[1] Әв ә әw дӧа бь к'ижани Мусайе мәрьве Хwәде бәри мьрьна хwә дӧа ль зар'ед Исраел кьр.
[2] У гот: «Хӧдан жь Синайе һат, жь Сеһире wанва шәwq да, жь ч'ийайе Паран wанва хӧйа бу әw т'әви беһ'әсаб пироза һат, жь дәсте wийи р'асте агьре qануне бона wан алав да.
[3] Р'асти Хwәде мьләта һ'ьз дькә, һ'әму пирозед wи дәстед тәда нә, wан хwә авитьнә ль п'ийед тә у wе гӧһ бьдьнә готьнед тә.
[4] Муса qанун ль мә ә'мьр кьр, wар бона щьмә'та Аqуб.
[5] Хӧдан бу п'адше Йешуруне гава сәрwеред щьмә'те т'әви qәбилед Исраел щьвийа бун.
[6] Бьра бьжи Р'убен у нәмьрә, ле бьра һ'әсабе wи кем бә».
[7] Әв жи бона Щьһуда гот: «Бьбьһе Хӧдан дәнге Щьһуда у wи бинә ль щәм щьмә'та wи, бьра бь дәстед хwә шәр'е хwә бькә тӧ жи бьби алик'аре wи жь дьжмьнед wи».
[8] Бона Леwи гот: «Урим у Тумиме тә ль щәм мәрьве тәйи хwәдехоф бә, йе кӧ тә ль Массаһе щер'ьбанд, т'әви к'ижани бәр авед Мерибаһе к'әти һ'ӧщәте.
[9] Йе кӧ бона де у баве хwә дьбежә: ‹Мьн хәмк'ешийа wан нәкьр›, бьрайед хwә qәбул нәкьр у зар'ед хwә нас нә кьр , чьмки әw готьна тә дьqәдиньн у пәймана тә хwәй дькьн.
[10] Әw Аqуб һини qьраред тә дькьн, Исраел жи һинкьрьна тә, бьхуре датиньн ль бәр тә, qӧрбане т'әвайишәwате жи ль сәр горигәһа тә.
[11] Дӧа ль qәwата wи бькә Хӧдан, кьред дәсте wи qәбул кә. Пьшта дьжмьнед wи qат кә ӧса кӧ йед дьжәньнә wи р'анәбьн».
[12] Бона Бьнйамин гот: «Һ'ьзкьрийе Хwәде wе бе qәзи бьжи, Йе Һәри-Зор т'әмамийа р'оже хwәйитийа wи дькә. Әw ль нава гьред wи дьжи».
[13] Бона Усьв гот: «Дӧайе Хӧдан ль ә'рде wи бә, бь qьр'авийа qәнщә жь ә'змен, бь ава бебьнийайейә жер һәр'ьки,
[14] бь дайина бәред qәнщә жь тә'ве, бь дайина дәрәмәтед qәнщә жь мәһа.
[15] Жь тьштед бьжартийә ч'ийайед кәвьн у тьштед qәнщә гьред һ'әта-һ'әтайе.
[16] Бь дайина qәнщә ә'рде т'ьжи, бь к'әрәма йе кӧ нава к'ола стьруйе бу . Бьра әw бенә сәре Усьв, ль сәр ә'нийа бьжартийе ль нава бьрада.
[17] Мәзьнайийа wи мина ньхӧрийе бох, стьруйед wи мина стьруйед гайе бәйани, йәк дәһә һ'әзаред Әфрайим ә, йәк жи һ'әзаред Мьнашә йә, бь wан әwе мьләта һәвр'а һ'әта сәре дьне бьдә'финә».
[18] Бона Зәбулон гот: «Ша бә Зәбулон, дәрк'әтьна хwәр'а, Исахар жи ль нава чадьред хwә да.
[19] Әwе мьләта гази ль сәр ч'ийе бькьн, ль wьр әwе горийед р'аст бьдьн. Чьмки жь дәwләмәндтийа бә'ра әwе бьхwьн у хьзнед ль нава qумеда вәшарти».
[20] Бона Гад гот: «Бьмбарәк ә йе кӧ синоре Гад фьрә дькә, Гаде чаwа шер р'ьһ'әт бә, мьл у т'әпа сери дьдьр'инә.
[21] Әwи тьште һәри qәнщ хwәр'а бьжарт, чьмки wир'а п'ара сәрwер һатә к'ьфшкьрьне, әw т'әви сәрwеред мьләт һат р'астийа Хӧдан у диwанед wи т'әви Исраел бьк'ар ани».
[22] Бона Дан гот: «Дан щәwрьке шера йә кӧ жь Башане банздьдә».
[23] Бона Нәфтәли гот: «Нәфтәли херхwәзийева дагьрти йә, бьмбарәкийа Хӧданва т'ьжи йә, р'оһьлат у башуре wар бә».
[24] Бона Ашер гот: «Жь нава кӧр'ада Ашер һәри бьмбарәк ә, бьра һ'ьзкьрийе бьрайед хwә бә у ньге хwә р'унда кә.
[25] Зәр'зед дәрийед тә һ'әсьн у сьфьр ьн, у qәwата тә wәкә р'ожед тә бә».
[26] «Мина Хwәде Йешурун т'ӧнәйә, бона алик'арийа тә ль ә'змен сийар дьбә нава нур-р'умәта хwә ль сәр ә'wр.
[27] Хwәдейе һ'әта-һ'әтайе кәла йә, мьлед wийә һ'әта-һ'әтайе алик'ар ьн, әwи дьжмьнед тә жь бәр тә р'аqәтандьн, гот: ‹Qьр' кә!›
[28] Исраел беqәзи, башqә дьжи, канийа Аqуб wе ә'рде гәньм у шәраведа бә, жь ә'зманед wи qьр'ави те харе.
[29] Хwәзи ль тә Исраел! К'е йә мина тә? Мьләте бь дәсте Хӧдан хьлазбуйи, мәрт'ал, алик'ар у шуре нур-р'умәта тә әw ә, дьжмьнед тә wе ль бәр тә та бьн, тӧйе п'ейи ль сәргьрке мьлед wан бьки».