Q. Дӧщари 6
[1] Әв ьн әw ә'мьр, qәйдә-qанун у qьраред кӧ Хӧдан Хwәдейе wә ә'мьри ль мьн кьрьн кӧ wә һин кьм, wәки wи wәлатида к'ижани кӧ һун дьчьне ле wар бьн бьqәдиньн.
[2] Һәгәр тӧ һ'әму р'ожед ә'мьре хwәда жь Хӧдан Хwәдейе хwә бьтьрси, һ'әму qәйдә-qанун у ә'мьред кӧ әз ль тә ә'мьр дькьм, тӧ, кӧр'е тә у кӧр'е кӧр'е тә бьqәдиньн, һьнге ә'мьре тәйе дьреж бә.
[3] Бьбьһе Исраел у бькә кӧ бьqәдини, wәки тәр'а qәнщ бә у һун гәләки ль һәв зедә бьн, ль сәр ә'рде кӧ шир у һьнгьв же дьк'ьшә, чаwа кӧ Хӧдан Хwәдейе кал-бавед тә готьбу тә.
[4] Бьбьһе Исраел! Хӧдан Хwәдейе мә Хӧданәк ә .
[5] Хӧдан Хwәдейе хwә һ'ьз бькә, бь т'әмамийа дьле хwә, бь т'әмамийа щанийа хwә у бь т'әмамийа qәwата хwә.
[6] Ван хәбәред кӧ әз иро ль wә ә'мьр дькьм бьра дьлед wәда бьн.
[7] Зар'ед хwә qәнщ һини ван кә. Бона ван хәбәр дә, гава мала хwәда р'уньшти би, йан р'еда би, йан п'алдайи би йан р'адьби.
[8] У wан чаwа нишан ль сәр дәсте хwә гьредә, ӧса жи бьра әw ль сәр ә'нийа тә ль навбәра ч'ә'вед тә бьн,
[9] wан ль сәр р'әхдәрийед мала хwә у дәргәһед бажаре хwә бьньвисә.
[10] Чахе Хӧдан Хwәдейе тә, тә бьбә wи ә'рди, к'ижан кӧ Хӧдан кал-бавед тә Бьраһим, Исһаq у Аqубр'а сонд хwар, кӧ бажаред qәнщ у мәзьнва бьдә тә, к'ижан кӧ тә ченәкьрьнә,
[11] малед һәр тьштива т'ьжи, кӧ тә т'ьжи нә кьрьнә, биред вәдайи, кӧ тә вәнәданә, бахе тьрийа у зәйт'уне, кӧ тә данәч'ькандьнә, те бьхwи у т'ер би.
[12] Һаш жь хwә һәбә, wәки тӧ Хӧдане кӧ тӧ жь wәлате Мьсьре, жь мала хӧламтийе дәрхьсти бир нәки.
[13] Хӧдан Хwәдейе хwә бьтьрсә, wир'а хӧламтийе бькә, бь наве wи сонд бьхwә.
[14] Пәй хwәдейед башqәйә мьләтед дора хwә нәчьн,
[15] чьмки Хӧдан Хwәдейе кӧ нава тәда йә, Хwәдейе к'ӧмр'әш ә. Нәбә кӧ һерса Хӧдан Хwәдейе тә ль сәр тә р'абә у әw тә жь сәр р'уйе ә'рде ӧнда кә.
[16] Хӧдан Хwәдейе хwә нәщер'ьбиньн, чаwа кӧ wә ль Массаһе әw щер'ьбанд.
[17] Ә'мьред Хӧдан Хwәдейе хwә, шә'дәтийед wи у qәйдә-qанунед wи, кӧ әwи ль тә ә'мьр кьрьн, qәнщ хwәйи кьн.
[18] Ль бәр ч'ә'ве Хӧдан р'астийе у qәнщийе бькә, wәки тәр'а qәнщ бә у тӧ һәр'и ль wи ә'рде qәнщ wар би, бона к'ижани Хӧдан кал-бавед тәр'а сонд хwар
[19] кӧ һ'әму дьжмьнед тә wе жь бәр тә бенә р'аqәтандьне, чаwа кӧ Хӧдан гот.
[20] Гава зар'ед тә сьбе жь тә бьпьрсьн, бежьн: ‹Мә'на ван шә'дәти, qәйдә-qанун у qьрара кӧ Хӧдан Хwәдейе мә т'әми ль wә кьрьнә, чь нә?›
[21] Һьнге бежә зар'ед хwә: ‹Әм Мьсьреда хӧламе Фьрәwьн бун, ле Хӧдан әм бь дәсте зор жь Мьсьре дәрхьстьн.
[22] Хӧдан ль Мьсьре, ль бәр ч'ә'вед мә нишан у к'әрәмәтед мәзьнә qолайи анинә сәре Фьрәwьн у т'әмамийа мала wи.
[23] Ле Хwәде әм жь wьр дәрхьстьн кӧ мә бьбә wи ә'рди, бона к'ижани кӧ wи кал-бавед мәр'а сонд хwар кӧ бьдә мә.
[24] Һьнге Хӧдан ль мә ә'мьр кьр кӧ һ'әму ван qәйдә-qануна хwәй кьн, жь Хӧдан Хwәдейе хwә бьтьрсьн, wәки т'әмамийа р'ожед мәда мәр'а qәнщ бә, мә сах бьһелә мина р'ожа иройин.
[25] Мәр'а р'асти wе бе һ'әсабе, wәки әм ван һ'әму ә'мьра ль бәр Хӧдан Хwәдейе хwә бькьн кӧ бьqәдиньн, чаwа кӧ wи ль мә ә'мьр кьр›.