[1] Һәгәр тӧ р'ьнд гӧһ бьди дәнге Хӧдан Хwәдейе хwә бона кӧ хwәй ки у бьqәдини һ'әму ә'мьред wийә кӧ әз иро ль тә ә'мьр дькьм, Хӧдан Хwәдейе тә wе тә жь һ'әму мьләтед дьне бьльндтьр кә.
[2] Әв һ'әму дӧайе ль тә бьн у бона тә wе бенә сери, һәгәр тӧ гӧһ бьди дәнге Хӧдан Хwәдейе хwә.
[3] Дӧайе ль тә бә бажерда у дӧайе ль тә бә дәштеда.
[4] Дӧайе ль бәре зьке тә, бәре ә'рде тә, бәре һ'әйwане тә, зайина пәз у дәwаред тә бә.
[5] Дӧайе ль сәла тәйә нен у т'әшта тәйә һәвир бә.
[6] Дӧайе ль к'әтьн-дәрк'әтьна тә бә .
[7] Хӧдан ль бәр тә wе дьжмьнед тә хә, йед кӧ мьqабьли тә р'абьн. Р'екеда әwе дәренә мьqабьли тә ле һ'әфт р'ийада wе жь тә бьр'әвьн.
[8] Хӧдан wе дӧа бьшинә ль сәр тә, ль ә'мбаред тә у ль һәр кьрьна дәстед тә. Wе дӧа ль тә бькә ль wи ә'рдида, к'ижан кӧ Хӧдан Хwәдейе тә дьдә тә.
[9] Һәгәр тӧ ә'мьред Хӧдан Хwәдейе хwә хwәй ки у р'ийед wида һәр'и, Хӧдан wе тә бькә мьләте хwәйи пироз, чаwа кӧ wи тәр'а сонд хwар.
[10] Һ'әму мьләтед дьне wе бьбиньн кӧ наве Хwәде ль сәр тә йә у wе жь тә бьтьрсьн.
[11] Хӧдан wе тә хер-бәрәк'әтева, бь бәре зьке тә у бь бәре һ'әйwане тә, бь бәре ә'рде тә хьне кә, ль сәр wи ә'реде кӧ Хӧдан кал-бавед тәр'а сонд хwар кӧ бьдә тә.
[12] Хӧдан wе бона тә хьзна хwәйә qәнщ, аwа готи ә'змен вәкә, wәки баране wә'дәда бьбаринә ль сәр ә'рде тә, кӧ дӧа ль һәр кьрьна дәсте тә бькә. Те дәйн бьди гәләк мьләта ле хwәха те дәйн нәки.
[13] Хӧдан wе тә дайнә ль сери нә кӧ хьлазийе, те т'әне ль жоре би нә кӧ жере, һәгәр тӧ гӧһ бьди ә'мьред Хӧдан Хwәдейе хwә, к'ижан кӧ әз иро ль тә ә'мьр дькьм кӧ хwәй ки у бьqәдини
[14] у жь һ'әму хәбәред кӧ әз иро ль wә ә'мьр дькьм, ч'әп йан р'аст данәгәр'и кӧ пәй хwәдейед башqә һәр'и, wанр'а qӧльх ки.
[15] Ле һәгәр тӧ гӧһ нәди дәнге Хӧдан Хwәдейе хwә у һ'әму ә'мьред wи, qәйдә-qанунед wи кӧ әз иро ль тә ә'мьр дькьм хwәй нәки у нәqәдини, һьнге әв һ'әму ньфьр' wе ль тә бьн у бона те wе бенә сери.
[16] Ньфьр' wе ль тә бә бажерда у ньфьр' wе ль тә бә дәштеда.
[17] Ньфьр'е ль сәла тәйә нен у т'әшта тә йә һәвир бә.
[18] Ньфьр'е ль бәре зьке тә, бәре ә'рде тә, зайина пәз у дәwаред тә бә.
[19] Ньфьр'е ль к'әтьн-дәрк'әтьна тә бә.
[20] Ль нава һәр кьрьна дәсте тә чь кӧ тӧ бьки, Хӧдан wе ньфьр', т'әвиһәвбун у һьлатьне бьшинә ль сәр тә, һ'әта qьр'а тә нәйе у зутьрәке ӧнда нәби бона кьред хwәйә хьраб, кӧ тә әз һьштьм.
[21] Хӧдан wе нәхwәшийа һ'ала тәва бьзәльqинә, һ'әта кӧ qьр'а тә бинә ль сәр wи ә'рде кӧ тӧ дьчи хwәр'а бьки мьлк'.
[22] Хӧдан wе бь һ'иле, гәрме, шәwате, т'айе, qӧрльхе, бь байе гәрм у бь хӧре р'аw тә хә, әwе пәй тә к'әвьн һ'әта кӧ qьр'а тә биньн.
[23] Ә'змане ль сәр сәре тә бьбә сьфьр, ә'рде жи бьн тәда бьбә һ'әсьн .
[24] Хӧдан wе дәwса баране т'оз у ахе бьдә ль ә'рде тә, әванайе жь ә'змен ль сәр тәда бьбарьн һ'әта qьр'а тә нәйе.
[25] Хӧдан wе тә бьдә ль дәсте дьжмьнед тә, р'екеда те дәрейи мьqабьли wан ле һ'әфт р'ийада те жь wан бьр'әви у һ'иле һ'әму п'адшатийед ль сәр дьне wе жь тә һәр'ә.
[26] Щьнйазе тә wе бьбә хӧре һ'әму тәйрәдед ә'змен у р'ә'wьред ә'рде, кәсе т'ӧнәбә кӧ бәри wан дә.
[27] Хӧдан wе бь п'ьзькед п'исә Мьсьре, к'отибуне, бьринед к'ур у бь хӧр тә хә, жь к'ижана те нькарьби qәнщ би.
[28] Хӧдан wе бь һ'ьшӧндакьрьне, корбуне у дьлләрзәке тә хә.
[29] Р'о нава р'оже те хwә бьп'әлини, чаwа кӧ кор тә'ристанийеда дьп'әлинә. Р'ийед хwәда те хере нәбини, һ'әму р'ожед хwәда те бейи зерандьн у т'аланкьрьне у кәсәке т'ӧнәбә кӧ тә хьлаз кә.
[30] Дәргистийа хwәр'а те нишанкьри би, ле йәки дьне wе сәре хwә пер'а дайнә, те хани чеки ле теда р'унәнейи, бахе тьрийа те дач'ькини ле жь wе нәчьни.
[31] Гайе тә wе ль бәр ч'ә'ве тә бе сәржекьрьне, ле те же нәхwи, к'әре тә wе жь тә бьстиньн у әw пашда вәнагәр'ә ль щәм тә, пәзед тә wе дьжмьнед тәр'а бенә дайине, йәк wе т'ӧнәбә кӧ тә хьлаз кә.
[32] Кӧр'-qизед тәйе мьләте башqәр'а бенә дайине, ч'ә'вед тәйе р'ож бь р'ож жь ч'ә'вньһер'ийа wан бьqәр'ьмьн у те т'ӧ тьшти нькарьби бьки.
[33] Бәре ә'рде тә у һ'әму хәбата тә мьләте кӧ тә әw нас нәдькьр wе бьхwә. Те һәр гав бейи зерандьн у һ'ьнщьр'андьне.
[34] Те бьчәльqи жь wе йәке чь кӧ те бь ч'ә'вед хwә бьбини.
[35] Хӧдан wе бь п'ьзькед п'ис һет у чокед тә хә, жь к'ижана те нькарьби qәнщ би, әwе жь бьн п'ийед тә һ'әта т'әпа сәре тә бәла бьн.
[36] Хӧдан wе тә у п'адшайе кӧ те ль сәр хwә к'ьфш ки, бьбә ль нав мьләте кӧ нә тә нә жи кал-бавед тә әw нас кьрьнә. Ль wьр те хwәдейед башqәйә дар у кәвьрр'а qӧльх ки.
[37] Те бьби мәщала һ'иләтийе, мәт'әлок у пек'әнийе ль нава һ'әму wан мьләтед кӧ Хӧдан wе тә бьбә.
[38] Те гәләк т'охьм дәрхи зәвийа хwә, ле һьндьки же һьлди, чьмки кӧлийе бьхwьн.
[39] Бахе тьрийа те дач'ькини, wан бещәр ки, ле р'әз те т'оп нәки, нә жи те шәраве вәхwи, чьмки кӧрме бьхwьн.
[40] Ль нава т'әмамийа синоре тәда даре зәйт'уне wе һәбьн, ле те бь бьзьр пе нәйейи р'ункьрьне, чьмки зәйт'унед тә wе бьwәрьн.
[41] Кӧр' у qиза те бини, ле әwе п'ара тә нибьн, чьмки әwе һесир һәр'ьн.
[42] Һәспе гиһе wе һ'әму даред тә у бәред ә'рде тә бьбьн хwәйи.
[43] Хәрибе ль нава тәда wе гәләки жь тә бьльндтьр бә, ль сәр тә к'әвә, ле те гәләки ньмьз бьк'әви.
[44] Әwе дәйн бьдә тә, ле те дәйн нәди wи, әwе сери бә те хьлазийе би.
[45] Әв һ'әму ньфьр' wе бенә ль сәре тә, wе пәй тә к'әвьн у хwә тәр'а бьгьһиньн һ'әта qьр'а тә нәйе, чьмки тә дәнге Хӧдан Хwәдейе хwә нә бьһист у тә ә'мьред wи, qәйдә-qанунед wи кӧ wи ль тә ә'мьр кьрьн, хwәй нәкьрьн.
[46] Әwе ль сәр тә у ль сәр зӧр'әта тә бьбьнә нишан у избатийа һ'әта-һ'әтайе.
[47] Бона кӧ тә Хӧдан Хwәдейе хwәр'а бь шабуне у дьле әшq т'ер-т'ьжибунеда qӧльх нәкьр,
[48] бона ве йәке те т'и, бьр'чи, тә'зи у һ'әwщәдарийа һәр тьштида хӧламтийа wан дьжмьнед хwә бьки, к'ижана Хӧдане бьшинә ль сәр тә. Әwе нире һ'әсьни бьдә ль сәр стуйе тә, һ'әта кӧ qьр'а тә бинә.
[49] Хӧдан wе мьләтәки дур жь сәре дьне р'акә ль сәр тә, зьмане к'ижани те фә'м нәки. Әwе чаwа тәйре симьр' бьфьр'ә ль сәр тә,
[50] мьләтәки беисаф кӧ wе qәдьре мәзьна нәгьрә у р'ә'ме ль бьч'ука нәкә.
[51] У әwе бәре һ'әйwанед тә, бәре ә'рде тә бьхwә, һ'әта кӧ тӧ wеран нәби. Әwе нә геньм тәр'а бьһелә, нә мәйе, нә бьзьр, нә жи зайина пәз у дәwаред тә, һ'әта кӧ qьр'а тә нәйнә.
[52] Wе дора һ'әму бажаред тә бьгьрә, һ'әта кӧ суред ль нава т'әмамийа wәлате тәйә бьльндә qәwат, кӧ тә гӧмана хwә данийә ль сәр wан, һьлнәшинә. Әwе дора һ'әму бажаред тәйә т'әмамийа wәлате тәда, к'ижан кӧ Хӧдан Хwәдейе тә данә тә бьгьрә.
[53] Гава дьжмьне тә дора бажаре тә бьгьрә ль нава wе тәнгасийеда кӧ әwе бинә сәре тә, те бәре зьке хwә, аwа готи гоште кӧр' у qиза хwә кӧ Хӧдан Хwәдейе тә данә тә бьхwи.
[54] Мере гәләки назьк у мьлуки ль нава тәда wе бь ч'ә'вед хьраб ль бьре хwә, к'ӧлфәта хwәйә һ'ьзкьри у ль зар'ед хwәйә майин бьньһер'ә,
[55] әwе гоште зар'ед хwә бьхwә у нәдә т'ӧ кәси жь wан. Чьмки т'әне әв мабу ль нава тәнгасийе кӧ дьжмьне тә wе бинә ль сәре тә, гава дора һ'әму бажаред тә бьгьрә.
[56] К'ӧлфәта назьк у мьлукә ль нава тәда, к'ижане жь дәст назькийе у мьлукийе пә'нийа ньге хwә данәнийә ә'рде, wе бь ч'ә'ве хьраб мере хwәйи һ'ьзкьри, кӧр' у qиза хwә бьньһер'ә,
[57] ӧса жи һәвалч'ука хwәйә кӧ жь нав ньг дәрте у зар'ед хwәйә кӧ wе бинә. Чьмки әwе wан дьзива бьхwә, жь һ'әwщәдарийа кемасийа һәр тьшти, жь дәст wе тәнгасийа кӧ дьжмьнед тәйе ль нава бажаред тәда биньнә сәре тә.
[58] Һәгәр һ'әму хәбәред ве qануне кӧ ве к'ьтебеда ньвисар ьн хwәй нәки нәqәдини у жь ви наве Хӧдан Хwәдейе хwәйи qәдьр у саw нәтьрси,
[59] һьнге Хӧдан wе бь бәлайед жь һ'ьш-аqьла дур, бәлайед qайимә кӧ хьлазбуна wане т'ӧнә бә, нәхwәшийед хьрабә кӧ п'акбуна wане т'ӧнә бә, тә у зӧр'әта тә хә.
[60] Жь wан һ'әму еш-ешукед Мьсьре, жь к'ижана тӧ дьтьрсийайи wе вәгәр'инә ль сәр тә, әwе тәва бьзәльqьн.
[61] Ӧса жи һәр нәхwәши у һәр бәла кӧ ве к'ьтеба qанунеда нә ньвисар ьн, Хӧдан wе wан бинә ль сәре тә, һ'әта qьр'а тә нәйе.
[62] Һун wәкә стәйркед ә'змен беһ'әсаб бун, ле һуне гәләки һьндьк бьн, чьмки тә гӧр'а Хӧдан Хwәдейе хwә нәкьр.
[63] Чаwа кӧ Хӧдан ша дьбу гава wәр'а qәнщи дькьр у һун ль һәв зедә дькьрьн, ӧса жи Хӧдан wе бь qьр'кьрьн у wеранкьрьна wә ша бә. Һуне жь wи ә'рде кӧ дьчьне хwәр'а бькьнә мьлк' бенә р'аqәтандьне.
[64] Хӧдан wе тә ль нава һ'әму мьләтада жь сәрики дьне һ'әта сәре дьн бәла кә. Ль wьр те хwәдейед башqәйә дар у кәвьрр'а, к'ижанар'а кӧ нә тә нә жи кал-бавед тә әw нас кьрьнә qӧльх ки.
[65] Ле ль нава wан мьләтада жи те р'ьһ'әт нәби, щики һесабуне wе бона ньгед тә т'ӧнә бә. Хӧдан wе хәма, ч'ә'в мә'рьмбуне у дьлтәнгийе бьдә тә.
[66] Ә'мьре тә wе ль сәр муки бә, те шәв у р'ож хофеда би у т'ӧ щар сәрәдәри жь ә'мьре хwә дәрнә хи.
[67] Жь дәст wе тьрса дьле тә у дитьна ч'ә'вед тә сьбәһе зу те бежи: ‹Хwәзи р'о бьчуйа ава›, еваре жи бежи: ‹Хwәзи сьбәһ р'он буйа›.
[68] Хӧдане wе р'ейеда тә бь гәмийа вәгәр'инә Мьсьре, бона к'ижане мьн готә тә: ‹Те иди wе нәбини›. Ль wьр һуне хwә чаwа хӧлам у щари бьфьрошьнә дьжмьнед хwә, ле йе бьк'ьр'ә жи wе т'ӧнә бә».