[1] Әв ьн хәбәред пәймане кӧ Хӧдан ль ә'рде Моwабеда ль Муса ә'мьр кьр т'әви зар'ед Исраел гьредә, хенщи пәймана кӧ wи ль Һ'оребе т'әви wан гьреда.
[2] Муса гази т'әмамийа Исраеле кьр у готә wан: «Һ'әму чь кӧ Хӧдан ль wәлате Мьсьреда ль бәр ч'ә'вед wә ани сәре Фьрәwьн у һ'әму хӧламед wи, ӧса жи сәре т'әмамийа ә'рде wи, wә дит,
[3] аwа готи әw щер'ьбандьн, нишан у к'әрәмәтед мәзьнә кӧ ч'ә'вед тә дитьн.
[4] Ле Хӧдан һ'әта р'ожа иро дьле фә'мкьрьне, ч'ә'вед дитьне у гӧһед бьһистьне нәда wә.
[5] Хӧдан чьл сали бәр'ийеда р'ебәрийа wә кьр: К'ьнщед ль сәр wә кәвьн нәбун, солед ньге wәда жи нәмашийан,
[6] wә нә нан хwар нә шәрав нә жи ава щәһе вәхwар, кӧ һун бьзаньбьн әз Хӧдан Хwәдейе wә мә.
[7] Һун һатьнә ви щийи у Сихоне п'адше Һ'әшбоне, Оге п'адше Башане дәрк'әтьнә мьqабьли мә шер' у мә әw алт' кьрьн.
[8] Мә ә'рде wан зәфт кьр у чаwа мьлк' да р'убенийа, гадийа у ниве qәбила Мьнашә.
[9] Дә хәбәред ве пәймане хwәйи кьн у wан бьqәдиньн, wәки нава һәр тьштида чь кӧ һун бькьн wәр'а ль һәв бе.
[10] Һун т'әмам иро ль бәр Хӧдан Хwәдейе хwә сәкьнинә: Сәрwеред wә, qәбилед wә, р'успийед wә, сәрәскәред wә, һәр мере Исраел,
[11] зар'ед wә, к'ӧлфәтед wә у хәрибе ль нава зоме тәда, жь дарбьр'е тә һ'әта авк'еше тә,
[12] бона кӧ тӧ бьк'әви пәйман у ад-qьраре т'әви Хӧдан Хwәдейе хwә, к'ижан кӧ Хӧдан Хwәдейе тә иро т'әви тә гьредьдә.
[13] Wәки иро тә хwәр'а бькә мьләт, әw жи тәр'а бьбә Хwәде, чаwа кӧ wи готә тә у чаwа кӧ wи кал-бавед тә Бьраһим, Исһаq у Аqубр'а сонд хwар.
[14] Нә т'әне т'әви wә Хӧдан ве пәйман у ад-qьраре гьредьдә,
[15] ле т'әви wан жи йед кӧ иро ль вьр т'әви мә ль бәр Хӧдан Хwәдейе мә сәкьнинә у т'әви wан жи, йед кӧ иро ль вьр т'әви мә ниньн.
[16] Һун заньн wәлате Мьсьреда мә чаwа дьжит у чаwа әм жи жь нава мьләтр'а дәрбаз бун,
[17] wә р'обәтийед wан у п'утед wанә дар, кәвьр, зив у зер' нава wан дитьн.
[18] Нәбә кӧ нава wәда һәбә мер йан жьн, мал йан qәбил дьле к'ижани иро дури Хӧдан Хwәдейе мә к'әвә, wәки һәр'ә хwәдейед wан мьләтар'а qӧльх кә. Аwа готи нава wәда ви щур'әйи р'аwе кӧ жә'ре у зьрич'ке дьдә дәр т'ӧнәбә.
[19] Гава йәк гӧһ бьдә хәбәред ве ад-qьраре у хwәда гӧман бә, бежә: ‹Wәки ль гора сәрһ'ьшкийа хwә жи әз һәр'ьм әзе диса сах-сьламәт бьм›. Бь ви щур'әйи, йе т'ер wе т'әви йе бьр'чи ӧнда бә.
[20] Хӧдан wе т'ӧ щар нәбахшинә wи, чьмки һьнге һерс у к'ин-боха Хӧдан wе р'абә ль сәр wи мәрьви, һ'әму ньфьр'е ве к'ьтебеда ньвиси wе ль wи бьн у Хӧдан wе наве wи жь бьн п'әр'е ә'зменда р'әсит кә.
[21] Хӧдан wе wи жь һ'әму qәбилед Исраел бона бәла башqә кә, анәгори һ'әму ньфьр'ед ве пәймане кӧ ве к'ьтеба qанунеда ньвисар ьн.
[22] У ньсьле пәйр'а, аwа готи зар'ед wә кӧ wе пәй wәр'а бьбьн, ӧса жи хәрибе кӧ wе жь wәлате дур бе, wе wеранбун у нәхwәшийед ви ә'рди бь к'ижана Хӧдан лехьст бьбиньн, бежьн:
[23] ‹Т'әмамийа ә'рд бь к'ьрк'ут у хwе шәwьтийә, нә те чандьне нә жи шин дьбә, ль сәр wе т'ӧ шинайи шин набә, мина ӧндакьрьна Содом, Гомора, Адма у Сьбойиме, к'ижан кӧ Хӧдан бь һерс у к'ин-боха хwә wеран кьр›.
[24] Һ'әму мьләт wе бежьн: ‹Чьма Хӧдан һа ани сәре ви ә'рди? Мә'на ве һерса мәзьн чийә?›
[25] У wе бежьн: ‹Бона кӧ wан пәймана Хӧдан Хwәдейе кал-бавед хwә һьштьн, к'ижан кӧ wи т'әви wан гьреда, гава әw жь ә'рде Мьсьре дәрхьстьн.
[26] Әw чун у хwәдейед башqәр'а qӧльх кьрьн, бәр wан та бун, хwәдейед кӧ нә wан нас дькьр нә жи Хӧдан wанр'а к'ьфш кьр.
[27] Бь ви аwайи һерса Хӧдан ль сәр wи ә'рди р'абу кӧ һ'әму ньфьр'ед ве к'ьтебеда ньвиси бинә ль сәре wи.
[28] Хӧдан бь һерс, к'ин-бох у хәзәба мәзьн әw жь wәлате wан р'аwва дәрхьст, әw авитьнә wәлате башqә, мина р'ожа иройин›.
[29] Тьштед вәшарти, йед Хӧдан Хwәдейе мә нә, ле йед ә'йан бона мә у зар'ед мә нә һ'әта-һ'әтайе, wәки һ'әму хәбәред ве qануне бьqәдиньн.