[1] Әwе кӧ батийед wи п'әрч'ьqанди бьн, йан qамише wи бьр'и бә, бьра нәк'әвә нава щьвина Хӧдан.
[2] Зар'а жь qавийе буйи нькарә бьк'әвә щьвина Хӧдан, нә жи зӧр'әта wийә дәһа дькарә бьк'әвә нава щьвина Хӧдан.
[3] Амони у моwаби нькарә бьк'әвә нава щьвина Хӧдан, нә жи зӧр'әта wанә дәһа дькарә бьк'әвә нава щьвина Хӧдан.
[4] Чьмки wан һун бь нан у аве qәбул нәкьрьн ль сәр р'ийа кӧ һун жь Мьсьре дәрк'әтьн у wан Бьламе кӧр'е Бәур жь Пьт'ора Арам-Наһараиме мьqабьли тә к'ьре кьрьн, wәки ньфьр'а ль тә бькә .
[5] Ле Хӧдан Хwәдейе тә нәхwәст гӧһ бьдә Бьлам, Хӧдан Хwәдейе тә бона тә ньфьр' гӧһастә дӧа, чьмки Хӧдан Хwәдейе тә тә һ'ьз дькә.
[6] Т'әмамийа р'ожед ә'мьре хwәда, ә'дьлайе у чәрха р'аст wанр'а нәхwазә.
[7] Жь әдоми зьвер нәбә, чьмки әw бьрайе тә йә. Жь мьсьри зьвер нәбә, чьмки тӧ хәриб буйи wәлате wида.
[8] Зар'ед wанә зӧр'әта сьсийа дькарьн бьк'әвьнә нава щьвинә Хӧдан.
[9] Гава тӧ ордийева дәрк'әви мьqабьли дьжмьнед хwә, һ'әвза хwә жь һәр хьрабийе бькә.
[10] Һәгәр щәм тә мәрьвәк хәwнхапи бә, нә паqьж бә, бьра әw жь зоме дәрк'әвә дәр у нәк'әвә нава зоме.
[11] Бьра бәре еваре әw хwә бь аве бьшо у чахе кӧ р'о дьчә ава һьнге әw дькарә вәгәр'ә зоме.
[12] Гәрә жь зоме дәр щийе тә һәбә, wәки бькарьби ль wьр дәрейи дәр.
[13] Хенщи ч'әкед тә гәрәке берька тә жи һәбә у гава жь зоме дәрейи дәр, бь wе ч'ә'ләке вәдә у ә'дәба хwә ч'ә'л кә.
[14] Чьмки Хӧдан Хwәдейе тә ль нав зома тәда дьгәр'ә, wәки тә аза кә у дьжмьнед тә бьдә дәсте тә, бьра зома тә пироз бә, кӧ нәбә Хӧдан нава тәда тьштәки шәрми бьбинә у дури тә к'әвә.
[15] Гава хӧламәк жь хwәйе хwә бьр'әвә у һәwара хwә тә бинә, wи нәдә дәсте хwәйе wи.
[16] Бьра әw ль щәм тә, нава тәда бьжи, ль wи щийе кӧ әw ль нава бажаред тә йәкида бьбьжерә, к'идәре әw бьхwазә. Зә'мәте нәдә wи.
[17] Бьра ль нава qиз у кӧр'ед Исраелда хwәфрош т'ӧнә бьн.
[18] Бона т'ӧ ад-qьраре, qазьнща йа qав, йан йе куч'ьксан, нәби мала Хӧдан Хwәдейе хwә, чьмки һәр дӧ жи к'ьрети нә ль бәр Хӧдан Хwәдейе тә.
[19] Бь сәләфа нә п'әрә, нә нан, нә жи тьштед майин чь кӧ бь сәләф те дайине нәдә бьрайе хwәйи исраели.
[20] Бь сәләф дькари бьди йе хәриб, ле бь сәләф нәдә бьрайе хwә, wәки Хӧдан Хwәдейе тә тә бьмбарәк кә ль нава һ'әму кьрьна дәстед тә ль сәр ә'рде кӧ тӧ дьчи кӧ хwәр'а бьки мьлк'.
[21] Һәгәр тӧ Хӧдан Хwәдейе хwәр'а ад-qьрар ки, дәрәнги нәйехи кӧ бьqәдини, чьмки Хӧдан Хwәдейе тә wе жь тә ә'сә бьхwазә у гӧнәйе ль сәр тә бә.
[22] Ле һәгәр тә ад-qьрар нә кьрийә, һьнге гӧнәйе ль сәр тә т'ӧнәбә.
[23] Чь кӧ жь дәве тә дәрк'әтийә бькә. Чь кӧ тә Хӧдан Хwәдейе хwәр'а ад-qьрар кьрийә, чаwа дийарийа р'әзәдьлийе кӧ бь заре хwә готийә бьqәдинә.
[24] Гава бьк'әви нава бахе йәки дьн, тьрийа чьqаси кӧ дьле тә дьхwазә т'ер дькари бьхwи, ле нәки дәрдана хwә.
[25] Гава тӧ нава зәвийа йәки дьнр'а һәр'и, тӧ дькари сьмбьла бь дәсте хwә бьчини, ле дә'се зәвийа wи нәхи.