[1] Бьра п'ар у wар бона леwийе к'аһин у т'әмамийа qәбила Леwи т'әви Исраел т'ӧнә бә. Бьра әw жь горишәwатед Хӧданр'а дайи бьхwьн кӧ мьлк'е wан ә.
[2] Wаре wи ль нава бьрайед wи т'ӧнәбә. Хӧдан ә wаре wи, чаwа кӧ Хӧдан готьбу wи.
[3] У аwа чь кӧ гәрә мьләт бьдә к'аһина: Жь горийед кӧ тенә дайине га йан пәз, гәрә пиләке, чәнгийа у һ'ур бьдә к'аһин.
[4] Бәред дәрәмәта пешьн жь гәньме хwә, жь мәйа у бьзьре хwә у бьр'ина пешьн ә пәзед хwә бьдә wи.
[5] Чьмки Хӧдан Хwәдейе тә әw жь нава һ'әму qәбилед тә бьжарт, wәки әw кӧр'ед хwәва һәр т'ьм ль бәр Хӧдан нава qӧльхкьрьнеда бьн.
[6] Һәгәр леwик жь бажарәки нава т'әмамийа Исраел к'идәре әw дьминә бь р'әзәдьлийа хwә щигӧһасти бә ль wи щийе кӧ Хӧдан бьбьжерә
[7] у наве Хӧдан Хwәдейе хwәр'а qӧльх кә, чаwа кӧ т'әмам бьрайед wийә леwи, кӧ ль wьр ль бәр Хӧдан сәкьнинә.
[8] Әw гәрәке хӧрәке хwә wәкә леwийед майин бьстинә, wе нәйе һ'әсабе кӧ әwи һәбука хwә фьротийә у дестда һәйә.
[9] Гава тӧ бьк'әви ә'рде кӧ Хӧдан Хwәдейе тә дьдә тә, һини к'ьретикьрьна wан мьләта нәбә.
[10] Бьра нава тәда йе ӧса т'ӧнә бә, йе кӧ кӧр' йан qиза хwә нава егьрр'а дәрбаз дькә , нә к'оч'әк, нә сербаз, нә р'ә'мьлдар, нә жи пирәсер,
[11] нә ньфьр'кьр, нә йе кӧ гази р'ӧһ'а дькә, нә хwәйиһ'ӧньр, нә жи йе кӧ гази мьрийа дькә.
[12] Чьмки ль бәр ч'ә'ве Хӧдан йе кӧ ве йәке дькә к'ьрет ә у бона ван к'ьретийа Хӧдан Хwәдейе тә жь бәр тә бәри wан мьләта дьдә.
[13] Ле тӧ бәр Хӧдан Хwәдейе хwә к'амьл бә.
[14] Чьмки әв мьләтед кӧ тӧ бәри wан дьди, әw гӧр'а сербаз у к'оч'әка дькьн ле Хӧдан Хwәдейе тә әв йәк нә дайә тә.
[15] Хӧдан Хwәдейе тә wе жь нава тә у бьрайед тә п'ехәмбәрәки мина мьн бона тә дәрхә. Гӧр'а wи бькьн.
[16] Аwа чь кӧ тә ль бәр Һ'оребе р'ожа щьвате жь Хӧдан Хwәдейе хwә хwәст у гот: ‹Бьра иди дәнге Хӧдан Хwәдейе хwә нәбьһем у әв агьре мәзьн нәбиньм wәки әз нәмьрьм›.
[17] Хӧдан готә мьн: ‹Qәнщ ә чь кӧ wан гот.
[18] Әзе жь нава мьләте wан п'ехәмбәрәки мина тә wанр'а дәрхьм, әзе хәбәред хwә дайньмә сәр заре wи у әзе чь ль wи ә'мьр кьм әwе wанр'а бежә.
[19] У әw мәрьве кӧ гӧр'а хәбәред мьн нәкә, аwа готи wан хәбәред кӧ п'ехәмбәре бь наве мьн бежә, әзе жь wи мәрьви бьхwазьм.
[20] Ле әw п'ехәмбәре кӧ тӧрӧш кә бь наве мьн тьштәки бежә кӧ мьн ль wи ә'мьр нәкьрийә wәки бежә, йан әwе кӧ бь наве хӧданед башqә хәбәр дә, әw п'ехәмбәр гәрә бьмьрә›.
[21] У һәгәр тӧ дьле хwәда бежи: ‹Чаwа әме те дәрхьн кӧ әв хәбәра нә жь Хӧдан ә?›
[22] Һәгәр п'ехәмбәр бь наве Хӧдан хәбәр дә, ле әw хәбәр нәйе сери, wәки ӧса йә әw хәбәр нә жь Хӧдан ә. П'ехәмбәр әw йәк жь дәст к'ӧбарийе готийә, жь wи нәтьрсә.