<Q. Дӧщари 8

[1] Һ'әму ә'мьред кӧ әз иро ль wә дькьм, бькьн кӧ wан бьqәдиньн, wәки һун сах-сьламәт бьн, ль һәв зедә бьн һәр'ьн wи ә'рди wар бьн, бона к'ижани Хӧдан кал-бавед wәр'а сонд хwар.

[2] Бир бинә т'әмамийа р'ийа бәр'ийеда, к'ижанида Хӧдан Хwәдейе тә әва чьл салә кӧ тә дьбә, бона кӧ тә та кә, бьщер'ьбинә, wәки бьзаньбә чь дьле тәда һәйә, к'а те ә'мьред wи бьqәдини йан на.

[3] Әwи тӧ та кьри, бьр'чи һьшти у мана тӧ дайи хwарьне, к'ижан нә тә заньбу чийә нә жи кал-бавед тә. Wәки тәва ә'йан кә кӧ инсан т'әне бь нен нажи, ле бь һәр тьште кӧ жь дәве Хӧдан дәрдьк'әвә дьжи.

[4] Әва чьл сал ә нә к'ьнще ль сәр тә машийан, нә жи ньге тә wәрьмин.

[5] Дьле тәва бьра ә'йан бә, wәки чаwа кӧ мәрьв зар'е хwә һьлте, ӧса жи Хӧдан Хwәдейе тә ль тә һьлте.

[6] Ә'мьред Хӧдан Хwәдейе хwә бьqәдини, р'ийед wида һәр'и у жь wи бьтьрси.

[7] Чьмки Хӧдан Хwәдейе тә, тә дьбә ә'рде qәнщ, ә'рде кӧ щәwед ава, канийа у авед бьнә'рд ль ч'ийа у нәwала дәртен,

[8] ә'рде т'ьжи гәньм, щәһә, бахе тьрийа, һежира, һ'ьнара, ә'рде бьзьре зәйт'уне у һьнгьв.

[9] Ә'рде кӧ те нане хwә бе мьнәт бьхwи, ль wьр кемасийа т'ӧ тьшти те нәбини, кәвьред wи ә'рди т'ьжи һ'әсьн ьн, жь ч'ийа те сьфьр дәрхи.

[10] Те бьхwи у т'ер би, Хӧдан Хwәдейе хwә те бьмбарәк ки, бона ә'рде qәнщ, к'ижан кӧ wи да тә.

[11] Һаш жь хwә һәбә тӧ Хӧдан Хwәдейе хwә бир нәки. Ә'мьр, qьрар у qәйдә-qанунед wи, кӧ әз иро ль тә ә'мьр дькьм нәт'әр'ьбини.

[12] Һәгәр на, гава тӧ т'ер бьхwи, малед бәдәw чеки у wанда бьжийи,

[13] пәз у дәwаред тә зедә бьн, зер' у зиве тә зедә бьн, һәр тьштида хьне би,

[14] һьнге дьле тәйе бабах бә те Хӧдан Хwәдейе хwә кӧ тӧ жь wәлате Мьсьре, жь мала хӧламтийе дәрхьсти бир бьки.

[15] Хӧдан тӧ бәр'ийа мәзьн у хофр'а дәрбаз кьри, к'идәре мә'ре жә'рдадайи у дупьшк ьн. Жь ә'рде һ'ьшки бе ав, жь qәйайе qәwин тәр'а ав дәрхьст.

[16] Бәр'ийеда бь манайе тӧ т'ер кьри, к'ижан кӧ кал-бавед тә ньзаньбун әw чийә. Кӧ тә та кә у бьщер'ьбинә wәки хьлазийе тәр'а qәнщийе бькә.

[17] Дьле хwәда нәбежи: ‹Qәwата мьн у зорайийа дәстед мьн әва һәбука мьнр'а qазьнщ кьрьнә›.

[18] Ле Хӧдан Хwәдейе хwә бир бинә, чьмки әw qәwате дьдә тә кӧ һәбуке qазьнщ ки, wәки пәймана хwәйә кӧ wи кал-бавед тәр'а сонд хwар бьqәдинә, мина р'ожа иройин.

[19] Һәгәр тӧ Хӧдан Хwәдейе хwә бир бьки у пәй хwәдейед башqә һәр'и, wанр'а qӧльх ки у бәр wан та би, әз иро ә'лами wә дькьм кӧ ә'сә wе qьр'а wә бе.

[20] Чаwа әw мьләтед кӧ Хӧдан бәр wә qьр' дькә ӧса жи һуне бенә qьр'кьрьне, wәки гӧр'а Хӧдан Хwәдейе хwә нәкьн.