[1] Һәгәр жь нава тәда п'ехәмбәр, йан йе хәwна шьровәдькә дәре у нишан, йан к'әрәмәтәке ә'шәрәт кә
[2] у әw нишан йан к'әрәмәта кӧ wи готьбу тә бе сери, ле әw бежә: ‹Әм ль пәй хwәдейед башqә кӧ тӧ нас наки һәр'ьн у әм wанр'а qӧльх кьн›,
[3] тӧ гӧр'а wи п'ехәмбәри йан йе хәwна шьровәдькә нәкә. Чьмки Хӧдан Хwәдейе wә, wә дьщер'ьбинә, wәки бьзаньбә һун Хӧдан Хwәдейе хwә һ'ьз дькьн бь т'әмамийа дьле хwә у бь т'әмамийа щанийа хwә, йан на.
[4] Пәй Хӧдан Хwәдейе хwә һәр'ьн, жь wи бьтьрсьн, ә'мьред wи хwәйи кьн, гӧһ бьдьнә wи, wир'а qӧльх кьн у хwә ль wи бьгьрьн.
[5] Ле әw п'ехәмбәр йан йе хәwна шьровәдькә гәрә бе кӧштьне. Чьмки әw wә мьqабьли wи Хӧдан Хwәдейе wә р'адькә, к'ижани кӧ һун жь wәлате Мьсьре дәрхьстьн у жь wе мала хӧламтийе хьлаз кьрьн, әw дькә кӧ wә жь wе р'ейе бьхальфинә, к'ижан кӧ Хӧдан Хwәдейе wә ль wә ә'мьр кьрьбу теда һәр'ьн. Бь ви аwайи хьрабийе жь нава хwәда р'аwва дәрхә.
[6] Һәгәр бьре тә, кӧр'е дийа тә, кӧр'е тә, qиза тә, к'ӧлфәта п'ашьла тәда, йан дәстәбьраке тә, тә р'ази кә дьзива бежә: ‹Wәрьн әм һәр'ьн хwәдейед башqәр'а qӧльх кьн›, кӧ нә тә нас кьрьнә нә жи кал-бавед тә,
[7] хwәдейед мьләтед дора хwәр'а, һәгәр незики тә бьн, йан дури тә, жь сәрики ә'рде һ'әта сәре дьн,
[8] wир'а qайл нәби у гӧр'а wи нәки. Бьра һ'әйфа тә ль wи нәйе у дьле тә ле нәшәwьтә, нә жи wи вәшери.
[9] Ле ә'сә wи бькӧжи, пешийе бьра дәсте тә ль сәр wи кӧштьнер'а бьльнд бә, паше дәсте т'әмамийа щьмә'те.
[10] Бьдә бәр кәвьра бькӧжә, чьмки әwи кьрийә кӧ тә жь Хӧдан Хwәдейе тә, к'ижани тӧ жь Мьсьре жь мала хӧламтийе дәрхьсти, бьхальфинә.
[11] Һьнге т'әмамийа Исраеле бона wе йәке wе бьбьһе у бьтьрсә, иди хьрабийа ӧса нав тәда накьн.
[12] Һәгәр тӧ бьбьһейи wәки ль нава бажаред тә йәкида кӧ Хӧдан Хwәдейе тә дьдә тә тӧ теда бьжийи,
[13] мәрьвед бет'әwшә жь нава тәда дәрк'әтьнә у бьнәлийед бажаре хwә хальфандьнә, готьнә: ‹Wәрьн әм һәр'ьн хwәдейед башqәр'а qӧльх кьн› (кӧ wә әw нас нәкьрьнә),
[14] тӧ бьгәр'ә, ә'нәнә кә у р'ьнд пе бьһ'әсә. Һәгәр әw ӧса нә, р'аст ә әw к'ьрети ль нава тәда буйә,
[15] һьнге бьнәлийед wи бажари ә'сә бьдә бәр дәве шур бькӧжә, бажар у һ'әму чь кӧ wида йә, ӧса жи һ'әйwанед wи, бьдә бәр дәве шур qьр' кә, кӧ ньфьр'е Хӧдан бе сери.
[16] Т'әмамийа т'ален т'оп кә нава мәйдане. Бажар т'аленва Хӧдан Хwәдейе хwәр'а агьршәwат кә. Бьра әw һ'әта-һ'әтайе wеран бьминә у т'ӧ щар нәйе авакьрьне.
[17] Бьра дәсте тә т'ӧ тьште ньфьр'лебуйи нәк'әвә, чь кӧ гәрә бе ӧндакьрьне, wәки алава һерса Хӧдан дайнә у р'ә'ме ль тә бькә. К'әрәме ль тә бькә, тә ль һәв зедә кә, чаwа кӧ wи кал-бавед тәр'а сонд хwар,
[18] һәгәр тӧ гӧр'а Хӧдан Хwәдейе хwә бьки, һ'әму ә'мьред wи кӧ әз иро ль тә ә'мьр дькьм хwәй ки у һәqийе ль бәр ч'ә'ве Хӧдан Хwәдейе хwә бьки.