[1] Wе һьнге Хӧдан готә мьн: ‹Хwәр'а дӧ сәлед кәвьри мина йе бәре бьт'әр'ьшинә у һьлк'ьшә сәре ч'ийе щәм мьн, ӧса жи сьндоqәкә дарин чекә.
[2] У әзе ль сәр сәла, wан хәбәред кӧ ль сәр сәлед пешийейә кӧ тә шкенандьн бьньвисьм у wан бькә һьндӧр'е сьндоqе›.
[3] Һьнге мьн сьндоq жь дара дарщеwийе чекьр, дӧ сәлед кәвьри мина йе бәре т'әр'ьшандьн у әw һәр дӧ сәл дәстед мьнда һьлк'ьшийамә сәре ч'ийе.
[4] Әw дәһә т'әмийед кӧ Хӧдан ль сәре ч'ийе жь нава егьрда р'ожа щьвате готә wә, әwи әw ль сәр сәла ньвисин, чаwа кӧ бәре ньвисибу. Хӧдан әw данә мьн
[5] у әз вәгәр'ийам жь ч'ийе һатьмә харе. Сәл кьрьнә һьндӧр'е сьндоqа мьнә чекьри, әw ль wьр ман чаwа кӧ Хӧдан ль мьн ә'мьр кьр.
[6] (Һьнге зар'ед Исраел жь Берот'-Бьне-Йаһакане чунә Мосерайе. Ль wьр Һарун мьр у wьр һатә дәфьнкьрьне, дәwса wи Елазаре кӧр'е wи бу к'аһин.
[7] Жь вьр чунә Гудгодаһе, жь Гудгодаһе чунә Йотбат'айе ә'рде ньхалед ава.
[8] Wи чахи Хӧдан qәбила Леwи башqә кьр кӧ Сьндоqа Пәймана Хӧдан бьбьн, ль бәр Хӧдан бьсәкьньн, wир'а qӧльх кьн у бь наве wи бьмбарәк кьн, һ'әта р'ожа ироин.
[9] Ләма п'ар у мьлк'е Леwи т'әви бьрайед wи т'ӧнә. Хӧдан хwәха йә мьлк'е wи, чаwа кӧ Хӧдан Хwәдейе тә готьбу wи .)
[10] Әз жи мина бәре чьл р'ож у чьл шәви ль сәре ч'ийе бум. Ве щаре жи Хӧдан дәнге мьн бьһист у Хӧдан нәхwәст qьр'а тә бинә.
[11] У Хӧдан готә мьн: ‹Р'абә р'ек'әвә пешийа мьләтва һәр'ә, бьра әw һәр'ьн ә'рде кӧ мьн кал-бавед wанр'а сонд хwар бьдьмә wан, хwәр'а бькьнә мьлк'›.
[12] Хӧдан Хwәдейе тә ньһа чь жь тә дьхwазә Исраел? Әw т'әне дьхwазә кӧ тӧ жь Хӧдан Хwәдейе хwә бьтьрси, һ'әму р'ийед wида һәр'и, wи һ'ьз бьки у wир'а qӧльх ки, бь т'әмамийа дьле хwә у бь т'әмамийа нәфса хwә,
[13] ә'мьр у qәйдә-qанунед Хӧдан хwәйи ки, к'ижан кӧ әз ньһа бона qәнщийа тә ль тә ә'мьр дькьм.
[14] Ә'зман у ә'змане ә'змана, ә'рд у һ'әму чь ль сәр ә йе Хӧдан Хwәдейе тә йә,
[15] ле Хӧдан т'әне кал-бавед тә бәгәм кьрьн, әw һ'ьз кьрьн, пәй wанр'а жи зӧр'әтед wан бьжартьн аwа готи һун, жь нава һ'әму мьләта, мина р'ожа иройин.
[16] Ньһа гӧр'а Хӧдан бькьн у вьр шунда сәр һ'ьшк нибьн.
[17] Чьмки Хӧдан Хwәдейе wә, әw Хwәдейе хwәдейа йә, Хwәйе хwәйа йә, Хwәдейе мәзьн, qәwат у саw ә. Фьрqийе накә у р'ӧшәте жи һьлнадә.
[18] Әw һәqийе ль сеwи у жьнәбийа дькә, йе хәриб һ'ьз дькә у wан нан у к'ьнщ дькә.
[19] Ӧса жи һун хәриба һ'ьз бькьн, чьмки һун хwәха жи хәриб бун wәлате Мьсьреда.
[20] Жь Хӧдан Хwәдейе хwә бьтьрсә, хӧламтийе wир'а бькә, хwә wи бьгьрә у бь наве wи сонд бьхwә.
[21] Пәсьна бьдә wи, әw ә Хwәдейе тә, к'ижани бона тә әw кьред мәзьн у һ'әйрә-һ'ӧжмәк'ар кьрьн, к'ижан кӧ тә бь ч'ә'вед хwә дитьн.
[22] Бь һ'әфте нәфси кал-бавед тә бәржери Мьсьре бун, ле ньһа Хӧдан Хwәдейе тә, тӧ мина стәйркед ә'змен бе һ'әсаб кьри.