[1] Гава тӧ дәрейи шер' мьqабьли дьжмьнед хwә, һәсп, ә'рәба у мьләте жь хwә гәләктьр бьбини, жь wан нәтьрсә, чьмки Хӧдан Хwәдейе тә йе кӧ тӧ жь wәлате Мьсьре һәвраз дәрхьсти т'әви тә йә.
[2] Гава кӧ һун дәст бь шер' бькьн бьра к'аһин бе щьмә'тер'а хәбәр дә у
[3] бежә wан: ‹Бьбьһе Исраел! Иро һуне мьqабьли дьжмьнед хwә р'абьнә шер', ль бәр wан бьра дьле wә сьст нәбә, нәтьрсьн, нәбьздьн у ль бәр wан нәләрьзьн.
[4] Чьмки Хӧдан Хwәдейе wә т'әви wә те кӧ алийе wә мьqабьли дьжмьнед wә шәр' кә у wә хьлаз кә›.
[5] Сәрwер жи бьра щьмә'тер'а хәбәр дьн у бежьн: ‹Һәйә мәри кӧ мала ну чекьрийә у һе нәк'ьшийайе? Бьра һәр'ә вәгәр'ә мала хwә, wәки әw шер'да нәмьрә у йәки дьн бьк'ьшә мала wи.
[6] У һәйә мәри кӧ бахе тьрийа дач'ькандийә, ле һе же һьлнәдайә? Бьра вәгәр'ә һәр'ә мала хwә, wәки әw шер'да нәмьрә у йәки дьн жь бахе wи һьлнәдә.
[7] Йан һәйә мәри кӧ нишанкьри йә, ле һе дәргисти йә? Бьра вәгәр'ә һәр'ә мала хwә, wәки әw шер'да нәмьрә у йәки дьн дәргистийа wи нәстинә›.
[8] Бьра сәрwер диса т'әви щьмә'те хәбәрдьн у бежьн: ‹Һәйә мәрийе тьрсонәк у дьл сьст, бьра вәгәр'ә һәр'ә мала хwә, wәки әw дьле бьрайед хwә мина дьле хwә сьст нәкә›.
[9] Гава сәрwер хәбәрдана т'әви щьмә'те хьлаз кьн, һьнге бьра сәрәскәра ль сәр щьмә'те к'ьфш кьн.
[10] К'әнге тӧ незики бажарәки би кӧ wи зәфт ки, ә'дьлайе дайнә бәр wи.
[11] Һәгәр әw щаба ә'дьлайа тә бьдә у дәри ль бәр тә вәкә, һьнге бьра һ'әму щьмә'та wи бажарида бьбә хәрщдар у хӧламе тә.
[12] Ле һәгәр әw ә'дьлайийе нәхwазә у мьqабьли тә шәр' кә, дора wи бьгьрә
[13] у к'әнге Хӧдан Хwәдейе тә wи бьдә дәсте тә һьнге һ'әму мера бьдә бәр дәве шур.
[14] Т'әне жьн у зар'а, һ'әйwен, һ'әму чь кӧ бажерда һәбә, һ'әму т'алане wи һьлдә хwәр'а. Т'алане дьжмьнед хwә, к'ижан кӧ Хӧдан Хwәдейе тә да дәсте тә бьдә хәбате.
[15] Аһа бинә сәре һ'әму бажаред гәләки дури хwә, к'ижан кӧ нә жь бажаред ван мьләта нә.
[16] Ль бажаред ван мьләтада, йед кӧ Хӧдан Хwәдейе тә wар дьдә тә, т'ӧ бинбәри сах нәһели.
[17] Ле к'ока wан бинә кӧ ньфьр'е Хӧдан бе сери: Һ'итийа, әморийа, кәнанийа, пьриззийа, һ'иwийа у йәбусийа, чаwа кӧ Хӧдан Хwәдейе тә ль тә ә'мьр кьр.
[18] Wәки әw wә һини кьрьна wан һ'әму к'ьретийа нәкьн, к'ижан кӧ wан хwәдейед хwәр'а дькьр, кӧ нәбә һун ль бәр Хӧдан Хwәдейе хwә гӧна бькьн.
[19] Һәгәр тӧ wә'дәки дьреж ль дора бажарәки бьгьри, кӧ шәр' ки у зәфт ки, даред wи нәбьр'и, балт'ә ль wан нәхи чьмки те жь wан бьхwи, аwа wан нәбьр'и. Дара чоле т'ӧ мәрьв ә, кӧ әw жь тә бьр'әвә бьк'әвә бажаре, кӧ тә доре гьртийә?
[20] Ле жь wан даред кӧ тӧ зани wәки әw бәре хwарьне надьн, wан дькари бьшкени, бьбьр'и. У чь кӧ бона доргьртьна бажаре кӧ тӧ мьqабьли шәр' дьки лазьм ә че кә, һ'әта кӧ тӧ сәр wан к'әви.