[1] Гава Хӧдан Хwәдейе тә qьр'а wан мьләта бинә, ә'рде к'ижана Хӧдан Хwәдейе тә дьдә тә хwәр'а бьки мьлк' у бажар, малед wанда щи-wар би,
[2] һьнге жь нава wи ә'рде кӧ Хӧдан Хwәдейе тә дьдә тә хwәр'а бьки мьлк', хwәр'а се бажара башqә ки.
[3] Р'ийа wан чекә. Т'әмамийа ә'рде хwә, к'ижан кӧ Хӧдан Хwәдейе тә мьлк' дьдә тә, бәлайи ль сәр се п'ара кә. Бь ви аwайи һәр меркӧж дькарә бьр'әвә ль ван бажара йәки.
[4] Аwа к'ижан меркӧж дькарә бьр'әвә ль wьр у сах бьминә: Йе к'ӧ мәрьвәки бе һ'әмде хwә бькӧжә, кӧ нә дӧһӧ нә жи пер дьжмьне һәв нибунә.
[5] Гава мәрьвәк т'әви йәки дьн һәр'ә мешә дара бьбьр'ә у гава балт'ә бьльнд кә дар бьбьр'ә, балт'ә жь дәсту дәрк'әвә һәвале wи к'әвә әw бьмьрә, әв мәрьв бьра бьр'әвә ль wан бажара йәки у wе сах бьминә.
[6] Һәгәр р'е гәләк дьреж бә, йе һ'әйфа хуне һьлдә wе бь һерса дьле хwә пәй меркӧж к'әвә wи бьгьрә у бькӧжә, ле әw нә һежайи мьрьне бу, чьмки нә дӧһӧ нә жи пер әw дьжмьне һәв нибунә,
[7] ләма әз ль тә ә'мьр дькьм, дьбежьм: ‹Се бажара хwәр'а башqә кә›.
[8] Гава Хӧдан Хwәдейе тә синоре тә бәрфьрә кә, чаwа кӧ wи кал-бавед тәр'а сонд хwар у т'әмамийа ә'рде кӧ соз да, бьдә кал-бавед тә бьдә тә,
[9] һәгәр ван һ'әму ә'мьра баш хwәйи ки, чаwа кӧ әз иро ль тә ә'мьр дькьм, Хӧдан Хwәдейе хwә һ'ьз бьки у һ'әму р'ожед ә'мьре хwәда р'ийед wида һәр'и, се бажаред дьн жи ль сәр ван һәр се бажара зедә ки.
[10] Бь ви аwайи бьра хуна йе бе сущ ль нава ә'рде тәда, к'ижан кӧ Хӧдан Хwәдейе тә мьлк' дьдә тә, нәйе р'етьне у хуна wи ль сәр тә нәбә.
[11] Ле һәгәр йәк йәки дьнр'а дьжмьнатийе бькә, хwә ль wи бьтәлинә, р'абә ле хә бькӧжә у бьр'әвә ль ван бажара йәки,
[12] р'успийед бажаре wи бьра бьшиньн у wи жь wьр биньн, бьдьнә дәсте йе кӧ һ'әйфа хуне wе һьлдә, wәки әw бе кӧштьне.
[13] Бьра һ'әйфа тә ль wи нәйе, йе кӧ хуна бе сущ Исраеледа р'етийә, әwи бьдә һьлдане. Бь ви аwайи wе тәр'а qәнщ бә.
[14] Синоре нава мьлк'е хwә у щинаре хwә, к'ижан кӧ кал-бавед тә данинә ль wи ә'рде кӧ Хӧдан Хwәдейе тә дьдә тә хwәр'а бьки мьлк', щи нәләqини.
[15] Шә'дәк т'әне нькарә мьqабьли мәрьвәки кӧ һәр щур'ә хьраби йан гӧнә кьрийә бьсәкьнә. Бь дәве дӧ йан се шә'да һәр тьшт бьра бе избаткьрьне.
[16] Һәгәр шә'дәки нәр'аст мьqабьли йәки дьн дәре у бь мьхәнәтийе шькийате wи бькә,
[17] әв һәр дӧ мәри кӧ һәвр'а к'әтьнә дә'wе, бьра ль бәр Хӧдан, ль бәр к'аһин у һ'акьмед wан р'ожа, бьсәкьньн.
[18] Һ'акьм бьра баш ә'нәнә кьн, һәгәр дәрәwийа шә'дә бе гьртьне, әwи дәрәw мьqабьли бьре хwә шә'дәти дайә,
[19] һьнге чь кӧ wи бьре хwәр'а дьхwәст, биньнә сәре wи. Бь ви аwайи хьрабийе жь нава хwәда р'аwва дәрхә.
[20] Йед майин wе бьбьһен у бьтьрсьн, иди wе хьрабийа ӧса ль нава тәда нәкьн.
[21] Бьра һ'әйфа тә ә'мьр жь бәр ә'мьрва, ч'ә'в жь бәр ч'ә'вва, дьран жь бәр дьранва, дәст жь бәр дәства, ньг жь бәр ньгва нәйе.