӧса нәкә. Чьмки wана хwәдейед хwәр'а һ'әму щур'ә к'ьрети дькьрьн йед кӧ ль бәр Хӧдан р'әш ьн. Әw һ'әта кӧр' у qизед хwә жи ль сәр агьр хwәдейед хwәр'а дьшәwьтиньн.
[32] Һ'әму чь кӧ әз ль wә ә'мьр дькьм бькьн кӧ бьqәдиньн. Нә ль сәрда зедә кьн нә жи кем кьн.