[1] Wәхте тӧ бьк'әви wи ә'рде кӧ Хӧдан Хwәдейе тә чаwа мьлк' дьдә тә ле wар би у wьр бьмини,
[2] һьнге һьлдә жь һәр бәре дәрәмәта ә'wльнә ә'рде, чь кӧ те бьстини жь ә'рде хwәйи кӧ Хӧдан Хwәдейе тә дьдә тә, бькә сәпәте у һәр'ә ль wи щийе кӧ Хӧдан Хwәдейе тә wе бьбьжерә, wәки наве хwә ле дайнә.
[3] Һәр'ә ль щәм к'аһине кӧ wан р'ожа к'аһинтийе дькә, бежә wи: ‹Әз иро ль бәр Хӧдан Хwәдейе тә иqрар дькьм, wәки әз к'әтьмә wи ә'рди к'ижан кӧ Хӧдан кал-бавед мәр'а сонд хwар кӧ wи бьдә мә›.
[4] Һьнге к'аһин wе сәпәте жь дәстед тә бьгьрә у дайнә ль бәр горигәһа Хӧдан Хwәдейе тә.
[5] Тӧ ль бәр Хӧдан Хwәдейе хwә бькә дәнги у бежә: ‹Баве мьн арамийәки фьрари бу, бәржер чу Мьсьре у т'әви чәнд мәрьва ль wьр ма. Ле ль wьр мьләтәки мәзьн, qәwат у беһ'әсаб жь wи пешда һат.
[6] Ле мьсьрийа хьраби ль мә дькьрьн, әм дьзерандьн у хәбата гьран дьданә кьрьне.
[7] Мә һәwара хwә Хӧдан Хwәдейе кал-бавед хwә ани у Хӧдан дәнге мә бьһист, ль сәр зәлулийа мә, һ'але мә у зордарийа мәда ньһер'и.
[8] Хӧдан әм жь Мьсьре бь дәсте зор, бь зәнда дьрежкьри, бь саwа гьран, бь нишана у к'әрәмәта дәрхьстьн
[9] әм анинә ль ви щийи, әв ә'рде кӧ шир у һьнгьв же дьк'ьшә да мә.
[10] Ва йә иро әз бәред дәрәмәта пешьнә жь ә'рде кӧ тә Хӧдан да мьн тиньм!› Wе дайнә ль бәр Хӧдан Хwәдейе хwә у та бә ль бәр Хӧдан Хwәдейе хwә.
[11] Бона һ'әму хwәшийа кӧ Хӧдан Хwәдейе тә да тә у мала тә, т'әви леwи у хәрибе ль нава тәда ша бә.
[12] Гава сала сьсийа, аwа готи сала дәһәка башqәкьрьна һәр дәһәка бәред хwә хьлаз ки, бьди леwи, хәриб, сеwи у жьнәбийе кӧ әw ль бажаред тәда бьхwьн у т'ер бьн,
[13] һьнге ль бәр Хӧдан Хwәдейе хwә бежә: ‹Мьн п'ара бӧһӧрти-жьбарә жь мал дәрхьст у мьн әw дайә леwи, хәриб, сеwи у жьнәбийе, анәгори һ'әму ә'мьред тә, йед кӧ тә ль мьн ә'мьр кьрьн. Мьн ә'мьред тә нәт'әр'ьбандьнә у нә жи бир кьрьнә.
[14] Мьн әw паqьжийа хwәда һьлда, р'ожед шинеда жь wе нәхwар у нә жи жь wе нане мьрийа да. Мьн гӧһ дьда дәнге Хӧдан Хwәдейе хwә, мьн һ'әму ӧса кьр чаwа кӧ тә ль мьн ә'мьр кьр.
[15] Бьньһер'ә жь хана хwәйә пироз, жь ә'змен у мьләте хwә Исраел бьмбарәк кә, ӧса жи ә'рде кӧ тә да мә, ә'рде кӧ шир у һьнгьв же дьк'ьшә, чаwа кӧ тә кал-бавед мәр'а сонд хwар›.
[16] Ве р'оже Хӧдан Хwәдейе тә, ль тә ә'мьр дькә кӧ бьqәдини һ'әму ван qәйдә-qанун у qьрара. Wан бь т'әмамийа дьле хwә у бь т'әмамийа нәфса хwә хwәй ки у бьqәдини.
[17] Тә иро иqрар кьр кӧ Хӧдан, Хwәдейе тә йә у те р'ийед wида һәр'и, qәйдә-qанунед wи, ә'мьред wи, qьраред wи хwәй ки у гӧһ бьди дәнге wи.
[18] Хӧдан иро иqрар кьр кӧ тӧ wир'а бьби мьләте wийи мьлк'е wи, чаwа кӧ wи готьбу тә, тӧ жи гәрә һ'әму ә'мьред wи хwәй ки.
[19] Wәки әw тә ль сәр һ'әму мьләтар'а бьльнд бьгьрә, к'ижан кӧ әwи хӧльqандьнә, бона пәсьне, навбьльндкьрьне у р'умәте, wәки тӧ бьби мьләтәки пироз ль Хӧдан Хwәдейе хwәр'а, чаwа кӧ wи гот».