[1] Муса жь дәштед Моwабе һәвраз чу ч'ийайе Нәбо, ль сәр сәре Писгайе кӧ пешбәри Әриһайе йә. Хӧдан һ'әму ә'рде Гилә'де һ'әта Дан,
[2] т'әмамийа Нәфтәлийе, ә'рде Әфрайим у Мьнашә, т'әмамийа ә'рде Щьһуда һ'әта Бә'ра Навбәре ,
[3] Нәщәф, дәшта нәwала Әриһайе, бажаре даред хӧрма һ'әта Соһаре нишани wи да.
[4] Хӧдан готә Муса: «Әв ә ә'рде бона к'ижани мьн Бьраһимр'а, Исһаqр'а у Аqубр'а сонд хwар гот: ‹Әзе wи бьдьмә зӧр'әта тә›. Мьн һьшт wәки тӧ бь ч'ә'вед хwә бьбини, ле тӧ дәрбази wьр наби».
[5] Ль wьр ә'рде Моwабда, Мусайе хӧламе Хwәде мьр, анәгори хәбәра Хӧдан.
[6] Хӧдан ль нәwала ә'рде Моwабда пешбәри Бет'-П'ьһоре әw дәфьн кьр у т'ӧ кәс һ'әта р'ожа иро щийе дәфьнкьрьна wи ньзанә.
[7] Ә'мьре Муса сәдбист сали бу гава әw мьр, нә ишьqа ч'ә'ве wи сьст бу, нә жи сьһ'әт-qәwата wи.
[8] Зар'ед Исраел си р'ожи ль дәшта Моwабда шина Муса кьрьн. Р'ожед гьри у шина Муса хьлаз бун.
[9] Йешуйе кӧр'е Нун бь р'ӧһ'е сәрwахтийева һатә дагьртьне, чьмки Муса дәстед хwә данибу ль сәр wи, зар'ед Исраел гӧр'а wи дькьрьн у ӧса дькьрьн чаwа кӧ Хӧдан ль Муса ә'мьр кьрьбу.
[10] Иди п'ехәмбәрәки мина Муса ль нава Исраелда т'ӧнәбу, йе кӧ Хӧдан р'у бь р'у нас дькьр,
[11] бь һ'әму нишан у к'әрәмәта, йед кӧ Хӧдан әw шанд кӧ ль ә'рде Мьсьреда ль сәр Фьрәwьн, ӧса жи ль сәр һ'әму хӧламед wи у т'әмамийа wәлате wи бькә
[12] у Муса бь т'әмамийа qәwата дәсте хwә һәр кьрьнед саw ль бәр ч'ә'вед т'әмамийа Исраел кьр.