[1] Муса чу у әв хәбәрана т'әмамийа Исраелева ә'йан кьрьн
[2] у готә wан: «Әз иди сәдбист сали мә, нькарьм һәр'ьм у бем, Хwәде жи готә мьн: ‹Тӧ ч'әме Урдӧнер'а дәрбаз наби›.
[3] Хӧдан Хwәдейе тә wе хwәха пешийа тәва һәр'ә, әwе ван мьләта жь бәр тә ӧнда кә у те щийе wан хwәр'а бьки мьлк'. Йешуйе пешийа тәва һәр'ә, чаwа кӧ Хӧдан готьбу.
[4] Хӧдане ӧса бина сәре wан, чаwа кӧ ани сәре п'адшед әморийа, Сихон у Ог, ӧса жи ә'рдед wан, qьр'а к'ижана әwи ани.
[5] Хӧдане wан бьдә дәстед wә у һун анәгори wан һ'әму ә'мьред кӧ мьн ль wә ә'мьр кьрьн биньнә сәре wан.
[6] Qәwат у ә'гит бьн, жь wан нәтьрсьн у нәбьздьн, чьмки Хӧдан Хwәдейе тә хwәха т'әви тә те, әw дури тә нак'әвә у тә бәр'надә».
[7] Муса гази Йешу кьр у ль бәр ч'ә'ве т'әмамийа Исраеле готә wи: «Qәwат у ә'гит бә, чьмки те т'әви ви мьләти бьк'әви ә'рде кӧ Хӧдан кал-бавед wанр'а сонд хwар бьдә wан у те wи ә'рди wанр'а бьки мьлк'.
[8] Ле Хӧдан хwәха пешийа тәва дьчә у wе т'әви тә бә, әwе дури тә нак'әвә у тә бәр'нәдә, бәр хwә нәк'әвә у нәтьрсә».
[9] Муса әв qанун ньвиси у да к'аһинед зар'ед Леwи, йед кӧ Сьндоqа Пәймана Хӧдан дьбьрьн у һ'әму р'успийед Исраел.
[10] Муса ль wан ә'мьр кьр у гот: «Һәр к'ӧтасийа сала һ'әфта ль сала бахшандьне, ль Щәжьна Һ'олькчекьрьнеда,
[11] к'әнге т'әмамийа Исраел бе у ль бәр Хӧдан Хwәдейе тә бьсәкьнә, ль wи щийе кӧ әw бьбьжерә, т'әмамийа Исраелр'а ве qануне бь дәнге бьльнд бьхунә.
[12] Щьмә'те, жьна, мера, зар'а у хәрибед нава бажаред хwәда, т'опи сәр һәв кә, кӧ әw бьбьһен у һин бьн жь Хӧдан Хwәдейе wә бьтьрсьн у һ'әму хәбәред ве qануне бькьн кӧ бьqәдиньн.
[13] Зар'ед wан йед кӧ һе ньзаньн, wе бьбьһен у һин бьн жь Хӧдан Хwәдейе wә бьтьрсьн, ль нава һ'әму р'ожед ә'мьре wә ль сәр ә'рде кӧ һун Урдӧнер'а дәрбаз дьбьн хwәр'а бькьнә мьлк'».
[14] Хӧдан готә Муса: «Аwа р'ожед тәйә мьрьне незик ьн, гази Йешу кә у ль Коне Щьвинеда бьсәкьньн, әзе ә'мьра бьдьмә wи». Муса у Йешу чун у ль Коне Щьвинеда сәкьнин.
[15] Хӧдан ль стуна ә'wрда конда wанва хӧйа бу у стуна ә'wр ль бәр дәре кон сәкьни.
[16] У Хӧдан готә Муса: «Аwа тӧ дьчи бьгьһижи кал-бавед хwә. Әв мьләте р'абә ль wи щийе кӧ дьчьне беә'сьлийе бькә, аwа готи пәй wан хwәдейед башqәйә wи ә'рди һәр'ә. Әwе мьн бьһелә у пәймана кӧ мьн т'әви wан гьреда бьт'әр'ьбинә.
[17] Wе р'оже һерса мьне ль сәр wи р'абә, әзе wан бьһельм у р'уйе хwә жь wан вәшерьм. К'ока wане бе у гәләк тәнгаси у зәлули р'асти wан бе. Wан р'ожа әwе бежә: ‹Гәло әв бәла кӧ һатьнә сәре мьн нә бона wе йәке йә кӧ Хӧдане мьн т'әви мьн нинә?›
[18] Ле әзе wе р'оже р'уйе хwә һе вәшерьм бона һәр хьрабийа кӧ wи кьр, гава бәре хwә да хwәдейед башqә.
[19] Ньһа хwәр'а ве стьране бьньвисьн у зар'ед Исраел һини wе кә, wе бькә сәр зар-зьмане wан, wәки әва стьрана мьнр'а бьбә шә'де мьqабьли зар'ед Исраел.
[20] Wәхте әз wи бьбьмә ә'рде кӧ шир у һьнгьв же дьк'ьшә, чаwа кӧ мьн кал-бавед wанр'а сонд хwар, әwе бьхwә, т'ер бә, к'ок бә у wе бәре хwә бьдә хwәдейед башqә, әwе wанр'а qӧльх кә, мьн т'әхсир кә у пәймана мьн бьт'әр'ьбинә
[21] wе бьбә гава гәләк тәнгаси у зәлули бьбинә, әв стьрана wе бьбә шә'де мьqабьли wи, чьмки әва жь бира зӧр'әта wи wе дәрнәйе. Әз иди иро заньм т'ьвдира wан чийә, һе бәри wе йәке кӧ мьн әw бьрьнә ә'рде кӧ мьн соз да».
[22] Муса һәма wе р'оже әв стьран ньвиси у зар'ед Исраел һини wе кьрьн.
[23] Хwәде ль Йешуйе кӧр'е Нун ә'мьр кьр у гот: «Qәwат у ә'гит бә, чьмки тӧйе зар'ед Исраел бьби ә'рде кӧ мьн wанр'а сонд хwар у әзе т'әви тә бьм».
[24] Гава Муса һ'әму хәбәред ве qануне к'ьтебеда ньвиси у хьлаз кьрьн,
[25] Муса ль леwийед кӧ Сьндоqа Пәймана Хӧдан дьбьрьн ә'мьр кьр у гот:
[26] «Ве к'ьтеба qануне һьлдьн у дайньнә к'еләкәкә Сьндоqа Пәймана Хӧдан Хwәдейе хwә у бьра әw ль wьр бьбә шә'де мьqабьли тә.
[27] Чьмки әз сәрһьлдан у сәрһ'ьшкийа тә заньм, һ'әта р'ожа иро кӧ әз нава wәда дьжим һун ль бәр Хӧдан сәрһ'ьшк бунә, һе чьqас зедә пәй мьрьна мьнр'а.
[28] Һ'әму р'успийед qәбилед хwә у сәрwеред хwә бьщьвиньнә ль щәм мьн, әзе wанр'а ван хәбәра бежьм у гази ә'рд у ә'змен бькьм чаwа шә'де мьqабьли wан.
[29] Чьмки әз заньм кӧ пәй мьрьна мьнр'а һуне ә'сә бьһ'әр'ьмьн у бьшьһ'ьтьн жь wе р'ийа кӧ мьн ль wә ә'мьр кьр у пәйр'а wе бәла бенә пешийа wә, бона хьрабийа кӧ һуне ль бәр ч'ә'ве Хӧдан бькьн, бь кьред дәстед хwә һерса wи р'акьн».
[30] Муса хәбәред ве стьране ль бәр т'әмамийа щьвина Исраел һ'әта хьлазийе гот: