[1] Муса т'әви р'успийед Исраел ль мьләт ә'мьр кьр у гот: «Һ'әму ә'мьред кӧ әз иро ль wә ә'мьр дькьм хwәй кьн.
[2] Wе р'ожа гава һун Урдӧнер'а дәрбаз бьнә ә'рде кӧ Хӧдан Хwәдейе тә дьдә тә, һьнге хwәр'а кәвьред мәзьн бьдә сәкьнандьне у бь к'ьлсе зеп кә.
[3] Ль сәр wан һ'әму хәбәред ве qануне, wәхте дәрбазбуна хwә бьньвисә, аwа готи wәхте тӧ һәр'и ә'рде кӧ Хӧдан Хwәдейе тә дьдә тә. Ә'рде кӧ шир у һьнгьв же дьк'ьшә, чаwа кӧ Хӧдан Хwәдейе кал-бавед тә готьбу тә.
[4] Wәхте һун Урдӧнер'а дәрбаз бьн, ван кәвьра дайньнә ль сәр ч'ийайе Әйбале у бь к'ьлсе wан зеп кьн, бона к'ижана әз иро ль wә ә'мьр дькьм.
[5] Ль wьр горигәһе Хӧдан Хwәдейе хwәр'а чекә. Горигәһа кәвьри, һащәте һ'әсьн ль кәвьре wе нәк'әвә.
[6] Бь кәвьред сахләм горигәһе Хӧдан Хwәдейе хwәр'а чекә у ль сәр wе дийарийед т'әвайишәwате Хӧдан Хwәдейе хwәр'а бьдә,
[7] дийарийед һәләqәтийе сәржекә, ль wьр бәр Хӧдан Хwәдейе хwә бьхwә у ша бә.
[8] У ль сәр wан кәвьра һ'әму хәбәред ве qануне зәлал-сафи бьньвисә».
[9] Һьнге Муса у к'аһинед леwи т'әмамийа Исраелр'а готьн: «Кәр' бә у бьбьһе, Исраел! Иро тӧ буйи мьләте Хӧдан Хwәдейе хwә.
[10] Гӧһ бьдә дәнге Хӧдан Хwәдейе хwә, ә'мьред wи у qәйдә-qанунед wи бьqәдинә, к'ижан кӧ әз иро ль тә ә'мьр дькьм».
[11] Wе р'оже Муса ә'мьр данә щьмә'те у гот:
[12] «Гава һун Урдӧнер'а дәрбаз бьн, qәбила Шьмһ'ун, Леwи, Щьһуда, Исахар, Усьв у Бьнйамин гәрә ль сәр ч'ийайе Гьризиме бьсәкьньн кӧ дӧа ль мьләт бькьн.
[13] Ле qәбила Р'убен, Гад, Ашер, Зәбулон, Дан у Нәфтәли гәрә ль сәр ч'ийайе Әйбал бьсәкьньн, бона ньфьр' кьрьне.
[14] У леwийе бь дәнге бьльнд бькьнә гази бежьнә һ'әму исраелийа:
[15] ‹Ньфьр' ль wи бә, к'е п'утәки чекә, йан р'о кә у wи дайнә щики хәwлә, һәр чекьрьна һайә бь дәсте һостә, к'ьрети йә ль бәр Хӧдан›. Бьра мьләт вәгәр'инә у бежә: ‹Амин›.
[16] ‹Ньфьр' ль wи бә, к'е де у баве хwә бе һӧрмәт кә›. Һ'әму мьләт бежә: ‹Амин›.
[17] ‹Ньфьр' ль wи бә, к'е синоре щинаре хwә щи бьгӧһезә›. Һ'әму мьләт бежә: ‹Амин›.
[18] ‹Ньфьр' ль wи бә, к'е йәки кор жь р'е бьшьһ'ьтинә›. Һ'әму мьләт бежә: ‹Амин›.
[19] ‹Ньфьр' ль wи бә, к'е һәqийа хәриб, сеwи у жьнәбийе бьт'әр'ьбинә›. Һ'әму мьләт бежә: ‹Амин›.
[20] ‹Ньфьр' ль wи бә, к'е сәре хwә жьнбава хwәр'а дайнә, чьмки әw щи ньвина баве хwә беһӧрмәт дькә›. Һ'әму мьләт бежә: ‹Амин›.
[21] ‹Ньфьр' ль wи бә, к'е сәре хwә һ'әйwанәкер'а дайнә›. Һ'әму мьләт бежә: ‹Амин›.
[22] ‹Ньфьр' ль wи бә, к'е сәре хwә хушка хwәр'а, qиза баве хwә йан qиза дийа хwәр'а дайнә›. Һ'әму мьләт бежә: ‹Амин›.
[23] ‹Ньфьр' ль wи бә, к'е сәре хwә хwәсийа хwәр'а дайнә›. Һ'әму мьләт бежә: ‹Амин›.
[24] ‹Ньфьр' ль wи бә, к'е дьзива йәки дьн бькӧжә›. Һ'әму мьләт бежә: ‹Амин›.
[25] ‹Ньфьр' ль wи бә, к'е р'ӧшәте һьлдә кӧ хуна йе ами-т'ам бьр'ежә›. Һ'әму мьләт бежә: ‹Амин›.
[26] ‹Ньфьр' ль wи бә к'е хәбәред ве qануне хwәй нәкә нәqәдинә›. Һ'әму мьләт бежә: ‹Амин›.