<Q. Дӧщари 7

[1] Гава Хӧдан Хwәдейе тә тә бьбә wи ә'рде кӧ тӧ дьчуйи ле wар би, әwе гәләк мьләт жь бәр тә р'аqәтинә: Һ'итийа, гиргашийа, әморийа, кәнанийа, пьриззийа, һ'иwийа, йәбусийа, һ'әфт мьләтед жь тә гәләктьр у зортьр.

[2] К'әнге Хӧдан Хwәдейе тә wан бьдә дәсте тә, тӧ wан хи, һьнге т'ам qьр'а wан бинә ньфьр'е Хӧдан бинә сери, т'әви wан пәймане гьренәдә у һ'әйфа тә ль wан нәйе.

[3] Пьсмамтийе wанр'а нәкә, qизед хwә нәдьнә кӧр'ед wан у нә жи qизед wан кӧр'ед хwәр'а бьхwазьн,

[4] чьмки әwе кӧр'ед тә жь мьн бьхальфиньн у wе п'утед башqәр'а qӧльх кьн, һьнге һерса Хӧдан wе ль сәр wә р'абә, әwе тә зутьрәке ӧнда кә.

[5] Ле аһа сәре wан бькьн: горигәһед wан wеран кьн, һ'әйкәлед wан һурдәхwәши кьн, Ашераһед wан бьбьр'ьн у п'утед wан бьшәwьтиньн.

[6] Чьмки тӧ Хӧдан Хwәдейе хwәр'а мьләтәки бӧһӧрти-жьбарә йи. Хӧдан Хwәдейе тә тӧ бьжарти, wәки жь нав һ'әму мьләтед ль сәр т'опа дьне, тӧ бьби мьләт wийи мьлк'е wи.

[7] Хӧдан һун нә бона п'ьр'анийа wәйә жь һ'әму мьләта бәгәм кьрьн у бьжартьн, чьмки һун жь һ'әму мьләта һьндьктьр ьн.

[8] Ле чьмки Хӧдан һун һ'ьз кьрьн у ӧса жи бона qәдандьна сонде хwә, к'ижан кӧ wи кал-бавед wәр'а сонд хwар, һун бь дәсте зор дәрхьстьн у тӧ жь мала хӧламтийе, жь дәсте Фьрәwьн п'адше Мьсьре азакьри.

[9] Бьзаньбә кӧ Хӧдан Хwәдейе тә, әw ә Хwәде, Хwәдейе амьн, кӧ пәйман у һ'ӧба хwәйә амьн һ'әта һ'әзар ньсьли хwәй дькә, бона wан, йед кӧ wи һ'ьз дькьн у ә'мьред wи дьqәдиньн.

[10] Ле хут wан кӧ дьжәньнә wи wәкә ә'мәлед wан wе wан ӧнда кә, әw дәрәнги найехә wе зутьрәки wәкә ә'мәлед wан хут бьдә wан.

[11] Тӧ ван ә'мьр, qәйдә-qанун у qьрара хwәй кә, к'ижана кӧ әз иро ль тә ә'мьр дькьм кӧ бьqәдини.

[12] Һәгәр һун ван qьрара бьбьһен, хwәй кьн у бьqәдиньн, һьнге Хӧдан Хwәдейе тә wе бона тә пәйман у амьнийа хwә хwәй кә, бона к'ижана кӧ wи кал-бавед тәр'а сонд хwар.

[13] Әwе тә һ'ьз бькә, wе дӧа ль тә бькә, тә ль һәв зедә кә. Wе дӧа бәре зьке тә у бәре ә'рде тә, гәньм у шәрава тә, бьзьре тә, зайина пәз-дәwаред тә бькә, ль сәр ә'рде кӧ wи кал-бавед тәр'а сонд хwар бьдә тә.

[14] Жь һ'әму мьләта зедәтьр дӧайе ль тә бә, нә нава тәда нә жи нава һ'әйwанед тәда бебәр wе т'ӧнә бьн.

[15] Хӧдан wе һәр нәхwәшийе дури тә хә, т'ӧ ешәкә хьрабә Мьсьре к'ижан кӧ тӧ зани, wе нәйнә сәре тә. Ле wан wе бинә ль сәре wан һ'әмуйед кӧ дьжәньнә тә.

[16] Те һ'әму мьләтед кӧ Хӧдан Хwәде дьдә дәсте тә, ӧндаки, бьра һ'әйфа тә ль wан нәйе, хwәдейед wанр'а qӧльх нәки, чьмки әw йәк бона тә т'әлә йә.

[17] Бәлки тӧ дьле хwәда бежи: ‹Әв мьләтана жь мьн гәләктьр ьн, чаwа әз дькарьм бәри wан дьм?›

[18] Жь wан нәтьрсә. Чь кӧ Хӧдан Хwәдейе тә ани сәре Фьрәwьн у т'әмамийа Мьсьре,

[19] әw щер'ьбандьнед мәзьн кӧ тә бь ч'ә'вед хwә дитьн, нишан, к'әрәмәт, дәсте qәwат у зәнда дьрежкьри, бь к'ижана Хӧдан Хwәдейе тә тӧ дәрхьсти р'ьнд бир бинә. Ӧса жи Хӧдан Хwәдейе тә wе бинә сәре wан мьләта жь к'ижана кӧ тӧ дьтьрси.

[20] Хӧдан Хwәдейе тә wе тьрс у хофе жи бьшинә сәр wан, һ'әта кӧ йед майи у йед хwә жь тә вәшарти нәмьрьн.

[21] Жь wан нәбьздә, чьмки Хӧдан Хwәдейе тә кӧ нава тәда йә, Хӧдане мәзьн у хоф ә.

[22] У Хӧдан Хwәдейе тә һеди-һеди wе ван мьләта жь бәр тә р'аqәтинә. Тӧ нькари wана щарәкер'а ӧнда ки, wәки тәрәwьлед чоле ль сәр тә зедә нәбьн.

[23] Хӧдан Хwәдейе тә wе wан бьдә дәсте тә, wе т'әвиһәвбунәкә мәзьн бькә нава wан, һ'әта кӧ qьр'а wан бе.

[24] П'адшед wан wе бьдә дәсте тә, те наве wан жь бьн п'әр'е ә'зменда ӧнда ки, т'ӧ кәсе ль бәр тә тәйах нәкә, һ'әта кӧ тӧ wан qьр' нәки.

[25] П'утед хwәдейед wан бьшәwьтиньн, дьлһавьжийа зер' у зиве сәр wан нәкә у wан хwәр'а һьлнәди, wәки бь ве йәке нәк'әви т'әле, чьмки әw ль бәр Хӧдан Хwәдейе тә к'ьрети йә.

[26] Нә жи к'ьретийе бьби мала хwә кӧ мина wе ньфьр' ль тә бә у qьр'а тә бе. Жь wе зьвер бә, бьра әw бона тә к'ьрети бә, чьмки әw гәрә бе ӧндакьрьне кӧ ньфьр'е Хӧдан бе сери.