[1] Гава йәк жьнәке хwәр'а бьхwазә бьзәwьщә, пәйр'а сәр wе кемасике бьбинә у әwа ль wи хwәш нәйе, бьра к'ахаза жьнбәр'дане жер'а бьньвисә бьдә дәсте wе у wе жь мала хwә дәрхә.
[2] Һәгәр жьн жи жь мала wи дәрк'әвә һәр'ә у мерәки дьн бьстинә,
[3] ль wи мери жи хwәш нәйе, әw жи к'ахаза жьнбәр'дане жер'а бьньвисә бьдә дәсте wе у wе жь мала хwә дәрхә, йане жи әw мере дӧда к'ижани әw хwәр'а хwәст бьмьрә,
[4] һьнге мере wейи пешийе, йе кӧ әw бәр'дабу, нькарә диса wе бьстинә кӧ әw бьбә жьна wи, пәй р'обәтбуна wер'а, чьмки әва йәка к'ьрети йә ль бәр Хӧдан. Нәһ'әр'ьминә ә'рде кӧ Хӧдан Хwәдейе тә wар дьдә тә.
[5] Йе ну зәwьщи бьра нәчә әскәрийе у бьра т'ӧ борщ нәйе данине ль сәр wи, бьра әw саләке бона мала хwә аза бә у бьра жьна хwәйә хwәсти ша кә.
[6] Бьра т'ӧ кәс нә дәстар' нә жи кәвьре wейи бьни к'әфил һьлнәдә, чьмки йе кӧ ве йәке дькә әw нәфсәке к'әфил һьлдьдә.
[7] Гава ә'йан бә wәки мәрьвәк жь бьрайед хwә йәки исраели бьдьзә, wи бькә хӧлам у бьфьрошә, бьра әw дьз бе кӧштьне. Бь ви аwайи хьрабийе жь нава хwәда р'аwва дәрхә.
[8] Мьqати хwә бә бона к'отибуне, чь кӧ к'аһинед леwи ль wә ә'мьр кьн, qәнщ хwәй кьн у бьqәдиньн, чаwа кӧ мьн ль wан ә'мьр кьрийә qәнщ хwәй кьн.
[9] Бир бинә Хӧдан Хwәдейе тә р'ева чь ани сәре Мәрйәме гава кӧ һун жь Мьсьре дәрк'әтьн .
[10] Гава тӧ тьштәки дәйни дьди йәки дьн, нәк'әвә мала wи wәки к'әфил жь wи бьстини.
[11] Ле дәре мале бьсәкьнә у әwе кӧ тӧ дәйни дьдейи бьра әw хwәха к'әфил дәрхә дәре мале.
[12] Һәгәр әw мәрьвәки к'әсиб ә, к'әфиле wи аwа готи п'оте wи һьлнәдә р'анәзе.
[13] Гава р'о дьчә ава, тӧ ә'сә к'әфиле wи ль wи вәгәр'ини, wәки әw бь п'оте хwә п'алдә р'азе. Һьнге wе дӧа ль тә бькә у әв йәке тәр'а р'асти бе һ'әсабе ль бәр Хӧдан Хwәдейе тә.
[14] Һәгәр тӧ к'әсиб-к'усибе жь бьрайед хwә, йан хәрибе ль нава ә'рд у бажаре хwәда к'ьре ки, wи нәешини.
[15] Һәр р'ож бәри р'очуйине һәqе wи бьди, чьмки әw к'әсиб ә у нәфса wи һәqва гьредайи йә, нәбә wәки әw һәwара хwә Хӧдан бинә бона тә у гӧнә ль сәр тә бә.
[16] Бав гәрә дәwса зар'а нәйенә кӧштьне, нә жи зар' дәwса баве бенә кӧштьне, һәр кәс бона гӧнәйе хwә гәрә бь кӧштьне.
[17] Һәqийа хәриб йан сеwи нәт'әр'ьбинә у к'ьнща жьнәбийе к'әфил һьлнәдә.
[18] Бир бинә wәки тӧ хӧлам буйи Мьсьреда, Хӧдан Хwәдейе тә тӧ жь wьр аза кьри, бона ве йәке әз ль тә ә'мьр дькьм кӧ тӧ ӧса бьки.
[19] Гава тӧ зәвийа хwә бьдьруйи у гӧр'зәке ль ә'рде хwәда бир бьки, пашда вәнәгәр'и кӧ wе һьлди, бьра әw бона хәриб, сеwи у жьнәбийе бә, wәки Хӧдан Хwәдейе тә, нава һәр хәбата дәстед тәда тә бьмбарәк кә.
[20] Гава тӧ даред хwәйә зәйт'уне даwшини, щара дӧда даwнәшини, бьра әw бона хәриб, сеwи у жьнәбийе бә.
[21] Гава тӧ тьрийе бахе хwә бәрәв ки, пәйр'а чь кӧ майә бәрәв нәкә, бьра әw бона хәриб, сеwи у жьнәбийе бә.
[22] Бир бинә wәки тӧ ль wәлате Мьсьреда хӧлам буйи, бона ве йәке әз ль тә ә'мьр дькьм кӧ тӧ ӧса бьки.