[1] Га йан бәрха бь qӧсур йан жи бь һәр щур'ә кемаси, Хӧдан Хwәдейе хwәр'а qӧрбан нәдә, чьмки әw бона Хӧдан Хwәдейе тә к'ьрети йә.
[2] Һәгәр ль нава тәда, ль нава бажаред тә йәкида, к'ижан кӧ Хӧдан Хwәдейе тә дьдә тә, мерәк йан жьнәк хьрабийе ль бәр ч'ә'ве Хӧдан Хwәдейе тә бькә, пәймана wи бьт'әр'ьбинә,
[3] р'абә һәр'ә хwәдейед башqәр'а qӧльх кә, ль бәр тә'ве, йан һиве, йан һ'әму нәхшед ә'змен та бә кӧ Хwәде ә'мьр нәкьрийә,
[4] гава тә пе бьһ'әсиньн йан тӧ бьбьһейи, баш ә'нәнә кә. Һәгәр әw ӧса йә, р'аст ә әw к'ьрети ль нава Исраелда буйә,
[5] һьнге wи мери йан wе жьне, к'ижани кӧ әw хьраби кьрийә, дәрхә ль бәр дәргәһед хwә у бьдә ль бәр кәвьра, wәки әw бьмьрә, һәгәр мер бә йан жьн бә.
[6] Бь готьнед дӧ-се шә'да йе һежайи мьрьне бе кӧштьне. Бь готьна шә'дәки нәйе кӧштьне.
[7] Пешийе дәсте шә'да гәрә ль сәр wи бьльнд бьн бькӧжьн, паше дәсте т'әмамийа щьмә'те. Бь ви аwайи хьрабийе ль нава хwәда р'аwва дәрхә.
[8] Гава пьрсед щур'ә-щур'ә qәт'ьлкьрьне, йан һәвр'ьк'ийе, йан зийанкьрьне нава бажаред тәда шәр'-дә'w пешда бен у бона тә зә'мәт бә кӧ сафи ки, һьнге р'абә һәр'ә ль wи щийе кӧ Хӧдан Хwәдейе тә wе бьбьжерә.
[9] Һәр'ә ль щәм леwийед к'аһин у һ'акьме wан р'ожа бьпьрсә, әwе диwана р'аст тәр'а бежьн.
[10] Анәгори готьна wанә жь wи щийе кӧ Хӧдане бьбьжерә бькә, бькә кӧ бьqәдини һ'әму чь кӧ әw нишани тә бькьн.
[11] Бь wе һинкьрьна кӧ әw тә һин кьн у бь qьрара кӧ әw тәр'а бежьн бькә. Жь wе хәбәра кӧ әwе бежьнә тә нә ч'әп дагәр'ә нә жи р'аст.
[12] Ле мәрьве кӧ к'ӧбар бә, гӧр'а к'аһине кӧ ль wьр Хӧдан Хwәдейе тәр'а qӧльх дькә, йан гӧр'а һ'акьм нәкә бьра әw мәрьв бе кӧштьне. Бь ви аwайи хьрабийе р'аwва жь нава Исраел дәрхә.
[13] Т'әмамийа мьләт wе бьбьһе, бьтьрсә у wьр шунда wе к'ӧбар нибә.
[14] Гава тӧ һәр'и wи ә'рде кӧ Хӧдан Хwәдейе тә дьдә тә хwәр'а бьки мьлк' у ль wьр бьжийи, те бежи: ‹Әзе мина һ'әму мьләтед дора хwә п'адша ль сәр хwә к'ьфш кьм›.
[15] П'адше кӧ Хӧдан Хwәдейе тә wе бьбьжерә wи ль сәр хwә к'ьфш кә, жь нава мьләте хwә, wи ль сәр хwә к'ьфш кә. Тӧ нькари хәрибәки, кӧ нә жь бьратийа тә йә, ль сәр хwә п'адша к'ьфш ки.
[16] Т'әне бьра әw хwәр'а һәспа зедә нәкә у мьләт вәнәгәр'инә Мьсьре бона зедәкьрьна һәспа. Чьмки Хӧдан готә wә: ‹Т'ӧ щар иди ве р'ейеда вәнәгәр'ьн›.
[17] Нә бьра к'ӧлфәт зедә кә, wәки дьле wи нәхальфә у нә жи бьра зер' у зив хwәр'а гәләки зедә кә.
[18] Гава әw р'уне ль сәр т'әхте п'адшатийа хwә, бьра әw хwәр'а жь к'ьтеба ван qануна, к'ижан кӧ ль щәм леwийед к'аһина йә, к'ьтебәке хwәр'а жь бәр wе бьньвисә.
[19] Бьра әw ль щәм wи бә у бьра wе бьхунә т'әмамийа р'ожед ә'мьре хwәда, wәки әw һин бә бьтьрсә жь Хӧдан Хwәдейе хwә кӧ һ'әму ван хәбәред qануне, ван qәйдә-qануна хwәйи кә у бьqәдинә.
[20] Wәки дьле wи ль сәр бьрайед wир'а к'ӧбар нәбә у әw жь ви ә'мьри нә ч'әп дагәр'ә нә жи р'аст. Бь ви аwайи әw у кӧр'ед wи wе дьреж п'адшатийа хwә ль нава Исраел бькьн.