[1] Гава һәр тьшт, дӧа у ньфьр'ед кӧ мьн данибунә ль бәр тә, бенә сәре тә, һьнге ль сәр wан, нава һ'әму мьләтада, к'ижан кӧ Хӧдан Хwәдейе тә тӧ нава wан да бәлакьри, диса бьфькьрә,
[2] һәгәр тӧ бәр бь Хӧдан Хwәдейе хwә вәгәр'и, тӧ у зар'ед хwәва бь т'әмамийа дьле хwә у бь т'әмамийа нәфса хwә, гӧһ бьди дәнге wи, һәр тьшт чаwа кӧ әз иро ль тә ә'мьр дькьм,
[3] һьнге Хӧдан Хwәдейе тә wе чәрха тә р'аст кә у р'ә'ме ль тә бькә, wе диса тә жь нава һ'әму мьләта, нава к'ижана Хӧдан Хwәдейе тә тӧ бәла кьри, wе тә т'опи сәр һәв кә.
[4] Wәки тӧ һ'әта бәр п'әр'е ә'зман жи ажоти би, жь wьр жи Хӧдан Хwәдейе тә wе тә т'опи сәр һәв кә, тә һьлдә
[5] у Хӧдан Хwәдейе тә wе тә бьбә ә'рде кӧ кал-бавед тә wар бьбун у wе хwәр'а бьки мьлк'. Wе чәрха тә р'аст кә у тә жь кал-бавед тә зә'фтьр ль һәв зедә кә.
[6] Хӧдан Хwәдейе тә wе дьле тә у дьле зӧр'әта тә бьгӧһезә , wәки бь т'әмамийа дьле хwә у бь т'әмамийа нәфса хwә Хӧдан Хwәдейе хwә һ'ьз бьки бона хатьре ә'мьре хwә.
[7] Хӧдан Хwәдейе тә wе һ'әму ван ньфьр'а вәгәр'инә ль сәр дьжмьн у нәйаред тә, йед кӧ пәй тә к'әтьбун.
[8] Те жи диса гӧһ бьди дәнге Хӧдан у һ'әму ә'мьред кӧ әз иро ль тә ә'мьр дькьм бьqәдини.
[9] Хӧдан Хwәдейе тә wе тә һәр тьштида хьне кә: Бь һәр шьхӧле дәстед тә, бәре зьке тә, бәре һ'әйwане тә у бәре ә'рде тә. Чьмки Хӧдан диса wе ша бә кӧ qәнщийе тәр'а бькә, чаwа кӧ әw кал-бавед тәр'а ша дьбу,
[10] гава тӧ гӧһ бьди дәнге Хӧдан Хwәдейе хwә, ә'мьр у qәйдә-qанунед wийә ве к'ьтеба qанунеда ньвиси хwәй ки, бь т'әмамийа дьле хwә у бь т'әмамийа нәфса хwә вәгәр'и бәрбь Хӧдан Хwәдейе хwә.
[11] Чьмки әв ә'мьре кӧ әз иро ль тә ә'мьр дькьм, нә дури тә йә нә жи әw чәтьн ә.
[12] Әw нә ль ә'змана йә, wәки бе готьне: ‹К'е wе бона мә р'абә ә'змен, wе мәр'а бинә у әм wе бьбьһен, һьнге мәйе әw бьqәданда?›
[13] Нә жи әw wи алийе бә'ре йә, wәки бе готьне: ‹К'е wе бона мә һәр'ә wи алийе бә'ре, wе мәр'а бинә у әм wе бьбьһен, һьнге мәйе әw бьqәданда?›
[14] Ле әw хәбәр ль щәм тәйә, ль сәр заре тә у дьле тәда йә, кӧ wе хwәйи ки.
[15] Бьньһер'ә, әз иро ә'мьр у мьрьне, хер-хwәши у хьрабийе датиньмә ль бәр тә.
[16] Әз иро ль тә ә'мьр дькьм кӧ Хӧдан Хwәдейе хwә һ'ьз бьки, р'ийед wида һәр'и, ә'мьред wи, qәйдә-qанунед wи у qьраред wи хwәйи ки. Wәки тӧ бьжийи у ль һәв зедә би у Хӧдан Хwәдейе тә wе тә бьмбарәк кә ль сәр ә'рде кӧ тӧ дьчуйи хwәр'а бьки мьлк'.
[17] Ле һәгәр дьле тә пашда вәгәр'ә у гӧһ нәди, жь р'е бейи шьһ'ьтандьне, ль бәр хwәдейед башqә та би wанр'а qӧльх ки,
[18] әз иро ә'лами wә дькьм кӧ һуне ә'сәйи ӧнда бьн, һуне дьреж ль сәр wи ә'рди нәжин, бона к'ижани тӧ Урдӧнер'а дәрбаз дьби кӧ бьк'әви wьр у хwәр'а бьки мьлк'.
[19] Әз иро гази ә'рд у ә'змен дькьм чаwа шә'дед мьqабьли тә, әз ә'мьр у мьрьне датиньмә бәр тә, дӧа у ньфьр'е. Дә ә'мьр бьбьжерә wәки тӧ зӧр'әта хwәва бьжийи,
[20] Хӧдан Хwәдейе хwә һ'ьз бькә, гӧр'а wи бькә у незики wи бә. Чьмки әw ә'мьре тә йә у дьрежайа р'ожед майина тә йә ль сәр ә'рде кӧ Хӧдан кал-бавед тә: Бьраһимр'а, Исһаqр'а у Аqубр'а сонд хwар бьдә wан».