Q. Дӧщари 3
[1] Әм вәгәр'ийан у р'ийа Башанеда һәвраз чун. Оге п'адше Башане т'әмамийа мьләте хwәва Едрәйеда дәрк'әтә мьqабьли мә шер'.
[2] Хӧдан готә мьн: ‹Жь wи нәтьрсә, чьмки әз әwи т'әви һ'әму мьләте wи, ә'рде wи дьдьмә дәсте тә. Те ӧса бини сәре wи, чаwа кӧ тә ани сәре Сихоне п'адше әморийа кӧ Һ'әшбоне дьма›.
[3] Хӧдан Хwәдейе мә, Оге п'адше Башане у һ'әму мьләте wи данә дәсте мә. Мә ӧса wи хьст кӧ т'ӧ кәс жь wан сах нә ма.
[4] Wе һьнге мә һ'әму бажаред wан зәфт кьрьн, бажар нәмабу кӧ мә һьлнәдабуйа, аwа готи шест бажар, т'әмамийа qәза Аргове, п'адшатийа Оге Башане.
[5] Һ'әму әв бажар бь суред бьльнд, щот дәргәһа у зәр'зава qәwаткьри бун, хенщи гәләк гӧндед бе сур.
[6] Мә әw wеран кьрьн, әw т'ам дийари Хӧдан кьрьн, чаwа кӧ мә ани сәре Сихон п'адше Һ'әшбоне, һәр бажар т'әви жьн, мера у зар'а wеран кьрьн.
[7] Ле һ'әму һ'әйwан у т'алан жь wан бажара мә хwәр'а һьлдан.
[8] Wи чахи мә ә'рде алийе р'оһьлата Урдӧне жь селафа Арноне һ'әта ч'ийайе Һәрмоне жь дәсте дӧ п'адшед әморийа станд.
[9] (сайдани Һәрмонер'а Сирйон дьбежьн, әмори жи Сәнир дьбежьн.)
[10] Һ'әму бажаред дәшта ч'ийе у т'әмамийа Гилә'д, т'әмамийа Башане һ'әта Салк'айе у Едрәйе, бажаред п'адшатийа Ог ль Башане мә һьлда.
[11] (Чьмки жь р'ьфайийа т'әне Оге п'адше Башане мабу. Ва йә дарбәста wийә һ'әсьни ньһа Р'аббайеда щәм зар'ед амонийа йә, дьрежайа wе нәһә зәнд ә, бәрайа wе чар зәнд ә, зәнде гьһиштийа.)
[12] Wе һьнге мә әw ә'рд хwәр'а кьрә мьлк'. Ә'роһер незики селафа Арноне у ниве ч'ийайед Гилә'де т'әви бажаред wи мьн да р'убенийа у гадийа.
[13] Чь кӧ жь Гилә'де мабу у т'әмамийа Башана п'адшатийа Ог мьн да ниве qәбила Мьнашә. (Т'әмамийа qәза Аргове ль т'әмамийа Башанеда дьһатә навкьрьне чаwа ә'рде р'ьфайийа.
[14] Йаире кӧр'е Мьнашә т'әмамийа qәза Аргове һ'әта синоре гьшурийа у маһахатийа һьлда. Әwи Башан бь наве хwә Һ'авот Йаир нав кьр кӧ һ'әта иро әw нава ль сәр ә).
[15] Гилә'д мьн да Махир .
[16] Жь Гилә'д һ'әта селафа Арноне мьн да р'убенийа у гадийа. Синоре wан әв ьн: Жь нава селафа Арноне һ'әта селафа Йабоqе кӧ синоре кӧр'ед Амон ә,
[17] у ӧса жи дәшта Ә'раба, синоре Урдӧнева жь Хьннерете һ'әта Бә'ра Ә'рабайе аwа готи Бә'ра Мьри , алийе р'оһьлате бәр п'ала Ашдод Писгайе.
[18] Wе һьнге мьн ль wә ә'мьр кьр, гот: ‹Хӧдан Хwәдейе wә әв ә'рд да wә кӧ һун wи хwәр'а бькьнә мьлк'. Аwа һун һ'әмуйед шәр'к'ар, ч'әке хwә гьредьн пешийа бьрайед хwә зар'ед Исраел һәр'ьн.
[19] Т'әне жьн-зар'ед wә, һ'әйwанед wә (әз заньм кӧ һ'әйwанед wә гәләк ьн) бьра wан бажарада кӧ мьн данә wә бьминьн,
[20] һ'әта кӧ Хӧдан р'ьһ'әтийе нәдә бьрайед wә, мина wә. Гава әw ә'рде кӧ Хӧдан Хwәдейе wә дьдә wан алийе р'оавайа Урдӧне хwәр'а бькьнә мьлк', һьнге бьра һәр кәс жь wә вәгәр'ә ль сәр мьлк'е хwә, к'ижан кӧ мьн данә wә›.
[21] Wе һьнге мьн ль Йешу ә'мьр кьр у гот: ‹Ч'ә'вед тә һәр тьшт дитьн, чь кӧ Хӧдан Хwәдейе wә ани сәре wан һәр дӧ п'адша. Хӧдан wе ӧса жи бинә сәре wан һ'әму п'адшатийа нава к'ижанар'а те дәрбаз би.
[22] Жь wан нәтьрсьн, чьмки Хӧдан Хwәдейе wә хwәха шәр' дькә бона wә›.
[23] Wе дәме мьн р'әща жь Хӧдан кьр у гот:
[24] ‹Хӧдан, Хwәйе мьн! Тә дәстпекьр мәзьнайийа хwә у дәсте хwәйи qәwат нишани хӧламе хwә кьр. К'ийә әw хwәдейе ә'зманада у сәр ә'рде, кӧ мина шьхӧл у кьред зорә кӧ тӧ дьки, бькә?
[25] Р'әща дькьм бьһелә әз дәрбаз бьм, wи ә'рде qәнщи алийе р'оавайа Урдӧне, wан ч'ийайед qәнщ у Лӧбнане бьбиньм›.
[26] Ле Хӧдан бона wә сәр мьн һерс к'әт у дәнге мьн нә бьһист. Хӧдан готә мьн: ‹Бәс ә! Вьр шунда бона wе йәке иди мьнр'а нәбежә!
[27] Һьлк'ьшә сәре Писгайе, сәре хwә бьльнд кә бакӧр у башур, р'оһьлат у р'оава пе ч'ә'вед хwә бьбинә, чьмки те жь Урдӧне дәрбаз нәби.
[28] Ль Йешу ә'мьр кә, дьл бьдә ль бәр wи у бьшьдинә, чьмки әwе пешийа ви мьләтива һәр'ә у wи ә'рди к'ижани те бьбини wанр'а бькә мьлк'›.
[29] У әм ль нәwала пешбәри Бет'-П'ьһоре ман.